Read Hmong Njua Exekees 11 Bible Online

Exekees 11 - Hmong Njua bible

Exekees 11

¹Vaajtswv tug Ntsujplig lug nqaa hlo kuv moog rua ntawm lub roojvaag kws nyob ntawm lub Tuamtsev saab nubtuaj. Muaj neeg nkaum tsib leeg txivneej nyob ze ntawm lub roojvaag, muaj Axules tug tub Ya-axaniyas hab Npenayas tug tub Pelatiyas kws yog ob tug thawjcoj ntawm puab tsaav tuabneeg nrug puab nyob ntawd.

²Vaajtswv has rua kuv tas, “Tub noobneej, cov txivneej kws koj pum ntawd, tuavhuv ua phem ua qas hab qha cov tuabneeg huv lub nroog nuav ua txhum.

³Puab has tas, ‘Tsi ntev peb yuav tau ua tsev dlua. Lub nroog nuav zoo le lub laujkaub kws nyob huv qhovcub hab peb zoo ib yaam le cov nqaj kws hau huv lub laujkaub ntawd, tabsis txawm le caag los lub laujkaub tseem thaiv peb ntawm cov nplaim tawg.’

⁴Tub noobneej, koj ca le cev kuv tej lug tshev cov tuabneeg ntawd taamsim nuav.”

⁵Vaajtswv tug Ntsujplig lug kaav hlo kuv, hab tug TSWV qha kuas kuv has cov lug nuav rua cov tuabneeg ntawd tas: “Cov Yixalayees, kuv paub tej kws mej has hab tej kws mej tuavhuv ua lawm.

⁶Mej tua tuabneeg coob leej huv lub nroog nuav, txhaj muaj tej tuabneeg tuag pawg lug rua txhua txujkev.

⁷“Kuv yog tug TSWV kws kaav ib puas tsaav yaam has le nuav rua mej. Lub nroog nuav yog lub laujkaub kws taabtom nyob huv qhovcub, tabsis dlaabtsi yog cov nqaj kws hau rua huv? Tub yog cov tuabneeg tuag kws mej tua ntaag! Mej yuav tsi tau nyob huv lub nroog nuav lawm, kuv yuav muab mej tshem rua saab nrau ntug nroog!

⁸Mej puas ntshai tej nav ntaaj? Kuv yuav khaiv ib paab tuabneeg nqaa ntaaj tuaj tua mej. Tug TSWV kws yog Vaajtswv has le ntawd.

⁹Kuv yuav coj mej tawm moog rua nrau ntug nroog hab muab mej cob rua cov tuabneeg txawv tebchaws. Kuv tub txav txim rua mej lawm,

¹⁰mej yuav raug tua tuag rua huv mej lub tebchaws, ces txhua tug txhaj yuav paub has tas kuv yog tug TSWV.

¹¹Lub nroog nuav yuav tsi tiv thaiv mej le lub laujkaub tiv thaiv cov nqaj. Txawm yog mej yuav nyob huv lub tebchaws Yixalayees nuav qhov twg los kuv yuav rau txim rua mej.

¹²Mej yuav paub has tas kuv yog tug TSWV kws rau txim rua mej, vim mej coj lwm tsaav tuabneeg tej kevcai, mej ua le ntawd yog mej rhuav kuv tej kevcai hab kuv tej lug saamfwm!”

¹³Thaus kuv tseem cev Vaajtswv lug, Pelatiyas ca le qaug ntawg tuag lawm. Kuv txhus caug ndlua ua ntsejmuag ti nkaus huv aav hab thov has tas, “Tug TSWV kws kaav ib puas tsaav yaam, thov tsi xob ua le ko! Koj txawm yuav muab cov tuabneeg kws seem huv tebchaws Yixalayees tua kuas tuag taag le los?”

¹⁴Tug TSWV has rua kuv tas:.

¹⁵“Tub noobneej, cov tuabneeg kws nyob huv Yeluxalees sis thaam txug koj hab koj cov kwvtij Yixalayees kws raug nteg moog rua lwm tebchaws. Puab has tas, ‘Cov tuabneeg kws raug nteg moog ntawd nyob nrug dleb lub tebchaws kws muaj kev pehawm tug TSWV. Tug TSWV tub muab lub tebchaws nuav cob rua peb ua peb tug lawm.’

¹⁶“Koj has rua koj cov kwvtij kws raug nteg moog rua lwm tebchaws lawv le kuv cov lug nuav: Kuv yog tug TSWV kws ntab puab moog nyob rua tej tebchaws kws dleb, hab ua kuas puab tawg moog nyob xyaw ntau tsaav tuabneeg. Tabsis txawm le ntawd los kuv yuav nrug puab nyob huv cov tebchaws ntawd.

¹⁷“Kuv yog tug TSWV kws kaav ib puas tsaav yaam, koj has kuv tej lug nuav rua puab tas, kuv yuav sau puab huv cov tebchaws kws puab moog nyob ntawd rov lug, hab yuav muab lub tebchaws Yixalayees rov rua puab.

¹⁸Thaus puab rov qaab lug, puab yuavtsum tso txhua yaam kev phem kev qas hab tej mlom kws puab muaj tseg huv tuabsi!

¹⁹Kuv yuav pub lub sab tshab hab txujkev xaav tshab rua puab. Kuv yuav rhu puab lub sab kws tawv le pobzeb povtseg, hab muab lub sab kws noog lug rua puab.

²⁰Ces puab yuav ua lawv le kuv tej kevcai hab muab sab npuab kuv tej lug saamfwm. Puab yuav yog kuv tsaav tuabneeg hab kuv yuav yog puab tug Vaajtswv.

²¹Tabsis kuv yuav rau txim rua cov tuabneeg kws ua kev phem kev qas hab pe mlom. Kuv yuav rau txim rua puab, vim tej kws puab tau ua taag lug lawm.” Tug TSWV kws kaav ib puas tsaav yaam has tej lug nuav.

²²Cov qhelunpees pib yaa tawm hab cov lug los txawm nrug cov qhelunpees moog lawm. Cov Yixalayees tug Vaajtswv tug tshwjchim kws ci ntsaa ab lug roog nkaus puab.

²³Tug tshwjchim txawm ncaim lub nroog hab moog rua tim lub roob kws nyob ntawm lub nroog saab nubtuaj lawm.

²⁴Nyob huv zaaj ywgtoog ntawd, Vaajtswv tug Ntsujplig nqaa hlo kuv hab coj kuv rov moog rua tim tebchaws Npanpiloos kws peb raug nteg moog nyob, ces zaaj ywgtoog txawm pluj lawm.

²⁵Kuv txhaj pav txhua yaam kws tug TSWV ua rua kuv pum, rua cov tuabneeg kws raug nteg moog ntawd noog.