Read Hmong Njua Exekees 22 Bible Online

Exekees 22 - Hmong Njua bible

Exekees 22

¹Tug TSWV has rua kuv tas:.

²“Tub noobneej, koj npaaj txav txim rua lub nroog Yeluxalees kws tua tuabneeg lawm los? Koj ca le qha kuas nwg paub tej kev phem kev qas kws nwg tau ua lawm.

³Kuv yog tug TSWV kws kaav ib puas tsaav yaam, koj ca le qha kuv tej lug rua lub nroog has tas, ‘Vim koj tau tua koj cov tuabneeg ntau tug hab pe mlom ua rua koj tsi huv, koj lub sijhawm kawg tub lug txug lawm!

⁴Qhov kws koj tua tuabneeg ua rua koj muaj txim, hab qhov kws koj pe mlom ua rua koj tsi huv. Koj nub kawg lug txug hab koj lub sijhawm tub taag lawm! Kuv txhaj ca lwm tsaav tuabneeg txobthuam hab saib tsi taug koj.

⁵Tej tebchaws nyob dleb hab nyob ze los saib tsi taug koj, rua qhov koj tsi ua lawv le kuv tej kevcai.

⁶Yixalayees cov thawjcoj tso sab rua puab tug zug hab puab tua tuabneeg.

⁷Cov tuabneeg kws nyob huv koj, tsi muaj ib tug fwm nam fwm txiv le. Koj dlaag ntxag cov tuabneeg txawv tebchaws, txhaav cov puj ntsuag hab tej mivnyuas ntsuag tug.

⁸Koj tsi fwm kuv tej chaw dlawbhuv hab saib nub Xanpataus tsi tseemceeb.

⁹Koj cov tuabneeg muaj qee leej dlaag kuas luas muab lwm tug tua povtseg. Qee leej noj tej khoom kws fij rua mlom. Hab qee leej ua kev nkauj kev nraug.

¹⁰Qee leej nrug nwg txiv tug nam tshab pw, qee leej yuam tej quaspuj thaus tseem coj khaub dluag.

¹¹Qee leej ua kev nkauj kev nraug hab qee leej ntxag nwg tug nyaab lossis nwg tug muam kws tsi koom nam.

¹²Koj cov tuabneeg qee leej ca luas ndlav nwg moog tua tuabneeg. Qee leej qev nyaj hab tsub paajlaum ntau rua nwg cov kwvtij Yixalayees them, nwg npluanuj vim txeeb luas tug. Puab cov ntawd tsi ncu txug kuv lawm.’ ” Tug TSWV kws kaav ib puas tsaav yaam has le ntawd.

¹³“Kuv yuav tsaa kuv txhais teg ntaus koj cov tuabneeg kws ua tubsaab hab tua tuabneeg.

¹⁴Tom qaab kws kuv rau txim rua koj lawm, koj xaav has tas leejtwg tseem muaj zug hab tsaa taug npaab? Kuv yog tug TSWV kws has le ntawd. Kuv yuav ua lawv le kuv has.

¹⁵Kuv yuav ntab mej tsiv moog nyob rua ntau lub tebchaws hab nyob xyaw lwm tsaav tuabneeg, hab yuav ua kuas mej tej kev phem kev qas pluj moog.

¹⁶Hab luas lwm tsaav tuabneeg yuav tsi fwm mej, mej txhaj yuav paub has tas, kuv yog tug TSWV.”

¹⁷Tug TSWV has rua kuv tas:

¹⁸“Tub noobneej, cov Yixalayees tsi muaj nqes rua kuv lawm. Puab zoo le tej quav tooj lab, tooj dlawb, hlau, txhuas hab nyaj kws luas cais tawm huv yeejvub lug lawm xwb.

¹⁹Yog le ntawd, kuv yog tug TSWV kws kaav ib puas tsaav yaam has tas, puab muaj nqes le tej ntawd lawm xwb. Kuv yuav coj puab ua ke lug rua huv lub nroog Yeluxalees

²⁰ib yaam le tug tuabneeg kws muab nyaj, tooj lab, hlau, txhuas hab tooj dlawb lug tso rua huv lub yeejvub. Kuv txujkev chim yuav kub kuas puab yaaj taag ib yaam le suavtawg kub tej ntawd.

²¹Kuv yuav sau puab lug nyob rua huv lub nroog Yeluxalees, kuv txujkev chim yuav ua cubtawg hlawv kuas puab yaaj taag.

²²Puab yuav raug tug TSWV txujkev chim kws luj kawg nkaus. Puab yuav yaaj taag rua huv lub nroog Yeluxalees ib yaam le tej nyaj kws yaaj rua huv lub yeejvub.”

²³Tug TSWV rov has rua kuv tas:

²⁴“Tub noobneej, koj has rua cov Yixalayees has tas, puab lub tebchaws tsi huv lawm, kuv yuav rau txim rua puab lug ntawm kuv txujkev chim.

²⁵Cov thawjcoj ntawd zoo ib yaam le cov tsuv ntxhuav kws nyooj quas lawg rua tej tsaj kws puab tum tau. Puab tua tuabneeg, fuab luas tej nyaj hab tej khoom kws muaj nqes, hab puab tua tuabneeg ua rua muaj puj ntsuag coob heev.

²⁶Cov povthawj rhuav kuv tej kevcai hab ua rua kuv tej khoom dlawbhuv tsi huv lawm. Puab tsi cais has tas yaam twg dlawbhuv hab yaam twg tsi dlawbhuv. Puab tsi qha qhov txawv ntawm yaam kws huv hab yaam kws tsi huv rua suavdlawg paub. Hab puab saib nub Xanpataus tsi tseemceeb. Qhov tseemceeb yog cov Yixalayees tsi fwm kuv.

²⁷Cov numtswv zoo ib yaam le tej maa kws muab tej tsaj kws puab tum tau dlua ib thooj rua ib qho. Puab tua tuabneeg ua kuas puab muaj txag npluanuj.

²⁸Cov cevlug muab kev txhum npog tseg ib yaam le tuabneeg muab moov sib dlawb pleev phaab ntsaa. Puab pum tej ywgtoog cuav hab pav tej lug qha tshwm tsi tseeb. Puab khaav has tas yog puab has tug TSWV kws kaav ib puas tsaav yaam tej lug. Tabsis kuv kws yog tug TSWV tsi tau has rua puab le.

²⁹Cov tuabneeg npluanuj fuab hab nyag luas le. Puab quab yuam cov tuabneeg pluag hab txhaav cov tuabneeg txawv tebchaws tug.

³⁰Kuv nrhav puab cov ntawd ib tug kws txawj khu phaab ntsaa, hab sawv nreg nroog ntawm saab phaab ntsaa kws puag lawm, tiv thaiv lub tebchaws kuas kuv txujkev chim tsi xob rhuav lub tebchaws, tabsis kuv nrhav tsi tau ib tug le.

³¹Yog le ntawd, kuv txhaj ca kuv txujkev chim lug raug puab, kuas puab puamtsuaj taag ib yaam le suavtawg hlawv, vim puab tau ua kev phem kev qas.” Tug TSWV kws kaav ib puas tsaav yaam has le ntawd.