Read Hmong Njua Exekees 16 Bible Online

Exekees 16 - Hmong Njua bible

Exekees 16

²“Tub noobneej, koj ca le qha tej kev phem kev qas kws Yeluxalees tau ua lawm.

³Koj qha tug TSWV kws kaav ib puas tsaav yaam tej lug rua Yeluxalees has tas: “Koj yug huv lub tebchaws Kana-aas. Koj txiv yog tuabneeg Amaules, hab koj nam yog tuabneeg Hitis.

⁴Thaus yug tau koj lug, tsi muaj leejtwg txav koj txuj hlaab ntaws lossis ntxuav koj, tsi muab ntsev txhuam lossis muab khaub dluag lug qhwv koj.

⁵Thaus yug tau koj lug, tsi muaj leejtwg hlub koj hab mob sab ua tej kws has taag lug ntawd rua koj. Luas txhaj muab koj pov rua tom taj nraag.

⁶“Kuv dlua kev tuaj pum koj tsau ntshaav tsawv, koj ib ce lu ntshaav taag, tabsis kuv tsi ca koj tuag.

⁷Kuv ua rua koj hlub mog quas nyoos ib yaam le tug ntsuag ntoo, koj txhaj hlub tav nkauj. Koj ob lub mig puv zoo, hab koj cov plaubhau ntev nplwg loo, tabsis koj tseem labqaab.

⁸“Thaus kuv rov dlua kev tuaj, kuv pum has tas txug lub sijhawm kws koj nyam hluas nraug lawm. Kuv txhaj muab kuv lub tsho luj qhwv koj lub cev kws labqaab. Kuv coglug yuav hlub koj hab yuav koj ua kuv tug quaspuj, kuas koj yog kuv tug.” Tug TSWV kws kaav ib puas tsaav yaam has le ntawd.

⁹“Kuv muab dlej lug ntxuav tej ntshaav ntawm koj lub cev, hab muab roj tsw qaab pleev koj.

¹⁰Kuv muab ib dlaim tab kws taw suab quas zaw rua koj naav, hab muab ib nkawm khau tawv kws zoo heev rua koj rau; kuv muab phuam ntaub maag rua koj ntoo hab muab tsho ntaub tshwbkaab rua koj naav.

¹¹Kuv muab paugteg hab paug cejdlaab rua koj coj,

¹²kuv muab khawb khawm koj qhovntswg, muab qhws ntsej rua koj coj, hab muab mom kub rua koj ntoo.

¹³Koj coj saw nyaj saw kub hab naav tej ntaub maag hab ntaub tshwbkaab kws zoo heev. Koj tau noj tej ncuav kws yog muab cov tseem moov nplej puab, hab koj muaj zib ntaab hab roj txiv ntoo noj. Koj cev zaam zoo nkauj ci ntsaa quas ab, koj txhaj tau lug ua ib tug puj vaajntxwv.

¹⁴Koj txujkev zoo nkauj ua rua koj muaj koob meej nto moo lug rua txhua tsaav tuabneeg, rua qhov kuv muab koj tseev zaam txaus nyam hab ntxim luas sab heev.” Tug TSWV kws kaav ib puas tsaav yaam has le ntawd.

¹⁵“Tabsis koj ca le siv koj txujkev zoo nkauj hab nto moo moog nrug txhua tug kws tuaj cuag koj ua kev nkauj kev nraug.

¹⁶Koj muab tej khaub dluag ibtxha coj moog dlai rua huv koj tej chaw pe mlom, hab chaw ua namndlav. Ibtxwm yeej tsi muaj le nuav hab yuav tsi muaj ntxiv le lawm.

¹⁷Koj muab tej saw nyaj saw kub kws kuv muab rua koj coj moog nchuav ua tej tug mlom txivneej hab ua kev nkauj kev nraug nrug tej mlom ntawd.

¹⁸Koj muab tej tab taw suab quas zaw kws kuv muab rua koj coj moog rua tej mlom naav, koj muab roj txiv ntoo hab tej moov tshuaj tsw qaab kws kuv muab rua koj coj moog fij rua tej mlom.

¹⁹Kuv pub koj muaj tej zaub mov kws yog tej tseem moov nplej, tej roj txiv ntoo hab zib ntaab noj, tabsis koj muab coj moog ua khoom fij kuas tej mlom nyam koj.” Tug TSWV kws kaav ib puas tsaav yaam has le ntawd.

²⁰“Koj muab tej tub tej ntxhais kws koj yug rua kuv coj moog tua fij rua mlom. Koj moog ua kev nkauj kev nraug los tseem tsi txaus koj sab.

²¹Koj txhaj coj kuv tej mivnyuas ntawd moog tua fij rua tej mlom los?

²²Thaus koj moog ua kev phem kev qas kws yog ua namndlav, koj yeej tsi ncu qaab txug thaus koj tseem yau kws labqaab hab pw tsau ntshaav tsawv ntawd lawm.”

