Read Hmong Njua Exekees 20 Bible Online

Exekees 20 - Hmong Njua bible

Exekees 20

¹Lub tsib hlis ntuj nub xab kaug, xyoo xyaa kws peb raug nteg coj moog rua lwm tebchaws. Cov Yixalayees cov thawjcoj qee leej tuaj nug kuv tuavxaam saib tug TSWV nyam le caag.

²Tug TSWV has rua kuv tas:

³“Tub noobneej, koj ca le has rua cov tuabneeg kws tuaj cuag koj has tas, tug TSWV kws kaav ib puas tsaav yaam has le nuav: Puas yog mej xaav tuaj nug saib kuv nyam le caag? Kuv yog Vaajtswv tug kws muaj sa nyob. Kuv tsi pub mej nug kuv ib lus le. Kuv yog tug TSWV kws kaav ib puas tsaav yaam, tej lug nuav yog kuv has.

⁴“Tub noobneej, koj puas tau npaaj txhij yuav txav txim rua puab? Koj ca le qha kuas puab paub txug tej kev phem kev qas kws puab cov yawmkoob tau ua taag lug lawm.

⁵Koj ca le qha tej kws kuv has nuav rua cov Yixalayees. Thaus kuv xaiv cov Yixalayees, kuv tau coglug tseg rua puab lawm. Thaus puab tseem nyob nraag tebchaws Iziv, kuv qha rua puab has le nuav: Kuv yog tug TSWV kws yog puab tug Vaajtswv.

⁶Kuv coglug rua puab has tas, kuv yuav coj puab tawm nraag tebchaws Iziv lug nyob rua huv lub tebchaws kws kuv tau xaiv tseg rua puab lawm. Lub tebchaws ntawd aav rog hab zoo ua noj ua haus dlua lwm lub tebchaws.

⁷Kuv has kuas puab tso tej mlom phem qas kws puab nyam tseg, hab tsi xob ca cov Iziv tej vaajtswv cuav ua rua puab tsi huv, rua qhov kuv yog tug TSWV kws yog puab tug Vaajtswv.

⁸Tabsis puab tawmtsaam kuv, tsi noog kuv lug, tsi tso puab tej kev phem kev qas lossis tsi tso kev pe cov Iziv tej vaajtswv cuav tseg. Thaus puab tseem nyob nraag Iziv, puab tub yuav raug kuv txujkev chim kws luj kawg nkaus.

⁹Tabsis kuv tsi ua le ntawd, yog kuv ua le ntawd, luas yuav txobthuam kuv lub npe. Kuv tau qha rua cov Iziv kws cov Yixalayees nrug nyob has tas, kuv yuav coj cov Yixalayees tawm huv cov Iziv lub tebchaws moog.

¹⁰“Kuv txhaj tau coj cov Yixalayees tsiv tawm nraag tebchaws Iziv lug rua taj suabpuam lawm.

¹¹Kuv muab kuv tej lug saamfwm hab tej kevcai qha rua puab, yog leejtwg ua lawv le kuv tej lug saamfwm hab tej kevcai ntawd, yuav tau txujsa.

¹²Kuv muab nub Xanpataus ua ib lub cim coglug nruab nraab ntawm puab hab kuv, kuas puab paub has tas, kuv yog tug TSWV kws ua rua puab dlawbhuv.

¹³Tabsis thaus cov Yixalayees tseem nyob nraag taj suabpuam, puab ntxeev sab rua kuv hab tsi noog kuv lug. Puab rhuav kuv tej kevcai hab tsi coj lawv le kuv tej lug saamfwm kws pub tau txujsa rua tug kws ua lawv le ntawd. Thaus puab tseem nyob ntawm taj suabpuam, puab saib nub Xanpataus tsi tseemceeb. Kuv txujkev chim tub yuav ua rua puab raug kev puamtsuaj.

¹⁴Tabsis kuv tsi ua le ntawd, yog kuv ua le ntawd, cov tuabneeg kws pum ntsoov kuv coj cov Yixalayees tawm huv tebchaws Iziv lug yuav txobthuam kuv lub npe.

¹⁵Yog le ntawd, thaus puab tseem nyob nraag taj suabpuam, kuv coglug rua puab has tas kuv yuav tsi coj puab moog rua huv lub tebchaws kws kuv yuav muab rua puab, yog lub tebchaws kws aav rog hab zoo ua noj ua haus dlua lwm lub tebchaws.

¹⁶Kuv tau coglug le ntawd, rua qhov puab rhuav kuv tej kevcai hab tsi coj lawv le kuv tej lug saamfwm, hab puab saib nub Xanpataus tsi tseemceeb, puab nyam pe puab tej mlom heev dlua.

