Read Hmong Njua Exekees 14 Bible Online

Exekees 14 - Hmong Njua bible

Exekees 14

¹Cov Yixalayees cov thawjcoj qee leej tuaj nug kuv, saib tug TSWV nyam le caag.

²Ces tug TSWV has rua kuv tas,

³“Tub noobneej, cov tuabneeg nuav tub muab puab lub sab fij rua tej mlom hab ca tej mlom ntawd coj puab moog ua txhum. Puab xaav has tas kuv yuav teb puab hab nua los?”

⁴Tug TSWV kws kaav ib puas tsaav yaam kuas kuv has rua puab le nuav: “Txhua tug Yixalayees kws ca tej mlom kaav puab lub sab hab coj puab moog ua txhum, tseem tuaj cuag tug cev Vaajtswv lug kuas nrug tuavxaam, kuv yog tug kws yuav teb puab tej lug xaav tau hab teb tej lug kws puab tej mlom xaav tau.

⁵Tej mlom ntawd ua rua cov Yixalayees txaav dleb ntawm kuv lawm, tabsis kuv ca sab has tas kuv cov lug teb yuav coj tau cov Yixalayees rov lug muab lub sab npuab kuv.

⁶“Tug TSWV kws kaav ib puas tsaav yaam kuas kuv has rua cov Yixalayees le nuav: Mej ca le tso plhuav mej tej mlom kws phem qas tseg hab rov lug cuag kuv.

⁷“Thaus cov Yixalayees ib tug twg lossis cov tuabneeg txawv tebchaws ib tug twg kws nrug mej cov Yixalayees nyob, tsiv tawm ntawm kuv moog pe mlom, hab tseem tuaj cuag tug cev Vaajtswv lug kuas nrug tuavxaam, mas kuv kws yog tug TSWV yuav teb nwg!

⁸Kuv yuav tawmtsaam nwg. Kuv yuav muab nwg ua qauv has. Kuv yuav tshem nwg tawm huv kuv tsaav tuabneeg moog, mej txhaj yuav paub has tas kuv yog tug TSWV.

⁹“Yog ib tug cevlug twg raug dlaag ntxag kuas teb tej lug cuav, qhov kws ua le ntawd tub yog kuv kws yog tug TSWV dlaag ntxag nwg. Kuv yuav tshem nwg tawm huv kuv tsaav tuabneeg Yixalayees moog.

¹⁰Tug cevlug hab tug kws tuaj thov kuas cevlug yuav raug txim nyaav ib yaam nkaus.

¹¹Kuv yuav ua le nuav kuas cov Yixalayees txhaj tsi tso kuv tseg moog ua tej kev txhum kws ua rua puab tsi huv. Puab yuav yog kuv tsaav tuabneeg hab kuv yuav yog puab tug Vaajtswv. Tug TSWV kws kaav ib puas tsaav yaam has le ntawd.”

¹²Tug TSWV has rua kuv tas:.

¹³“Tub noobneej, yog ib lub tebchaws twg ua txhum hab tsi muab sab npuab kuv, ces kuv yuav rhuav tsi pub kuas muaj kev noj kev haus rua lub tebchaws ntawd. Kuv yuav tso kev tshaib kev nqhes lug raug cov tuabneeg hab tej tsaj kuas tuag taag huv tuabsi.

¹⁴Txawm yog thaus Nau-es, Daniyees hab Yauj, puab peb leeg ntawd ua neej nyob los puab tej kev ncaaj nceeg tsuas cawm tau puab txujsa nkaus xwb.” Tug TSWV kws kaav ib puas tsaav yaam has le ntawd.

¹⁵“Lossis kuv tso tej tsaj nyaum lug tum tej tuabneeg thoob tebchaws kuas tuag taag, hab ua rua lub tebchaws nyob qhuav nkuag ca, kuas tsi muaj leejtwg tau luag taug kev hlaa lub tebchaws ntawd.

¹⁶Kuv yog tug TSWV kws kaav ib puas tsaav yaam hab yog Vaajtswv tug kws muaj sa nyob has tas, txawm yog Nau-es, Daniyees hab Yauj puab nyob ntawd los puab yeej cawm tsi tau puab cov mivnyuas kuas dlim. Puab tsuas cawm tau puab xwb, lub tebchaws yuav ua suabpuam taag.

¹⁷“Lossis kuv tso kev tsuv kev rog tuaj tua lub tebchaws, hab siv ntaaj tua cov tuabneeg hab tej tsaj kuas tuag taag huv tuabsi.

¹⁸Kuv yog tug TSWV kws kaav ib puas tsaav yaam hab yog tug Vaajtswv kws muaj sa nyob has tas, txawm yog Nau-es, Daniyees hab Yauj puab nyob ntawd los puab yeej cawm tsi tau puab cov mivnyuas kuas dlim, puab tsuas cawm tau puab xwb.

¹⁹“Yog has tas kuv chim, kuv tso sub tawg sub ntshaa lug raug lub tebchaws, kuas cov tuabneeg hab tej tsaj tuag taag huv tuabsi,

²⁰kuv yog tug TSWV kws kaav ib puas tsaav yaam hab yog tug Vaajtswv kws muaj sa nyob has tas, txawm yog Nau-es, Daniyees hab Yauj puab nyob ntawd los puab yeej cawm tsi tau puab cov mivnyuas kuas dlim, puab txujkev ncaaj nceeg tsuas cawm tau puab xwb.”

²¹Tug TSWV kws kaav ib puas tsaav yaam has tas: “Kuv yuav tso kuv plaub yaam kev rau txim kws nyaav heev lug rua lub nroog Yeluxalees xws le: kev tsuv kev rog, kev tshaib kev nqhes, kev mob kev nkeeg, hab tej tsaj nyaum lug rhuav kuas cov tuabneeg hab tej tsaj tuag taag huv tuabsi.

²²Yog muaj leejtwg seem tuag hab coj tau nwg cov mivnyuas lug cuag mej, mej yuav pum has tas puab ua phem ua qas kawg le, ces mej yuav paub has tas kuv rau txim ncaaj nceeg rua lub nroog Yeluxalees;

²³mej txhaj yuav paub has tas txhua yaam kws kuv ua taag lug yeej tsimnyog lawm.” Tug TSWV kws kaav ib puas tsaav yaam has le ntawd.