Read Hmong Njua Exekees 2 Bible Online

Exekees 2 - Hmong Njua bible

Exekees 2

¹has tas “Tub noobneej, koj ca le sawv! Kuv muaj lug yuav has rua koj.”

²Thaus lub suab ntawd has taagnrho, Vaajtswv tug ntsujplig txawm lug kaav hlo kuv, ua rua kuv sawv tseeg nreg nreeg hab kuv nov ib lub suab has ntxiv tas,

³“Tub noobneej, kuv yuav khaiv koj moog cuag cov Yixalayees. Puab tau ntxeev sab tawmtsaam kuv hab puab tseem ntxeev sab qeeg ib yaam le puab cov yawmkoob tau ua lug lawm.

⁴Puab tawv ncauj hab tsi fwm kuv, yog le ntawd kuv txhaj khaiv koj moog qha rua puab has tas, tug TSWV kws kaav ib puas tsaav yaam yog tug has tej lug nuav rua puab.

⁵Txawm yog cov tuabneeg ntxeev sab ntawd yuav nyam noog koj has hab tsi noog los xij, puab yuav paub has tas muaj ib tug cev Vaajtswv lug nrug puab nyob lawm.

⁶“Tabsis tub noobneej, koj yuavtsum tsi xob ntshai puab lossis tej lug kws puab has. Puab yuav tsi txaus sab hab yuav saib tsi taug koj, yuav zoo le koj moog nyob huv cov raubris teb. Txawm le ntawd los koj tsi xob ntshai cov tuabneeg ntxeev sab ntawd lossis tej lug kws puab has rua koj.

⁷Koj yuavtsum qha rua puab lawv le kuv kuas koj qha, txawm yog puab yuav nyam noog koj has hab tsi noog los xij. Ncu ntsoov has tas puab yeej yog tuabneeg ntxeev sab hab phem kawg le.

⁸“Tub noobneej, koj ca le noog tej lug kws kuv has rua koj. Koj tsi xob ntxeev sab ib yaam le puab cov ntawd. Koj ca le rua qhovncauj hab noj yaam kws kuv yuav muab rua koj noj.”

⁹Kuv txawm pum dlheev ib txhais teg tuav rawv ib thooj ntawv cev tuaj rua kuv.

¹⁰Txhais teg ntawd nthuav kag thooj ntawv rua kuv saib, kuv pum muaj npe ntawv sau rua huv thooj ntawv ntawd thoob plawg ob saab tuabsi, muaj tej suab quaj tu sab kawg nkaus, tej suab quaj ntsuag hab suab ntsaaj sau rua huv thooj ntawv ntawd.