Read Hmong Njua Exekees 26 Bible Online

Exekees 26 - Hmong Njua bible

Exekees 26

¹Lub hlis ntawd nub xab ib, xyoo kaum ib kws peb raug nteg moog, tug TSWV has rua kuv tas:

²“Tub noobneej, cov tuabneeg huv lub nroog Tiles qw zoo sab has tas, ‘Yeluxalees puamtsuaj lawm! Nwg tej kev laag kev luam tu lawm! Nwg yuav tsi nrug peb sis tw lawm!’

³“Kuv kws yog tug TSWV kws kaav ib puas tsaav yaam has le nuav: Lub nroog Tiles, kuv yog koj tug yeebncuab ntaag. Kuv yuav coj ntau tsaav tuabneeg tuaj tua koj, puab yuav tuaj ib yaam le tej nthwv dlej havtxwv nphau.

⁴Puab yuav tuaj rhuav tug ntsaa yeej kws thaiv mej lub nroog hab tsoo mej tej chaw tsomfaaj kuas pob taag. Kuv yuav cheb tej moov aav kuas dlu lug tsuas tseg lub pobzeb ca xwb.

⁵Cov tuabneeg ntaus ntseg yuav tuaj zab puab tej vaag rua sau lub pobzeb kws nyob huv havtxwv. Kuv yog tug TSWV kws kaav ib puas tsaav yaam has le ntawd. Ntau tsaav tuabneeg yuav tuaj fuab lub nroog Tiles,

⁶hab puab yuav muab ntaaj tua cov tuabneeg huv tej nroog kws nyob huv nwg lub tebchaws. Ces cov Tiles txhaj yuav paub has tas kuv yog tug TSWV.”

⁷Tug TSWV kws kaav ib puas tsaav yaam has tas, “Kuv yuav coj tug vaajntxwv kws muaj fwjchim luj dlua lwm tug vaajntxwv tuaj tua lub nroog Tiles. Tug ntawd yog Vaajntxwv Nenpukajnexales kws kaav tebchaws Npanpiloos. Nwg yuav coj ib paab tubrog coob coob kws muaj neeg, tsheb neeg hab tubrog caij neeg tuaj saab qaumteb tuaj.

⁸Cov tuabneeg huv tej nroog kws nyob huv lub tebchaws ntawd yuav raug tua tuag taag. Cov yeebncuab yuav khawb aav meem kuas nce tau tug ntsaa yeej hab puab muab tej vuag ua dlaim thaiv nav ntaaj tuaj tua mej.

⁹Puab yuav siv cuabyeej tuaj tsoo mej tej ntsaa yeej hab siv tej nqaaj hlau tsoo mej tej chaw tsomfaaj.

¹⁰Puab cov neeg yuav dlha ua plauv tshauv nchu auv nab tuaj voob nkaus mej. Cov neeg hai tsheb lug hlaa tej roojvaag huv lub nroog kws puag taag lawm, tej suab nrov tseeg nkawg ua rua mej tej ntsaa yeej ua zug koog.

¹¹Puab cov tubrog caij neeg yuav dlha tsaus nti huv mej tej kev hab muab ntaaj tua mej cov tuabneeg tuag pawg lug. Mej tej ncej kws luj hab khov yuav raug tsoo qaug taag rua huv aav.

¹²Mej cov yeebncuab yuav fuab mej tej nyaj txag hab txeeb mej tej khoom laag luam. Puab yuav tsoo mej tej ntsaa yeej hab rhuav mej tej vaaj tse kws zoo kuas puag taag. Puab yuav coj tej pobzeb, tej ntoo hab tej roj maab moog pov rua huv havtxwv.

¹³Kuv yuav ua kuas mej tej suab nkauj hab suab nkauj nogncaas ntsag.

¹⁴Kuv tsuas tseg lub pobzeb ca rua cov tuabneeg ntaus ntseg tau zab puab tej vaag xwb. Mej yuav tsi tsim lub nroog ntawd ntxiv lawm. Kuv yog tug TSWV kws kaav ib puas tsaav yaam has le ntawd.”

¹⁵Tug TSWV kws kaav ib puas tsaav yaam has rua lub nroog Tiles has tas: “Thaus luas tuaj tua yeej mej lawm, cov tuabneeg kws nyob lawv ntug havtxwv yuav nov cov tuabneeg kws raug luas tua tej suab quaj, ua rua puab ntshai heev.

¹⁶Taagnrho cov vaajntxwv kws nyob lawv ntug havtxwv yuav nqeg sau puab tej zwmtxwv lug. Puab yuav hle puab tej tsho luj hab tej rig tsho tseg, hab nyob huv aav ua ib ce tshee nyo. Puab ntshai tej xwm phem kws lug raug mej, ua rua puab tswj tsi tau qhov kws puab tshee le.

¹⁷Puab yuav hu zaaj nkauj quaj ntsuag rua mej has tas, Lub nroog kws nto npe tshaaj plawg puamtsuaj lawm! Nwg tej nkoj raug muab tshem tawm huv havtxwv moog lawm. koj hab koj cov tuabneeg kws kaav tej havtxwv, ua rua cov tuabneeg kws nyob lawv ntug havtxwv ntshai kawg le.

¹⁸Nub kws koj swb, ua rua cov tuabneeg kws nyob lawv ntug havtxwv tshee nyo hab puab txhua tug yoob taag, vim tej kev puamtsuaj kws lug raug koj.”

¹⁹Tug TSWV kws kaav ib puas tsaav yaam has tas, “Kuv yuav ua kuas koj nyob dlo cuas le tej nroog kws puag taag tsi muaj tuabneeg nyob lawm. Kuv yuav ca dlej havtxwv lug nyaab koj.

²⁰Kuv yuav xaa koj moog rua huv tubtuag teb, hab nrug cov tuabneeg tam thaus u nyob. Kuv yuav ca koj moog nrug cov tuabneeg tuag huv tubtuag teb nyob xyaw tej kws pob puag taag moog ibtxhis. Vim le ntawd yuav tsi muaj tuabneeg lug nyob huv koj, hab koj yuav tsi tau ua ib lub nroog rua cov tuabneeg caj nyob lawm.

²¹Kuv yuav muab koj ua ib qho pevtxwv kws txaus ntshai heev, nub ntawd yog koj nub kawg. Tuabneeg yuav nrhav koj, tabsis nrhav tsi tau.” Tug TSWV kws kaav ib puas tsaav yaam has le ntawd.