Read Hmong Njua Exekees 25 Bible Online

Exekees 25 - Hmong Njua bible

Exekees 25

¹Tug TSWV has rua kuv tas:.

²“Tub noobneej, koj ca le cevlug tshev cov Amoos.

³Koj has kuas puab ca le noog tug TSWV kws kaav ib puas tsaav yaam tej lug: ‘Mej zoo sab qhov kws luas ua tsi huv rua kuv lub Tuamtsev, cov Yixalayees lub tebchaws ua suabpuam, hab cov Yudas raug luas nteg moog.

⁴Vim mej zoo sab le ntawd, kuv yuav ca cov tuabneeg kws nyob saab nubtuaj tuaj tua yeej mej. Puab yuav tuaj tsuam yeej tubrog hab nyob huv mej lub tebchaws. Puab yuav tau noj mej tej txiv maab hab haus mej tej kua mig nyuj.

⁵Kuv yuav muab lub nroog Lanpas hloov ua chaw kaw ntxhuav, hab muab lub tebchaws Amoos ua chaw kaw yaaj, mej txhaj yuav paub has tas kuv yog tug TSWV.

⁶“ ‘Tug TSWV kws kaav ib puas tsaav yaam has le nuav: “Mej npuaj teg hab dlha paaj pawg zoo sab heev. Mej saib tsi taug cov Yixalayees lub tebchaws.

⁷Vim mej ua le ntawd, kuv yuav muab mej cob rua lwm tsaav tuabneeg, ca luas tuaj fuab hab txeeb mej tug. Kuv yuav rhuav kuas mej tu noob hab ua tsi tau ib tsaav tuabneeg lossis ib lub tebchaws. Mej txhaj paub has tas, kuv yog tug TSWV.” ’ ”

⁸Tug TSWV kws kaav ib puas tsaav yaam has tas, “Vim cov Mau-am has tas, cov Yudas tsuas zoo le lwm tsaav tuabneeg xwb,

⁹yog le ntawd, kuv yuav ca luas tuaj tua cov nroog kws tiv thaiv cov Mau-am tug nrimteb, cov nroog ntawd yog: Npethes Yesimaus, Npa-aas Me-oos hab Kili-athayees.

¹⁰Kuv yuav ca cov tuabneeg kws nyob saab nubtuaj tuaj tua yeej cov Mau-am hab cov Amoos, kuas cov Mau-am ua tsi tau ib tsaav tuabneeg ntxiv lawm.

¹¹Kuv yuav rau txim rua cov Mau-am, puab txhaj yuav paub has tas kuv yog tug TSWV.”

¹²Tug TSWV kws kaav ib puas tsaav yaam has tas, “Vim cov Edoos ua nruj ua tsiv pauj rua cov Yudas, ces thaus kawg lub txim txhaj lug raug rua cov Edoos.

¹³Kuv has rua suavdlawg paub has tas, kuv yuav rau txim rua cov Edoos hab tua txhua tug tuabneeg hab tej tsaj kuas tuag taag huv tuabsi. Kuv yuav ua kuas puab lub tebchaws ua suabpuam, txij ndlua ntawm lub nroog Temas moog txug ndlua rua lub nroog Dedaas, hab tej tuabneeg yuav raug tua tuag rua huv tshaav rog.

¹⁴Kuv yuav ca kuv tsaav tuabneeg Yixalayees ua pauj cov Edoos rua kuv hab puab yuav ua rua cov Edoos lawv le kuv txujkev chim. Cov Edoos txhaj yuav paub has tas kuv txujkev rau txim nyaav npaum le caag.” Tug TSWV kws kaav ib puas tsaav yaam has le ntawd.

¹⁵Tug TSWV kws kaav ib puas tsaav yaam has tas, “Tub noobneej, cov Filitees ua nruj ua tsiv pauj rua cov tuabneeg kws ibtxwm yog puab cov yeebncuab, puab txhaj muab cov tuabneeg kws puab ntxub rhuav puamtsuaj taag.

¹⁶Yog le ntawd, kuv txhaj has tas, kuv yuav ua kuas cov Filitees tu noob nrho. Kuv yuav ua rua cov kws seem nyob huv lub taj nraag Filitees kuas puamtsuaj huv tuabsi.

¹⁷Kuv yuav rau txim nyaav pauj rua puab kuas txaus nkaus. Puab yuav raug kuv txujkev chim. Puab txhaj paub has tas kuv yog tug TSWV.”