Read Hmong Njua Exekees 24 Bible Online

Exekees 24 - Hmong Njua bible

Exekees 24

¹Lub kaum hli ntuj nub xab kaug, xyoo cuaj kws peb raug nteg moog, tug TSWV has rua kuv tas:

²“Tub noobneej, koj ca le teev nub nua ca, rua qhov nub nua yog nub kws vaajntxwv Npanpiloos tuaj vij lub nroog Yeluxalees.

³Koj ca le qha tug TSWV kws kaav ib puas tsaav yaam tej lug pevtxwv rua puab le nuav: Ca le muab lub laujkaub txawb rua huv qhovcub hab laub dlej rua.

⁴Muab cov nqaj kws zoo tshaaj plawg kws yog thooj pwgpu hab thooj ncej puab tso rua huv; xaiv tej pobtxhaa kws zoo tso rua huv hab.

⁵Xaiv cov nqaj yaaj kws zoo heev tso rua huv; muab tawg lug rauv rua huv qaab lub laujkaub ntawd. Ca kuas cov dlej npau; tsawg cov pobtxhaa hab cov nqaj.”

⁶Tug TSWV kws kaav ib puas tsaav yaam has tas: “Lub nroog kws tua tuabneeg raug puamtsuaj lawm! Nwg zoo le lub laujkaub xeb kws ibtxwm tsi ntxuav le. Luas muab cov nqaj huv lub laujkaub npu ib dlaim zuj zug tsi tshuav ib dlaim seem le.

⁷Lub nroog tua tuabneeg tsi muab tej ntshaav laub rua huv aav kuas cov moov aav npug tej ntshaav; tabsis nwg muab laub rua sau lub pobzeb.

⁸Kuv tseg cov ntshaav ntawd nyob rua sau lub pobzeb, tsi muab dlaabtsi npug le, kuas kuv txujkev chim txhaj tau ua pauj rua nwg.”

⁹Tug TSWV kws kaav ib puas tsaav yaam has le nuav: “Lub nroog kws tua tuabneeg puamtsuaj lawm! Kuv yuav sau tawg ntau heev lug teeb tseg.

¹⁰Ca le nqaa tawg lug ntxiv! Ntxuaj kuas cubtawg cig! Tsawg cov nqaj kuas muas, muab dlu xyaw txumlom! Muab cov pobtxhaa hlawv kuas kub nyab taag.

¹¹Ca le muab lub laujkaub tooj tso rua sau cov ncaig tawg kuas kub heev. Thaus cov xeb nti taag lawm lub laujkaub txhaj rov huv,

¹²txawm ua le ntawd los cov xeb kws khub lub laujkaub yuav nti tsi taag.

¹³Yeluxalees, koj txujkev ua nkauj ua nraug ua rua koj lub cev tsi huv lawm. Txawm yog kuv ntxuav los koj yeej tsi huv. Koj yuav tsi huv moog txug thaus koj raug kuv txujkev chim kws luj kawg nkaus.

¹⁴Kuv kws yog tug TSWV has le nuav: Lub sijhawm txav txim lug txug lawm. Kuv yuav tsi tseg hab tsi taabncuab koj le. Koj yuav raug txim lawv le tej kev txhum kws koj tau ua lawm.” Tug TSWV kws kaav ib puas tsaav yaam has le ntawd.

¹⁵Tug TSWV has rua kuv tas:

¹⁶“Tub noobneej, kuv tshuab ib paas xwb, ua rua tug kws koj hlub heev yaa moog rua lwm qhov lawm. Tsi pub koj ywg, quaj lossis poob ib lub kua muag le.

¹⁷Tsi pub kuas koj lub suab nca rua leejtwg nov. Ca le ntoo phuam hab rau khau, luas txhaj tsi paub has tas koj quaj ntsuag. Tsi xob npug koj lub ntsejmuag lossis noj tej zaub mov kws cov tuabneeg quaj ntsuag noj.”

¹⁸Thaus sawv ntxuv kuv tseem nrug cov tuabneeg suavdlawg thaam. Thaus tsaus ntuj, kuv tug quaspuj tuag lawm, ces nub tom qaab kuv txawm ua lawv le tug TSWV has rua kuv.

¹⁹Tej tuabneeg nug kuv has tas, “Vim le caag koj txhaj ua le nuav?”

²⁰Kuv teb puab has tas, “Tug TSWV has rua kuv kuas

²¹has rua mej cov Yixalayees le nuav: ‘Mej khaav has tas lub Tuamtsev ua rua mej muaj fwjchim. Mej nyam tuaj saib, tabsis tug TSWV yuav ua kuas nwg lub Tuamtsev tsi huv. Ces cov hluas huv mej tej tsev tuabneeg kws tseem nyob huv lub nroog Yeluxalees yuav raug tua tuag taag rua huv tshaav rog.

²²Thaus ntawd mej yuav ua le kuv ua. Mej yuav tsi muab ntaub npug mej lub ntsejmuag hab yuav tsi noj tej zaub mov kws cov tuabneeg quaj ntsuag noj.

²³Mej yuav ntoo phuam hab rau khau, mej tsi xob quaj lossis nyav. Mej yuav puamtsuaj taag vim mej tej kev txhum, hab mej ib leeg yuav nroo rua ib leeg.

²⁴Kuv yog Exekees, kuv ua lub cim rua mej ntaag; mej yuav ua txhua yaam lawv le kuv ua. Tug TSWV has tas thaus tej nuav tshwmsim lawm, mej txhaj yuav paub has tas kuv yog tug TSWV kws kaav ib puas tsaav yaam.’ ”

²⁵Tug TSWV has tas, “Tub noobneej, kuv yuav tshem lub Tuamtsev kws puab khaav has tas ua rua puab muaj fwjchim hab nyam tuaj saib ntawd, hab puab tej tub tej ntxhais moog huv tuabsi.

²⁶Nub ntawd yuav muaj qee leej dlim kev puamtsuaj lug qha tej ntawd rua koj.

²⁷Nub ntawd koj yuav rov has tau lug rua tug kws dlim lug ntawd, koj yuav tsi nyob ntsag tu lawm. Koj yuav ua lub cim rua tej tuabneeg suavdlawg, puab txhaj yuav paub has tas kuv yog tug TSWV.”