²³Tug TSWV kws kaav ib puas tsaav yaam has tas, “Koj raug puamtsuaj lawm! Raug puamtsuaj lawm! Koj ua txhua yaam kev phem kev qas hab koj tseem

²⁴moog ua tej chaw pe mlom rua ntawm tej ntug kev ua chaw ua namndlav.

²⁵Koj coj koj txujkev zoo nkauj moog dlaa paag aav. Koj muab koj lub cev rua txhua tug kws tuaj cuag koj, hab koj naj nub ua namndlav.

²⁶Koj ca cov tuabneeg Iziv kws yog phoojywg nruab ze tuaj nrug koj pw huv koj txaaj, hab koj pheej ua namndlav ua rua kuv chim heev.

²⁷“Kuv txhaj tsaa teg rau txim rua koj hab tshem tej koob moov kws yog koj feem ntawm koj moog. Kuv muab koj cob rua koj cov yeebncuab kws yog cov Filitees, kuas puab ua rua koj lawv le puab sab nyam, koj tej kev phem kev qas ua rua cov ntxhais Filitees poob ntsejmuag.

²⁸“Vim koj tsi txaus sab rua tej kev phem kev qas kws koj ua nrug lwm cov tuabneeg, koj txhaj lawv cov Axilias qaab. Koj yog puab tug namndlav, txawm le ntawd los tseem tsi txaus koj sab qeeg.

²⁹Tsi taag le ntawd xwb, koj tseem ua namndlav rua cov Npanpiloos kws yog lub tebchaws kws muaj tej tub laag tub luam, tabsis puab cov ntawd los kuj tsi txaus koj sab le hab.”

³⁰Tug TSWV kws kaav ib puas tsaav yaam has tas, “Koj tau ua ib puas tsaav yaam ib yaam le tug namndlav kws tsi paub txaajmuag le.

³¹Koj ua chaw pe mlom rua txhua txujkev hab ua namndlav rua huv tej chaw ntawd. Tabsis tsi yog koj ua namndlav yuav nyaj ib yaam le tej namndlav ibtxwm ua.

³²Koj yog tug quaspuj kws muaj quasyawg, tabsis tsi hlub tug quasyawg, txhaj moog ua kev nkauj kev nraug.

³³Tug namndlav tag, mas luas them nyaj rua nwg, tabsis koj tseem muab khoom pub hab muab nyaj ndlav hluas nraug tuaj txhua qhov tuaj nrug koj pw.

³⁴Koj yog ib tug namndlav kws txawv dlua luas tej. Tsi muaj leejtwg yuam kuas koj ua namndlav. Luas tsi them nyaj rua koj; koj them nyaj rua luas. Koj yeej txawv dlua lwm tug namndlav tag.”

³⁵Yeluxalees kws yog tug namndlav! Koj ca le noog tug TSWV kws kaav ib puas tsaav yaam tej lug.

³⁶Tug TSWV kws kaav ib puas tsaav yaam has le nuav: “Koj hle koj tej rig tsho ib yaam le tug namndlav, koj muab koj lub cev rua koj tej hluas nraug hab rua koj tej mlom kws phem qas, hab tua koj tej mivnyuas fij rua tej mlom ntawd.

³⁷Vim le nuav kuv yuav coj taagnrho koj tej qub hluas nraug tuaj ua ke, tsi has cov kws koj nyam hab cov kws koj ntxub huv tuabsi. Kuv yuav coj puab tuaj sawv puagncig koj, ces kuv yuav muab koj tej rig tsho hle kuas puab pum koj cuasqaab.

³⁸Kuv yuav rau txim rua koj, vim koj ua kev nkauj kev nraug hab tua tuabneeg. Kuv chim hab npautawg kuv txhaj rau txim kuas koj tuag.

³⁹Kuv yuav muab koj cob rua puab teg, puab yuav rhuav koj tej chaw ua namndlav hab pe mlom. Puab yuav chua pis nta koj tej rig tsho hab tej saw nyaj saw kub ca kuas koj nyob labqaab.

⁴⁰“Puab yuav sau nthwv tuaj muab pobzeb ntaus koj hab muab ntaaj txav kuas koj tu ua ob peb yaa.

⁴¹Puab yuav muab koj tej vaaj tse hlawv kuas kub nyab taag hab kuv yuav rau txim rua koj taabmeeg ib tsoom quaspuj. Kuv yuav txwv kuas koj tseg tsi xob ua namndlav hab tseg tsi xob muab khoom pub koj tej hluas nraug.

⁴²Ces kuv txujkev chim txhaj yuav txag hab kuv lub sab txhaj yuav tug. Kuv yuav tsi chim hab tsi khib ntxiv lawm.

⁴³Koj tsi ncu txug thaus koj tseem yau kws kuv tu koj, koj txhaj le moog ua ib puas tsaav yaam rua kuv chim. Yog le ntawd, kuv txhaj ua pauj tej kws koj tau ua lug lawm. Vim le caag koj ua kev nkauj kev nraug tsub rua tej kev pe mlom kws phem qas?” Tug TSWV kws kaav ib puas tsaav yaam yog tug has le ntawd.

