Read Hmong Njua Exekees 27 Bible Online

Exekees 27 - Hmong Njua bible

Exekees 27

¹Tug TSWV has rua kuv tas,

²“Tub noobneej, koj ca le hu ib zaaj nkauj quaj ntsuag rua lub nroog Tiles,

³yog lub nroog kws nyob ntawm ntug havtxwv hab ua laag ua luam nrug cov tuabneeg nyob lawv ntug havtxwv txhua qhov. Koj ca le qha tug TSWV kws kaav ib puas tsaav yaam tej lug rua nwg has tas, Lub nroog Tiles, koj khaav has tas koj zoo nkauj kawg le.

⁴Havtxwv yog koj lub tsev. Cov tuabneeg kws tsim koj, tsim tau koj zoo le lub nkoj kws zoo nkauj heev;

⁵Puab muab ntoo thwjsuab peg Roob Helemoos lug ua ntsaa xov koj, hab coj ntoo cab peg Roob Lenpanoos lug ua koj cov ncej.

⁶Puab coj cov ntoo qheb nraag tebchaws Npasaas lug txua ua dluav; puab coj ntoo cab nraag tebchaws Xaipas lug ua lub saamthaj hab muab kaug ntxhw lug pua.

⁷Puab muab cov ntaub maag zoo heev kws coj nraag tebchaws Iziv lug xaws ua koj dlaim ntaus cua, luas tuaj dleb saib los paub. Koj cov hauvmum yog muab cov ntaub xav kws coj nraag ntug havtxwv Elisas lug xaws vuv.

⁸Koj cov tuabneeg tsaav nkoj tuaj huv lub nroog Xidoos hab Alevas tuaj. Koj cov tuabneeg tsaav nkoj yog cov kws txawj tsaav heev.

⁹Koj cov kws txua ntoo huv nkoj yog cov kws kawm txawj huv lub nroog Nkenpas lug lawm. Cov tuabneeg tsaav nkoj moog rua txhua qhov kws koj ua laag ua luam.

¹⁰“Cov tuabneeg Pawxias, Lidias hab Linpias tuaj ua koj cov tubrog. Puab muab puab tej thaiv nav ntaaj hab mom hlau khuam rua huv koj, kuas koj tau koob meej.

¹¹Cov tubrog Alevas tuaj zuv koj tej ntsaa loog hab cov tuabneeg Nkamas tuaj zuv koj tej chaw tsomfaaj. Puab coj puab tej thaiv nav ntaaj tuaj khuab rua ntawm koj tej phaab ntsaa hab puab yog cov kws tuaj tseev zaam kuas koj zoo nkauj.

¹²“Cov tuabneeg kws nyob Xapees tuaj nrug koj ua luam, puab coj nyaj, hlau, txhuas hab tooj tuaj pauv koj tej khoom laag luam.

¹³Koj ua laag ua luam nrug cov tuabneeg Kilis, Tunpas hab Mesekis. Puab coj tubqhe hab tej twj taig tooj tuaj pauv koj tej khoom laag luam.

¹⁴Cov tuabneeg kws nyob huv tebchaws Npethes Taunkamas coj neeg thauj nraa, neeg caij ntaus rog hab neeg zaag tuaj pauv koj tej khoom laag luam.

¹⁵Cov tuabneeg kws nyob huv Laudi-as los kuj tuaj nrug koj ua laag ua luam; hab cov tuabneeg kws nyob huv tej tebchaws lawv ntug havtxwv coj kaug ntxhw hab ntoo kubtwg tuaj pauv koj tej khoom laag luam ib yaam nkaus.

¹⁶Cov tuabneeg Xilias los kuj tuaj yuav koj tej khoom hab tej yaam kws koj ua tau huv koj lub tebchaws. Puab coj tej qai zeb muaj nqes, ntaub xav, ntaub tsuj, ntaub maag, qai zeb kaulas hab qai zeb av tuaj pauv koj tej khoom laag luam.

