Read Hmong Njua Exekees 23 Bible Online

Exekees 23 - Hmong Njua bible

Exekees 23

²“Tub noobneej, muaj ob vivncaug kws koom ib leeg nam;

³thaus obtug nyavnyuas tav nkauj nyob huv tebchaws Iziv, obtug moog ua namndlav ua rua obtug lub cev nkaujxwb puag lawm.

⁴Tug taislaug npe hu ua Auhulas, (nwg pev txug lub nroog Xamalis) nwg tug nam hluas npe hu ua Auhulinpas (nwg pev txug lub nroog Yeluxalees). Kuv yuav obtug ua kuv quaspuj huv tuabsi, hab obtug puavleej yug tubki rua kuv.

⁵Auhulas yog kuv tug quaspuj, tabsis nwg pheej moog ua namndlav nrug nwg cov hluas nraug kws tuaj peg tebchaws Axilias tuaj.

⁶Cov hluas nraug ntawd, yog cov tubrog kws naav tej tsoog tsho ntaub maag xav, puab yog numtswv hab thawj tubrog qeb sab; puab puavleej caij neeg, puab hluas hab zoo nraug heev.

⁷Auhulas pheej ua namndlav rua cov tubrog Axilias hab qaug rua kev nkauj kev nraug, nwg txhaj moog pe cov Axilias tej mlom ua rua nwg tsi huv lawm.

⁸Nwg pheej ua namndlav ib yaam le thaus nwg tseem nyob nraag tebchaws Iziv kws nwg ua rua nwg lub cev nkaujxwb puag. Thaus nwg tseem yog nkaujxwb, tub muaj txivneej tuaj nrug nwg pw ib yaam le tug namndlav lawm.

⁹Kuv txhaj muab nwg cob rua nwg cov hluas nraug Axilias kws nwg nyam heev.

¹⁰Puab muab nwg hle labqaab hab txeeb nwg tej tub tej ntxhais coj moog, hab rhu ntaaj tua nwg. Tej quaspuj nyob rua txhua qhov sis ntxhi zum zawg has txug nwg txuj moov phem.

¹¹“Auhulinpas kws yog nwg tug nam hluas pum ntsoov tej nuav los nwg tseem ua namndlav heev dlua Auhulas kws yog nwg tug taislaug lawm hab.

¹²Nwg xaav ua namndlav rua cov Axilias tej numtswv hab tej thawj tubrog kws naav tej tsoog tsho ci plaag. Puab cov ntawd puavleej caij neeg, puab hluas hab zoo nraug heev.

¹³Kuv pum has tas Auhulinpas ua txhum kev nkauj kev nraug heev, hab nwg tug taislaug los ua ib yaam le nwg.

¹⁴‘Auhulinpas ua namndlav heev zuj zug. Nwg qaug sab rua cov Npanpiloos cov thawj tubrog tej dluab kws luas txaug rua ntawm tej phaab ntsaa kws zaas lab ci nplaag, sa hlaab ntawm tej dluav hab khi tej pluaj ntaub txaij nraug zeeg rua sau taubhau.

¹⁵

¹⁶Thaus nwg pum dlheev cov dluab ntawd, nwg lub sab qaug lais rua kev nkauj kev nraug hab tso xuv moog rua cov tubrog Npanpiloos.

¹⁷Cov tubrog Npanpiloos tuaj nrug nwg pw. Puab ua rua nwg lub cev tsi huv, thaus kawg nwg txhaj moog nrug puab ua phem ua qas.

¹⁸Auhulinpas labqaab qha rua txhua tug paub has tas nwg yog namndlav. Kuv dlhuav nwg ib yaam le kuv dlhuav nwg tug taislaug hab.

¹⁹Nwg moog ua namndlav heev dlua yaav taag lug, nwg coj tug yaam ntxwv ib yaam le thaus nwg tseem yog ntxhais hluas kws nwg ua namndlav nyob nraag tebchaws Iziv.

²⁰Nwg xaav ua namndlav rua cov txivneej kws muaj zug ib yaam le tej txiv neeg luav lossis txiv neeg xob.’

²¹(Auhulinpas, koj xaav rov moog ua namndlav le qub kws thaus koj tseem yog ntxhais hluas nyob nraag tebchaws Iziv kws koj ca tej txivneej tuaj kov koj ob lub mig hab ua rua koj cev nkaujxwb puag.)

²²“Kuv yog tug TSWV kws kaav ib puas tsaav yaam has rua Auhulinpas le nuav: ‘Koj zug ntaug taag rua koj cov hluas nraug lawm, tabsis kuv yuav ua kuas puab chim heev rua koj, hab kuv yuav coj puab tuaj vij koj.

²³Kuv yuav coj cov Npanpiloos, cov Khalede-aas, cov Pekaus, cov Sau-as, cov Kau-as hab cov Axilias tuaj. Kuv sau cov numtswv hab cov thawj tubrog hluas kws zoo nraug heev tuaj. Taagnrho cov numtswv nuav puavleej caij neeg hab muaj meejmom sab.

²⁴Puab yuav coj tubrog coob, coj tsheb ua rog hab tsheb thauj khoom tuaj saab qaumteb tuaj tua koj. Puab muaj tej thaiv nav ntaaj hab mom hlau. Puab yuav tuaj vij koj. Kuv yuav muab koj cob rua puab, hab puab yuav txav txim rua koj lawv le puab txuj kevcai.

²⁵Kuv chim heev rua koj, kuv txhaj ca puab tuaj ua rua koj lawv le puab txujkev chim. Puab yuav txav koj lub taubntswg, ob lub nploojntseg, hab tua koj cov mivnyuas povtseg. Puab yuav coj koj tej tub tej ntxhais moog hlawv caj.

