Read Hmong Njua Exekees 10 Bible Online

Exekees 10 - Hmong Njua bible

Exekees 10

¹Kuv tsaa muag saib qhov kws zoo le lub ntuj ncaaj ntawm cov qhelunpees taubhau rua sau, kuv pum muaj ib yaam zoo le lub zwmtxwv kws yog muab cov qai zeb Xafiles ua.

²Vaajtswv has rua tug txivneej naav rig tsho ntaub maag has tas, “Koj ca le chaws kis nruab nraab ntawm cov lug kws nyob huv qaab cov qhelunpees, hab muab phoov teg yawm cov ncaig tawg kws cig lab ploog nqaa lug; hab coj moog w kuas thoob plawg lub nroog.” Kuv saib ntsoov tug txivneej ntawd moog.

³Thaus nwg moog rua huv, cov qhelunpees tseem taabtom sawv ntawm lub Tuamtsev saab nraag, hab muaj fuab lug puv nkaus chaav huv plawv.

⁴Tug TSWV tug tshwjchim txawm tawm ntawm cov qhelunpees moog rua ntawm txujkev kws moog rua huv lub Tuamtsev. Ces fuab txawm lug qhwv nkaus lub Tuamtsev hab tug TSWV tug tshwjchim ci ntsaa ab puv nkaus huv chaav tsev ntawd.

⁵Cov qhelunpees ntxuaj tis nrov heev, ua rua cov tuabneeg kws nyob saab nrau chaav ntawd nov huv tuabsi. Lub suab ntawd nrov ib yaam le Vaajtswv tug kws muaj Fwjchim Luj kawg nkaus lub suab.

⁶Thaus tug TSWV has kuas tug txivneej kws naav ntaub maag moog muab cov ncaig tawg ntawm kis nruab nraab cov lug kws nyob huv qaab cov qhelunpees, tug txivneej ntawd txawm moog sawv ze ntawm ib lub lug.

⁷Cov qhelunpees ib tug txawm cev teg moog muab ob peb lub ncaig tawg lug tso rua huv tug txivneej kws naav rig tsho ntaub maag txhais teg, tug txivneej ntawd nqaa cov ncaig tawg hab tawm moog lawm.

⁸Kuv pum cov qhelunpees txhua tug muaj ib yaam zoo le tuabneeg txhais teg nyob huv qaab puab txhua phob tis.

⁹Kuv pum plaub lub lug zoo ib yaam nkaus, ib lub nyob ib saab ntawm ib tug qhelunpees. Cov lug ntawd ci ib yaam le cov qai zeb muaj nqes, hab txhua lub lug, nyag tseem muaj dlua nyag ib lub lug dlhos rua ntawm ceg kaum saab xis.

¹¹Thaus cov qhelunpees moog kev, puab yeej moog tau rua txhua phaab tsi taag tig le. Puab yeej moog tau ua ke rua txhua phaab lawv le puab xaav moog.

¹²Puab tej cev, tej nrausqaum, tej teg, tej tis hab tej lug puavleej muaj qhovmuag huv tuabsi.

¹³Cov lug ntawd zoo ib yaam le cov kws kuv tub xub pum huv thawj zaaj ywgtoog lawm.

¹⁴Txhua tug qhelunpees twg muaj plaub lub ntsejmuag. Lub ib zoo le tug txiv nyuj lub, lub ob zoo le tuabneeg lub, lub peb zoo le tsuv ntxhuav lub, hab lub plaub zoo le dlaav lub.

¹⁵(Puab yog tuab cov qhelunpees kws kuv pum nyob ntawm ntug Dlej Khenpales). Thaus cov qhelunpees ntawd yaa rua sau nruab ntug,

¹⁶cov lug nrug puab moog hab. Thaus puab nthuav tis yaa los cov lug yeej nrug puab moog ua ke.

¹⁷Thaus cov qhelunpees nreg los cov lug kuj nreg; hab thaus cov qhelunpees yaa los cov lug kuj yaa hab, rua qhov cov qhelunpees yog cov kws tswj cov lug ntawd.

¹⁸Taamsim ntawd tug TSWV tug tshwjchim kws ci ntsaa ab txawm tawm ntawm txujkev kws moog rua huv lub Tuamtsev moog nreg ncaaj rua sau cov qhelunpees.

¹⁹Thaus kuv tseem saib ntsoov, cov qhelunpees txawm nthuav tis yaa huv nplajteb nuav moog, ces cov lug txawm yaa nrug puab moog lawm. Puab moog nreg rua ntawm lub roojvaag saab nubtuaj ntawm lub Tuamtsev hab tug TSWV tug tshwjchim kws ci ntsaa ab lug qhwv nkaus cov qhelunpees ntawd.

²⁰Kuv tseem ncu has tas yog tuab cov qhelunpees kws kuv tub xub pum nyob huv qaab cov Yixalayees tug Vaajtswv ntawm tug ntug Dlej Khenpales.

²¹Cov qhelunpees ntawd txhua tug muaj plaub lub ntsejmuag, plaub phob tis, hab muaj ib yaam zoo le tuabneeg txhais teg nyob huv qaab puab txhua phob tis.

²²Puab cov ntsejmuag los zoo ib yaam le cov ntsejmuag kws kuv tub xub pum nyob ntawm ntug Dlej Khenpales. Txhua tug qhelunpees moog ncaaj nraim rua tom hauv ntej.