Read Hmong Njua Exekees 17 Bible Online

Exekees 17 - Hmong Njua bible

Exekees 17

¹Tug TSWV has rua kuv tas:.

²“Tub noobneej, koj ca le qha ib zaaj lug pevtxwv rua cov Yixalayees;

³Tug TSWV kws kaav ib puas tsaav yaam kuas koj has le nuav rua puab: Muaj ib tug dlaav luj kws ob phob tis zoo nkauj hab cov plaub tis ntev heev. Tug dlaav ntawd yaa moog rua sau roob Lenpanoos hab luv tau ib lub ntsis ntoo cab,

⁴tug dlaav coj lub ntsis cab ntawd moog rua huv lub tebchaws kws muaj kev laag kev luam, hab muab cog rua huv lub nroog kws cov tub laag tub luam nyob.

⁵Tug dlaav tsua coj ib lub noob huv tebchaws Yixalayees moog cog rua huv ib thaaj aav zoo kws muaj dlej txaus yug kuas lub noob ntawd tuaj kaug hab luj hlub.

⁶Tug yub ntawd tuaj ua ib tsob maab tsi sab, tabsis nwg ncau ceg nthuav rua ob saab. Tsob maab ntawd cov ceg hlaav moog txug rua ntawm tug dlaav hab cov caag nrhau moog tub. Cov ceg hab cov nplooj tsaus nti.

⁷“Muaj dlua ib tug dlaav luj kws ob phob tis ntev hab muaj plaub tuab heev. Tsob maab nrhau caag moog txug rua ntawm tug dlaav, hab cov ceg los hlaav nplooj moog rua ntawm tug dlaav, tsob maab ca sab has tas tug dlaav yuav muab dlej yug nwg ntau dlua huv lub vaaj kws nwg tuaj.

⁸Tabsis tsob maab ntawd yeej cog tau rua huv thaaj aav zoo kws muaj dlej txaus, nwg cov ceg txhaj hlaav nplooj ntau, tawg paaj txi txiv hab ua ib tsob maab kws zoo heev.

⁹“Kuv kws yog tug TSWV kaav ib puas tsaav yaam nug le nuav: ‘Tsob maab nuav puas yuav luj hlub taug? Thawj tug dlaav yeej dlob tau tsob maab, zaws cov txiv hab ntshua tej ceg povtseg kuas tsob maab qhuav. Tsi taag yuav siv zug lossis ca ib tsaav tuabneeg kws muaj zug tuaj dlob povtseg le.

¹⁰Tsob maab ntawd yeej cog rua huv thaaj aav kws zoo lawm tag, tabsis nwg puas yuav luj hlub taug? Thaus cov cua saab nubtuaj ntsawj tuaj, nwg puas yuav ntsws? Nwg puas yuav tuag tshaav rua ntawm thaaj chaw kws nwg tuaj?’ ”

¹¹Tug TSWV has rua kuv tas:.

¹²“Koj nug saib cov tuabneeg ntxeev sab puas paub zaaj lug pevtxwv ntawd lub ntsab. Koj has rua puab tas, vaajntxwv Npanpiloos tuaj rua huv Yeluxalees, nteg cov Yudas tug vaajntxwv hab nwg cov numtswv coj moog rua tim tebchaws Npanpiloos lawm.

¹³Vaajntxwv Npanpiloos tseem nteg cov Yudas tug vaajntxwv tsev tuabneeg ib tug coj moog hab yuam kuas nwg coglug lawv le vaajntxwv has. Nwg nteg cov numtswv coj moog kaw,

¹⁴tsi pub kuas tsaav tuabneeg Yudas sawv taug hab kuas puab ua lawv le tej lug kws cog tseg lawm xwb.

¹⁵Tabsis cov Yudas tug vaajntxwv ntxeev sab hab khaiv ib paab numtswv moog rua nraag tebchaws Iziv, coj neeg hab tubrog coob heev tuaj. Nwg puas yuav ua tav? Nwg ua le ntawd, nwg puas yuav tsiv dlim? Nwg yuav rhuav tsi tau nwg tej lug cog tseg hab tsiv tsi dlim le!”

¹⁶Tug TSWV kws kaav ib puas tsaav yaam has tas, “Kuv yog tug Vaajtswv kws muaj sa nyob, cov Yudas tug vaajntxwv yuav tuag rua huv tebchaws Npanpiloos, rua qhov nwg rhuav tej lug cog tseg kws nwg nrug vaajntxwv Npanpiloos kws tsaa nwg ua vaajntxwv lawm.

¹⁷Txawm yog Falaus muaj tubrog coob heev los yuav paab cov Yudas tug vaajntxwv tua tsi yeej, thaus cov Npanpiloos tuaj khawb aav meem tug ntsaa yeej kuas tua tau tuabneeg tuag coob ntawd.

¹⁸Cov Yudas tug vaajntxwv saib tsi taug hab rhuav tej lug cog tseg lawm. Nwg ua txhua yaam le ntawd, mas nwg yuav tsiv tsi dlim le.”

¹⁹Tug TSWV kws kaav ib puas tsaav yaam has tas, “Kuv yog tug Vaajtswv kws muaj sa nyob, kuv yuav rau txim rua nwg vim nwg tuav kuv lub npe coglug has tas, nwg yuav ua lawv le tej lug cog tseg ntawd.

²⁰Kuv yuav nthuav vaag khwb nkaus nwg. Kuv yuav coj nwg moog rua tim tebchaws Npanpiloos hab rau txim rua nwg, rua qhov nwg tsi muab sab npuab kuv.

²¹Nwg cov tubrog kws sab tawv tshaaj yuav tuag taag rua huv tshaav rog, hab cov seem yuav tawg tsiv ua saab ua sua rua txhua qhov. Koj txhaj yuav paub has tas kuv yog tug TSWV kws has le ntawd.”

²²Tug TSWV kws kaav ib puas tsaav yaam has le nuav: “Kuv yuav txav tsob ntoo cab kws sab lub ntsis hab luv tug ntsuag mog; kuv yuav coj moog cog rua sau roob sab,

²³yog cov Yixalayees lub roob kws sab tshaaj plawg. Nwg yuav ncau ceg, txi txiv hab peem tsheej ua ib tsob ntoo cab luj heev. Yuav muaj txhua yaam noog lug ua zeg hab nyob ntawm tej ceg.

²⁴Txhua tsob ntoo kws nyob huv lub tebchaws yuav paub has tas kuv yog tug TSWV. Kuv ua rua cov ntoo kws sab kuas qeg hab ua kuas cov ntoo kws qeg sab tuaj. Kuv ua rua cov ntoo kws tseem ntsuab kuas tuag tshaav, hab ua kuas cov ntoo kws qhuav lawm rov hlaav nplooj. Kuv yog tug TSWV kws has le ntawd. Kuv yuav ua lawv le tej lug kws kuv tau has lawm.”