¹⁷“Tabsis kuv hlub puab heev. Kuv txhaj tsi tua kuas puab tuag rua nraag taj suabpuam.

¹⁸Kuv ntuag cov Yixalayees tej hluas le nuav: Mej tsi xob xyum coj lawv le mej cov yawmkoob tau ua lug lawm; tsi xob coj lawv le puab tej kevlig kevcai lossis pe puab tej mlom kws ua rua mej tsi huv.

¹⁹Kuv yog tug TSWV kws yog mej tug Vaajtswv. Mej yuavtsum ua lawv le kuv tej kevcai hab tej lug saamfwm.

²⁰Muab nub Xanpataus ua nub dlawbhuv, qhov ntawd yuav ua lub cim rua peb tej lug cog tseg, hab yuav ua rua mej ncu ntsoov has tas kuv yog tug TSWV kws yog mej tug Vaajtswv.

²¹“Tabsis cov tuabneeg kws nyob tam ntawd ntxeev sab rua kuv. Puab rhuav kuv tej kevcai hab tsi ua lawv le kuv tej lug saamfwm kws pub tau txujsa rua tug kws ua lawv le ntawd. Thaus puab tseem nyob nraag taj suabpuam, puab saib nub Xanpataus tsi tseemceeb, kuv txujkev chim tub yuav ua rua puab raug kev puamtsuaj.

²²Tabsis kuv tsi ua le ntawd, yog kuv ua le ntawd, cov tuabneeg kws pum ntsoov kuv coj cov Yixalayees tsiv tawm huv tebchaws Iziv lug, yuav txobthuam kuv lub npe.

²³Kuv txhaj coglug dlua rua puab nyob nraag taj suabpuam has tas, kuv yuav lawv kuas puab moog nyob ri sua thoob plawg nplajteb.

²⁴Kuv ua le ntawd, rua qhov puab rhuav kuv tej kevcai hab tsi coj lawv le kuv tej lug saamfwm, puab saib nub Xanpataus tsi tseemceeb, hab puab pe tej mlom kws puab cov yawmkoob tau pe lug lawm.

²⁵“Kuv txhaj muab tej kevcai kws tsi zoo hab tej lug saamfwm kws cawm tsi tau txujsa rua puab.

²⁶Kuv ca puab fij tej khoom kws ua rua puab tsi huv, hab ca puab muab puab cov tub hlub tua fij. Qhov ntawd yog kev rau txim kuas puab paub has tas, kuv yog tug TSWV.

²⁷“Tub noobneej, koj ca le moog has tug TSWV kws kaav ib puas tsaav yaam tej lug rua cov Yixalayees le nuav: qhov kws puab cov yawmkoob tsi muab sab npuab kuv, ua rua kuv poob ntsejmuag heev.

²⁸Kuv coj puab lug rua huv lub tebchaws kws kuv tau coglug tseg has tas yuav muab rua puab. Tabsis thaus puab pum tej roob sab hab tej ntoo kws muaj nplooj tsaus nti, puab tua tsaj fij rua tej ntawd. Qhov kws puab tua tsaj hlawv fij hab muab cawv txiv maab fij le ntawd ua rua kuv chim heev rua puab.

²⁹Kuv nug puab has tas, tej chaw sab kws mej moog ntawd yog dlaabtsi? Puab txhaj hu tej chaw ntawd has tas ‘Chaw Sab’ lug txug naj nub nua.

³⁰Nwgnuav koj ca le moog has kuv tej lug rua cov Yixalayees le nuav: Vim le caag mej ua tej kev txhum kws mej cov yawmkoob ua, hab pe puab tej mlom?

³¹Txawm yog nwgnuav los mej tseem muab khoom hab muab mej tej mivnyuas tua hlawv fij rua mlom hab ua rua mej tsi huv ib yaam le mej cov yawmkoob. Mej cov Yixalayees tseem nug has tas, kuv nyam le caag! Kuv yog tug TSWV kws kaav ib puas tsaav yaam hab yog Vaajtswv tug kws muaj sa nyob, kuv yuav tsi pub mej nug ib yaam dlaabtsi le.

³²Mej xaav has tas mej yuav ua kuas mej zoo ib yaam le lwm tsaav tuabneeg hab zoo ib yaam le cov tuabneeg kws nyob rua lwm lub tebchaws kws pe tej ntoo hab tej pobzeb. Tabsis mej yuav ua tsi tau le ntawd.”

³³“Kuv yog tug TSWV kws kaav ib puas tsaav yaam hab yog Vaajtswv tug kws muaj sa nyob, kuv has rua mej has tas thaus kuv chim, kuv yuav siv kuv txhais teg hab kuv lub fwjchim kws luj kawg nkaus tswj mej.