¹⁷Cov Yudas hab cov Yixalayees coj moov nplej, zib ntaab, roj txiv ntoo hab roj tsw qaab tuaj pauv koj tej khoom laag luam.

¹⁸Cov tuabneeg Damaxes hab Kilis coj cawv txiv maab huv Helenpoos, hab tej ntaub plaub yaaj huv lub nroog Xahas, hab coj hlau hab roj tsw qaab tuaj pauv koj tej khoom laag luam hab tej yaam kws koj ua tau huv koj lub tebchaws.

²⁰Cov tuabneeg Dedaas, coj ntaub pua eeb neeg tuaj pauv koj tej khoom laag luam.

²¹Cov tuabneeg Alanpias hab cov numtswv huv tebchaws Kedas, coj yaaj, coj mivnyuas yaaj hab coj tshis tuaj pauv koj tej khoom laag luam.

²²cov tuabneeg huv Senpas hab La-amas, coj tej qai zeb muaj nqes, coj kub hab coj txhua yaam roj tsw qaab tuaj pauv koj tej khoom laag luam.

²³Cov tuabneeg huv lub nroog Halaas, Kanes hab Edees tej tub laag tub luam huv Senpas, Asules hab Khilimas, puavleej tuaj nrug koj pauv kev laag kev luam.

²⁴Puab coj tej tsoog tsho ntaub xav, coj ntaub tsuj hab ntaub pua tsev kws txaij zoo nkauj, coj hlua hab legxuv tuaj muag rua koj.

²⁵Cov tuabneeg Talasis tej nkoj thauj khoom laag luam tuaj rua koj. Koj zoo ib yaam le lub nkoj nyob huv havtxwv kws ntim khoom puv nkaus.

²⁶Thaus koj cov tuabneeg nkuam nkoj moog txug ntawm ntug havtxwv, cov cua saab nubtuaj txawm ntsawj koj moog rua tom plawv havtxwv lawm.

²⁷Thaus koj tog rua huv havtxwv lawm, koj tej nyaj txag, tej khoom laag luam cov tuabneeg caij nkoj hab tsaav nkoj, cov kws txua ntoo, cov tub laag tub luam, cov tubrog kws nyob huv nkoj, hab txhua yaam pluj taag rua huv havtxwv.

²⁸Cov tuabneeg huv nkoj tej suab qw ntxhe moog txug rua tim ntug dlej.

²⁹Cov tuabneeg tsaav nkoj, tsaav puab tej nkoj moog rua tim ntug havtxwv, hab txhua tug kws nyob huv nkoj tawm taag rua saab nrau.

³⁰Puab txhua tug quaj hab tu sab heev txug koj, puab tsuab moov aav rua sau taubhau hab quaj dlaa huv qhov tshauv.

³¹Puab chais puab tej plaubhau, hab muab ntaub tsaaj lug npua; puab quaj ab sab kawg le.

³²Puab hu zaaj nkauj quaj ntsuag rua koj has tas: ‘Leejtwg txhaj pev tau lub nroog Tiles kws nwgnuav tub tog rua huv havtxwv lawm?

³³Thaus koj thauj tej khoom huv havtxwv moog, koj ua rua ntau tsaav tuabneeg txaus sab heev. Hab ua rua tej vaajntxwv huv qaab ntuj nuav muaj txag npluanuj lug ntawm koj tej khoom laag luam.

³⁴Nwgnuav koj pob puag taag rua huv havtxwv, koj tog rua huv qaab thu, koj tej khoom hab koj cov tuabneeg ua laag ua luam pluj taag nrug koj rua huv havtxwv lawm.’

³⁵“Txhua tug kws nyob lawv ntug dlej havtxwv yoob taag, vim tej xwm phem kws lug raug koj. Txawm yog puab cov vaajntxwv los yeej ntshai ua ntsejmuag thumxem taag le.

³⁶Koj pluj ndlais lawm, pluj moog ibtxhis le. Tej tub laag tub luam nyob thoob nplajteb ntshai tshee nyo. Puab ntshai nyob tsaam puab raug tej xwm phem kws koj raug.”