²⁶Puab yuav chua koj tej khaub dluag hab txeeb koj tej saw nyaj saw kub.

²⁷Kuv yuav ua kuas koj tso plhuav koj txujkev ua nkauj ua nraug hab kev ua namndlav le koj pheej ua nyob nraag tebchaws Iziv tseg. Koj yuav tsi tsaa qhovmuag saib tej mlom lossis xaav txug lub tebchaws Iziv ntxiv lawm.’ ”

²⁸Tug TSWV kws kaav ib puas tsaav yaam has le nuav: “Kuv yuav muab koj cob rua cov tuabneeg kws koj ntxub hab cov tuabneeg kws koj dlhuav.

²⁹Puab ntxub koj heev, puab yuav txeeb txhua yaam kws koj khwv tau moog, ca koj nyob labqaab rua luas pum le tug namndlav. Koj txujkev ua nkauj ua nraug hab ua namndlav,

³⁰coj tej nuav lug raug koj. Koj ua namndlav rua ntau tsaav tuabneeg hab pe mlom ua rua koj tsi huv lawm.

³¹Koj ua lawv le koj tug taislaug, yog le ntawd kuv yuav muab lub khob kws nwg haus lawm rua koj haus hab.”

³²Tug TSWV kws kaav ib puas tsaav yaam has tas, “Koj yuav haus koj tug taislaug lub khob; lub khob ntawd luj hab tub heev. Txhua tug yuav thuam hab luag koj plig; lub khob ntawd puv kawg le.

³³Lub khob ntawd yuav ua rua koj qaug hab txomnyem heev, yog lub khob kev ntshai hab kev puag ntsoog yog koj tug taislaug Xamalis lub khob ntaag.

³⁴Koj yuav haus khee kawv huv qaab khob, lub khob tawg hab tej txhais yuav hlais koj ob lub mig. Kuv yog tug TSWV kws kaav ib puas tsaav yaam has le ntawd.”

³⁵Tug TSWV kws kaav ib puas tsaav yaam has le nuav, “Rua qhov koj tsi ncu qaab kuv hab tig nrausqaum rua kuv, koj txhaj raug kev txomnyem, vim koj ua kev nkauj kev nraug hab ua namndlav.”

³⁶Tug TSWV has rua kuv tas, “Tub noobneej, koj npaaj txav txim rua Auhulas hab Auhulinpas lawm los? Koj ca le nthuav tej kev phem kev qas kws obtug tau ua lawm.

³⁷Obtug ua kev nkauj kev nraug hab tua tuabneeg, ua nkauj ua nraug nrug tej mlom hab tua tej mivnyuas kws obtug yug rua kuv fij rua tej mlom.

³⁸Tsi taag le ntawd xwb, obtug tseem ua rua kuv lub Tuamtsev tsi dlawbhuv hab saib kuv nub Xanpataus tsi tseemceeb.

³⁹Txhua nub kws obtug tua kuv tej mivnyuas fij rua tej mlom, obtug ua tsi huv rua kuv lub Tuamtsev!

⁴⁰“Obtug tso xuv tsi tseg moog caw tej txivneej kws nyob dleb heev, ces puab txawm tuaj. Ob vivncaug moog dlaa dlej, zaas tawv muag hab muab saw nyaj saw kub lug coj.

⁴¹Obtug nyob ntawm lub rooj kws zoo heev, muaj ib lub rooj kws rau tej tshuaj tsw qaab, hab roj txiv ntoo kws kuv muab rua obtug nyob ntawm obtug hauv ntej.

⁴²Muaj ib paab tuabneeg sis thaam ntshu nrooj puagncig obtug. Puab yog ib paab txivneej kws tuaj tom taj suabpuam tuaj. Puab nqaa paugteg tuaj looj rua ob vivncaug ntawd ncej npaab hab muab mom kub kws zoo nkauj heev rua obtug ntoo.

⁴³Kuv xaav has tas, luas siv ob vivncaug ntawd ua namndlav, txhaj ua rua obtug lub cev puag taag rua kev nkauj kev nraug.

⁴⁴Cov txivneej ntawd naj nub rov tuaj cuag ob tug namndlav ntawd. Puab pheej tuaj cuag Auhulas hab Auhulinpas kws nyam ua nkauj ua nraug heev ntawd.

⁴⁵Cov tuabneeg ncaaj nceeg yuav rau txim rua obtug, rua qhov obtug ua kev nkauj kev nraug hab tua tuabneeg. Obtug ua nkauj ua nraug hab teg lu ntshaav.”

⁴⁶Tug TSWV kws kaav ib puas tsaav yaam has tas, “Ca le coj ib paab tuabneeg tuaj fuab hab txeeb obtug tej khoom.

⁴⁷Ca paab tuabneeg ntawd muab pobzeb ntaus obtug, muab ntaaj tua obtug hab tua obtug cov mivnyuas hab hlawv obtug tej vaaj tse huv tuabsi.

⁴⁸Kuv yuav txwv tsi pub tuabneeg ua kev nkauj kev nraug thoob tebchaws, hab ntuag txhua tug quaspuj kuas tsi xob ua kev nkauj kev nraug le obtug ua.

⁴⁹Kuv yuav rau txim rua meb ob vivncaug, vim meb tau ua kev nkauj kev nraug hab pe tej mlom. Meb txhaj yuav paub has tas kuv yog tug TSWV kws kaav ib puas tsaav yaam.”