³⁴Thaus kuv coj mej tawm huv cov tebchaws kws kuv ntab mej moog nyob ua saab ua sua rov lug, kuv yuav qha kuv lub fwjchim hab kuv txujkev chim rua mej.

³⁵Kuv yuav coj mej moog rua ntawm ‘Lub taj suabpuam ntau Tsaav Tuabneeg’ hab kuv yuav rau txim rua mej tim ntsej tim muag qhov ntawd.

³⁶Tug TSWV kws kaav ib puas tsaav yaam has tas, kuv yuav rau txim rua mej ib yaam le kuv rau txim rua mej cov yawmkoob nraag taj suabpuam Xinais.

³⁷“Kuv yuav tswj mej nruj heev, hab ua kuas mej fwm kuv tej lug cog tseg.

³⁸Kuv yuav tshem cov tuabneeg ntxeev sab hab cov tuabneeg txhum tawm ntawm mej moog. Kuv yuav coj puab tawm huv tej tebchaws kws nwgnuav puab nyob moog, tabsis kuv yuav tsi coj puab rov lug rua huv tebchaws Yixalayees. Mej txhaj yuav paub has tas kuv yog tug TSWV.”

³⁹Tug TSWV kws kaav ib puas tsaav yaam has tas, “Cov Yixalayees, mej ca le moog pe mlom lawv le mej sab nyam! Tabsis kuv has rua mej has tas tom qaab ntawd mej yuavtsum fwm kuv lub npe kws dlawbhuv hab tseg tsi xob fij khoom rua mej tej mlom lawm.

⁴⁰Mej cov Yixalayees yuavtsum pehawm kuv sau kuv lub roob dlawbhuv kws yog cov Yixalayees lub roob sab huv tebchaws nuav. Kuv yuav txaus sab rua mej, hab xaav kuas mej coj tej khoom theej txhoj, tej khoom fij kws zoo tshaaj, hab tej khoom fij kws dlawbhuv tuaj pub rua kuv.

⁴¹Tom qaab kws kuv coj mej tawm huv cov tebchaws kws kuv ntab mej moog nyob ua saab ua sua rov lug nyob ua ke lawm, kuv yuav txais mej tej khoom fij, ces txhua tsaav tuabneeg yuav paub has tas kuv yog tug kws dlawbhuv.

⁴²Thaus kuv coj mej rov lug nyob rua huv lub tebchaws Yixalayees kws kuv tau coglug tseg has tas, kuv yuav muab rua mej cov yawmkoob, ces mej yuav paub has tas kuv yog tug TSWV.

⁴³Mej yuav ncu txug tej kev poob ntsejmuag hab tej kev phem kev qas kws ua rua mej tsi huv. Mej yuav ntxub mej vim tej kev txhum kws mej ua taag lug lawm.

⁴⁴Cov Yixalayees, mej yuav paub has tas kuv yog tug TSWV, thaus kuv nrug mej has, kuv tsi has lawv le mej teg num phem hab mej tej kev phem kev qas kws mej ua, rua qhov kuv yog tug TSWV kws dlawbhuv.” Tug TSWV kws kaav ib puas tsaav yaam has le ntawd.

⁴⁵Tug TSWV has rua kuv tas:.

⁴⁶“Tub noobneej, koj ca le saib moog rua saab qaabteb, koj ca le tshev saab qaabteb hab cevlug tshev thaaj haav zoov kws nyob saab qaabteb!

⁴⁷Koj has kuas thaaj haav zoov kws nyob saab qaabteb noog tug TSWV kws kaav ib puas tsaav yaam tej lug kws has le nuav: Mej saib! Kuv taabtom tis suavtawg hlawv txhua tsob ntoo, tsi has tej ntoo qhuav lossis ntoo nyoog huv mej. Tsi muaj ib yaam kws yuav tua tau cov suavtawg ntawd le. Suavtawg yuav kub saab qaabteb ti nkaus saab qaumteb, ces txhua tug yuav nov suavtawg kub ntaiv fwv.

⁴⁸Puab txhua tug yuav paub has tas kuv yog tug TSWV kws tis suavtawg hlawv puab hab yuav tsi muaj leejtwg tua tau cov suavtawg ntawd.”

⁴⁹Tabsis kuv thov has tas, “Tug TSWV kws kaav ib puas tsaav yaam, thov tsi xob ca kuv ua tej nuav! Rua qhov txhua tug yuav ywg has tas, nwg ibtxwm has tau xwb nwg ua tsi tau.”