Read Hmong Njua Exekees 13 Bible Online

Exekees 13 - Hmong Njua bible

Exekees 13

¹Tug TSWV has rua kuv tas,

²“Tub noobneej, koj ca le tshev cov Yixalayees cov cevlug kws pheej cevlug lawv le puab xaav xwb. Koj has kuas puab ca le noog tug TSWV tej lug.”

³Tug TSWV kws kaav ib puas tsaav yaam has tas: “Cov cevlug kws ruag yuav raug puamtsuaj! Puab has lawv le puab xaav xwb, puab tsi tau ua ywgtoog pum dlaabtsi le.

⁴Cov Yixalayees, mej cov cevlug tsi muaj nqes ib yaam le tej maa kws nyob huv lub nroog kws pob taag lawm.

⁵Puab tsi zuv ntawm tej qhov kws saab phaab ntsaa qaug lawm lossis puab tsi khu saab phaab ntsaa ntawd. Yog le ntawd nub kws tug TSWV lug hab muaj kev tsuv kev rog tuaj, cov Yixalayees yuav tiv tsi tau.

⁶Tej zaaj ywgtoog kws puab ua yog cuav hab tej lug qha tshwm kws puab has yog lug dlaag xwb. Puab dlaag has tas yog puab cev kuv tej lug, tabsis kuv tsi tau khaiv puab moog. Tsi taag le ntawd xwb, puab tseem xaav kuas tej lug kws puab has yog lug tseeb!

⁷Kuv qha rua puab has tas: Tej zaaj ywgtoog kws mej pum yog cuav hab tej lug qha tshwm kws mej has yog lug dlaag. Mej has tas yog mej has kuv cov lug, tabsis kuv tsi tau has rua mej!”

⁸Tug TSWV kws kaav ib puas tsaav yaam has rua puab tas, “Mej tej lug yog lug cuav hab tej zaaj ywgtoog kws mej pum yog dlaag xwb. Kuv yog tug kws tawmtsaam mej ntaag.

⁹Kuv yuav rau txim rua mej cov kws cevlug cuav hab has tej lug qha tshwm kws ua rua tuabneeg yuam kev. Thaus kuv tsaav tuabneeg tuaj sis sau saablaaj ua ke, mej yuav tsi tau koom nrug puab; mej tej npe yuav tsi muaj nyob huv phoo ntawv kws teev cov Yixalayees tej npe; mej yuav tsi tau rov lug rua huv mej lub tebchaws. Ces mej txhaj yuav paub has tas kuv yog tug TSWV kws kaav ib puas tsaav yaam.

¹⁰“Cov cevlug kws ua rua kuv tsaav tuabneeg yuam kev has tas, ca le tso sab tsi muaj dlaabtsi. Tabsis tsi yog le ntawd! Kuv tsaav tuabneeg puab tau tug ntsaa yeej lawm, ces cov cevlug maam coj moov sib tuaj leem rua.

¹¹Koj has rua cov cevlug ntawd tas, puab tug ntsaa yeej yuav pob puag taag. Kuv yuav tso naag hab tso lawg hlub heev lug ntaus hab cua dlaaj cua dlub yuav ntsawj tug ntsaa yeej ntawd.

¹²Tug ntsaa yeej yuav pob, ces txhua tug yuav nug koj has tas, cov moov sib kws leem tug ntsaa yeej dlua twg taag lawm?”

¹³Tug TSWV kws kaav ib puas tsaav yaam has tas: Kuv chim, kuv txhaj tso cua dlaaj cua dlub, tso naag hab lawg lug ntaus puab tug ntsaa yeej.

¹⁴Kuv txhobtxwm rhuav tug ntsaa yeej kws puab muab moov sib leem kuas tawg taag, tshuav tug taw ntsaa lawm xwb. Tug ntsaa yeej yuav qaug lug ntaus mej tuag taag. Ces txhua tug txhaj paub has tas kuv yog tug TSWV.

¹⁵“Tug ntsaa yeej hab cov tuabneeg kws muab moov sib leem tug ntsaa yeej yuav raug kuv txujkev chim kws luj kawg nkaus. Ces kuv yuav qha rua koj has tas tug ntsaa yeej hab cov tuabneeg kws muab moov sib leem tug ntsaa yeej tub pluj taag lawm,

¹⁶cov cev Vaajtswv lug ntawd yog cov kws has rua lub nroog Yeluxalees kuas ca le tso sab, thaus kws tsi muaj kev tso sab.” Tug TSWV kws kaav ib puas tsaav yaam yog tug has le ntawd.

¹⁷Tug TSWV has tas, “Tub noobneej, nwgnuav koj tsaa qhovmuag saib koj tsaav tuabneeg cov quaspuj kws pheej has tej lug qha tshwm. Koj ca le tshev puab

¹⁸hab qha tug TSWV kws kaav ib puas tsaav yaam tej lug rua puab has tas: “Cov quaspuj ko yuav raug puamtsuaj! Mej xaws tej pluaj ntaub rua txhua tug coj ntawm teg hab ntus phuam rua txhua tug ntoo sau taubhau kuas puab muaj fwjchim tswj lwm tug lub neej. Mej xaav tau lub fwjchim kws tswj kuv tsaav tuabneeg txujsa hab txujkev tuag moog siv kuas muaj nqes rua mej.

¹⁹Mej ua saib tsi taug kuv taabmeeg kuv tsaav tuabneeg, kuas mej tau ob peb phoov teg moov nplej hab tau ob peb lub ncuav. Mej tua tej tuabneeg kws tsi tsimnyog tuag, tabsis mej tseg cov tuabneeg kws tsimnyog tuag ca. Mej ua le ntawd kuas dlaag tau kuv tsaav tuabneeg ntseeg mej.”

²⁰Tug TSWV kws kaav ib puas tsaav yaam has le nuav: “Kuv ntxub tej pluaj ntaub kws mej coj ntawm teg kws mej siv tswj kuv tsaav tuabneeg txujsa hab txujkev tuag. Kuv yuav chua tej ntawd ntawm mej teg moog, hab tso cov tuabneeg kws raug mej tswj kuas dlim.

²¹Kuv yuav chua mej tej phuam povtseg hab tso kuv tsaav tuabneeg kuas dlim ntawm mej lub fwjchim. Ces mej yuav paub has tas kuv yog tug TSWV.

²²“Mej tej lug dlaag ua rua cov tuabneeg ncaaj nceeg kws kuv tsi xaav kuas raug mob qaug zug kawg le. Mej taav kev tsi pub cov tuabneeg ua phem tso puab tej kev phem kev qas tseg, kuas puab txhaj tau txujsa.

²³Nwgnuav mej tej zaaj ywgtoog cuav hab tej lug qha tshwm kws ua rua tuabneeg yuam kev tsi muaj lawm. Kuv cawm kuv tsaav tuabneeg dlim ntawm mej lub fwjchim lawm, mej txhaj yuav paub has tas kuv yog tug TSWV.”