Read Hmong Njua Exekees 12 Bible Online

Exekees 12 - Hmong Njua bible

Exekees 12

¹Tug TSWV has rua kuv tas:.

²“Tub noobneej, koj nrug cov tuabneeg ntxeev sab nyob. Puab muaj qhovmuag, tabsis puab tsi pum dlaabtsi; puab muaj qhovntsej, tabsis puab tsi nov lug, rua qhov puab yog tuabneeg ntxeev sab.

³“Tub noobneej, ca le sawbsim koj tej khoom hab tawm moog ib yaam le koj yog tug tuabneeg poob tebchaws, hab koj ca le moog rua lwm qhov thaus nruab nub lug taabmeeg suavdlawg. Tej zag qhov kws koj tawm moog le ntawd yuav ua rua puab pum has tas puab yog tuabneeg ntxeev sab.

⁴Ca le nqaa koj pob khoom hab sawv kev moog rua lwm qhov thaus nruab nub lug ib yaam le tug tuabneeg poob tebchaws, kuas puab txhua tug pum hab saib ntsoov koj.

⁵Thaus puab saib ntsoov koj, koj ca le tho ib lub qhov ntawm saab phaab ntsaa, nqaa koj pob khoom tawm ntawm lub qhov ntawd moog.

⁶Ca puab saib ntsoov koj tsaws koj pob khoom rua sau xubpwg hab tawm moog rua saab nrau tsaus ntuj nti, pus nkaus koj qhovmuag kuas koj tsi xob pum kev hab tsi paub sov yuav moog rua qhov twg. Qhov kws koj ua le ntawd, yog ua lub cim qha rua cov Yixalayees paub.”

⁷Kuv ua lawv le tug TSWV qha rua kuv. Nub ntawd kuv txawm sawbsim tau ib pob khoom ib yaam le tug tuabneeg poob tebchaws, hab nub ntawd thaus yuav tsaus ntuj, kuv txawm muab teg tho ib lub qhov ntawm saab phaab ntsaa hab tawm moog rua saab nrau. Puab saib ntsoov kuv tsaws pob khoom rua sau xubpwg hab sawv kev moog lawm.

⁸Taagkig tom qaab tug TSWV rov lug has rua kuv tas:

⁹“Tub noobneej, nwgnuav cov Yixalayees kws ntxeev sab nug has tas, koj ua dlaabtsi le ntawd,

¹⁰koj teb rua puab lawv le tug TSWV kws kaav ib puas tsaav yaam kuas koj has. Cov lug nuav yog has rua tug nom kws kaav lub nroog Yeluxalees hab cov pejxeem kws nyob huv lub nroog ntawd.

¹¹Koj has rua puab tas qhov kws koj ua le ntawd, yog ib lub cim qha rua puab paub has tas puab yuav raug luas nteg coj moog ua tuabneeg poob tebchaws.

¹²Tug nom kws kaav puab los yuav tsaws hlo nwg pob khoom rua sau xubpwg hab tawm tsiv ntawm lub qhov kws luas tho rua nwg ntawm saab phaab ntsaa moog tsaus ntuj nti. Nwg yuav pus nkaus qhovmuag hab tsi paub sov yuav moog rua qhov twg.

¹³Tabsis kuv yuav nthuav kuv lub vaag khwb nkaus nwg ca. Ces kuv yuav coj nwg moog rua huv lub nroog Npanpiloos kws yog qhov chaw nwg yuav tuag tsi pum lub nroog ntawd.

¹⁴Kuv yuav ntab nwg tsoom numtswv, cov tuavxaam hab cov tub faajxwm kuas tawm tsiv moog rua txhua txujkev, ces luas yuav nrhav puab tua povtseg.

¹⁵“Thaus kuv ntab puab tawm tsiv moog nyob xyaw lwm tsaav tuabneeg rua lwm lub tebchaws, puab yuav paub has tas kuv yog tug TSWV.

¹⁶Kuv yuav tseg puab cov ntawd ibtxha dlim nav ntaaj nav rag, dlim kev tshaib kev nqhes, hab dlim kaab mob kev nkeeg, kuas thaus puab nrug lwm tsaav tuabneeg nyob, puab yuav leeg paub has tas puab tau ua phem ua qas luj kawg nkaus, hab puab yuav paub has tas kuv yog tug TSWV.”

¹⁷Tug TSWV has rua kuv tas:.

¹⁸“Tub noobneej, koj yuav noj mov ua ib ce tshee nyo hab koj haus dlej ntshai ua ib ce laim quas txag.

¹⁹Tug TSWV kws kaav ib puas tsaav yaam kuas kuv has rua cov tuabneeg huv lub nroog Yeluxalees kws seem nyob huv puab lub tebchaws le nuav: puab yuav noj mov ua ib ce tshee nyo hab haus dlej ntshai ua ib ce tshee laim quas txag. Puab lub tebchaws yuav raug luas lwg kuas nyob qhuav nkuag ca, rua qhov cov tuabneeg kws nyob huv lub tebchaws ntawd tsi ua lawv le kuv tej kevcai.

²⁰Tej nroog kws nwgnuav muaj tuabneeg nyob puv nkaus yuav puamtsuaj, hab lub tebchaws yuav ua suabpuam taag. Ces puab txhaj yuav paub has tas kuv yog tug TSWV.”

²¹Tug TSWV has rua kuv tas:.

²²“Tub noobneej, vim le caag cov Yixalayees pheej has zaaj paajlug nuav: ‘Lub sijhawm dlhau zuj zug lawm, hab tej lug qha tshwm tsi muaj dlaabtsi tshwm le?’

²³Nwgnuav koj ca le qha tug TSWV kws kaav ib puas tsaav yaam tej lug rua puab. Kuv yuav ua kuas puab tej paajlug tsi muaj taag. Puab yuav tsi has txug zaaj paajlug ntawd huv tebchaws Yixalayees ntxiv le lawm. Koj qha rua puab le nuav: Tub txug sijhawm lawm, hab tej lug qha tshwm yuav tshwm muaj tseeb!

²⁴“Yuav tsi muaj tej zaaj ywgtoog cuav lossis tsi muaj cov cevlug kws dlaag kuas tuabneeg yuam kev nyob huv cov Yixalayees ntxiv lawm.

²⁵Kuv yog tug TSWV, kuv has le caag yeej yuav muaj le ntawd. Kuv yuav tsi ncua sijhawm, vim mej tau ntxeev sab taag mej tam neej le, yog le ntawd kuv yuav ua lawv le kuv tau has rua mej lawm. Kuv yog tug TSWV kws kaav ib puas tsaav yaam has le ntawd!”

²⁶Tug TSWV has rua kuv tas;

²⁷“Tub noobneej, cov Yixalayees xaav has tas, tej kws koj ua ywgtoog pum hab tej lug qha tshwm tseem tshuav ntev maam le tshwm lug.

²⁸Tug TSWV kws kaav ib puas tsaav yaam kuas kuv has rua puab le nuav: Kuv yuav tsi ncua sijhawm lawm. Yuav muaj tseeb le tej lug kws kuv has. Kuv yog tug TSWV kws kaav ib puas tsaav yaam has le ntawd.”