⁴⁴Tug TSWV has tas, “Tuabneeg yuav siv zaaj paajlug nuav has txug koj kws yog lub nroog Yeluxalees has tas: ‘Leej nam zoo le caag, ces tug ntxhais zoo ib yaam le ntawd.’

⁴⁵Koj yog koj nam tug ntxhais tag. Koj nam ntxub nwg tug quasyawg hab nwg tej mivnyuas. Koj zoo ib yaam le koj cov vivncaug kws ntxub puab cov quasyawg hab cov mivnyuas. Koj hab koj cov vivncaug leej nam yog tuabneeg Hitis hab mej txiv yog tuabneeg Amaules.

⁴⁶“Koj tug taislaug yog lub nroog Xamalis kws nyob nrug nwg tej zog saab qaumteb. Koj tug nam hluas yog lub nroog Xaudoos kws nyob nrug nwg tej zog saab qaabteb.

⁴⁷Tsi yog koj ua le puab ua xwb, tej kev phem kev qas kws puab ua ntawd tseem tsi txaus koj sab. Tsi ntev koj yuav moog ua tej kev phem kev qas kws phem tshaaj tej kws puab ua hab.

⁴⁸“Tug TSWV kws kaav ib puas tsaav yaam has tas, ‘Kuv yog Vaajtswv tug kws muaj sa nyob has le nuav: “Koj tug nam hluas kws yog lub nroog Xaudoos hab nwg tej zog tub tsi tau ua kev phem kev qas npaum le koj hab koj tej zog ua.

⁴⁹Ntawm nuav yog Xaudoos txujkev txhum. Nwg hab nwg cov ntxhais khaavtheeb, rua qhov puab muaj noj muaj haus nplua mag hab nyob kaaj sab lug, tabsis puab tsi hlub cov tuabneeg txomnyem hab cov tuabneeg pluag.

⁵⁰Puab khaavtheeb hab tawv ncauj kawg le. Thaus kuv pum puab ua tej kws kuv ntxub, kuv txhaj rhuav kuas puab raug kev puamtsuaj.

⁵¹“ ‘ “Xamalis tej kev txhum tub tsi npaum le koj tej kev txhum ib nraab. Koj tau ua kev phem kev qas ntau dlua nwg. Yog muab nwg pev rua koj, mas koj tug taislaug zoo le tug kws tsi muaj ib qho txhum le.

⁵²Nwgnuav koj yuavtsum ris txujkev txaajmuag. Koj tej kev txhum ntau dlua koj cov vivncaug, yog muab puab pev rua koj, ces zoo ib yaam le puab nyob ib caag tsi tau ua txhum le. Koj ca le tiv kev txobthuam hab ris kev poob ntsejmuag, rua qhov koj ua rua koj cov vivncaug zoo yaam le puab tsi muaj txhum.” ’ ”

⁵³Tug TSWV has rua Yeluxalees has tas, “Kuv yuav rov txhim khu lub nroog Xaudoos hab nwg tej zog, kuas rov vaammeej dlua. Kuv yuav rov txhim khu kuas koj vaammeej ib yaam nkaus.

⁵⁴Koj yuav rov txaajmuag rua tej kev phem kev qas kws koj tau ua lawm hab koj txujkev txhum yuav ua rua koj cov vivncaug pum has tas puab zoo dlua koj.

⁵⁵Xamalis hab Xaudoos yuav rov zoo le qub, koj hab koj tej zog los yuav rov zoo le qub hab.

⁵⁶Thaus koj khaavtheeb, koj muab koj tug nam hluas kws yog Xaudoos has tsi zoo

⁵⁷ua ntej kws koj tej kev phem kev qas raug nthuav tawm. Nwgnuav koj zoo le nwg. Cov Edoos, cov Filitees hab cov tuabneeg kws nyob puagncig koj kws ntxub koj los has koj plig tsi zoo.

⁵⁸Koj yuav raug txim vim tej kev phem kev qas kws koj tau ua taag lug. Tug TSWV has le ntawd.”

⁵⁹Tug TSWV kws kaav ib puas tsaav yaam has tas, “Kuv yuav ua rua koj lawv le koj tau ua lawm, rua qhov koj tsi ua lawv le koj coglug, koj rhuav koj tej lug cog tseg.

⁶⁰Txawm le ntawd los kuv yuav ncu ntsoov kuv tej lug cog tseg rua koj thaus koj tseem yau, hab kuv yuav coglug rua koj moog ibtxhis.

⁶¹Koj yuav rov ncu txug tej kev phem kws koj tau ua taag lug lawm. Koj yuav txaajmuag thaus koj coj koj tug taislaug hab tug nam hluas rov lug. Kuv yuav ca obtug zoo ib yaam le yog koj ntxhais, tabsis kuv tsi coglug rua obtug le kuv coglug rua koj.

⁶²Kuv yuav nrug koj coglug dlua tshab, koj txhaj paub has tas kuv yog tug TSWV.

⁶³Kuv yuav zaam tej kev txhum kws koj tau ua taag lug, tabsis koj yuav ncu ntsoov tej ntawd hab txaajmuag heev tsi xaav has lug le.” Tug TSWV kws kaav ib puas tsaav yaam has le ntawd.