Read Hmong Njua Exekees 28 Bible Online

Exekees 28 - Hmong Njua bible

Exekees 28

¹Tug TSWV has rua kuv tas:

²“Tub noobneej, koj ca le has tug TSWV kws kaav ib puas tsaav yaam tej lug rua tug vaajntxwv kws kaav lub nroog Tiles has tas: Koj khaav has tas koj yog vaajtswv, koj nyob sau vaajtswv lub zwmtxwv kws muaj havtxwv nyob puagncig. Koj ua ib yaam le koj yog vaajtswv, tabsis koj yog tuabneeg xwb, koj tsi yog vaajtswv!

³Koj xaav has tas koj ntse tshaaj Danees, tsi muaj ib yaam dlaabtsi kws koj yuav tsi paub le?

⁴Koj lub tswvyim hab kev txawj ntse ua rua koj npluanuj, muaj nyaj muaj kub puv txhaab.

⁵Koj ua laag ua luam ntse heev hab tau paajlaum ntau kawg. Koj khaavtheeb rua koj tej kev npluanuj!

⁶“Yog le ntawd, kuv yog tug TSWV kws kaav ib puas tsaav yaam, kuv has rua koj le nuav: rua qhov koj xaav has tas, koj ntse ib yaam le vaajtswv,

⁷kuv yuav tso cov yeebncuab kws yog tuabneeg txawv tebchaws tuaj tawmtsaam koj. Puab yuav tuaj rhuav txhua yaam khoom zoo kws koj ua tau lug ntawm koj lub tswvyim hab kev txawj ntse.

⁸Puab yuav muab koj pov rua huv tubtuag teb. Koj yuav tuag rua huv plawv havtxwv le tej tuabneeg kws raug luas tua.

⁹Thaus puab yuav tua koj, koj tseem has tas, koj yog vaajtswv hab los? Thaus koj nyob tim ntsej tim muag cov tuabneeg kws tua koj, koj yuav yog tuabneeg xwb, koj tsi yog Vaajtswv.

¹⁰Koj yuav tuag le cov tuabneeg kws tsi ua kevcai txav tuag rua cov tuabneeg txawv tebchaws teg. Kuv yog tug TSWV kws kaav ib puas tsaav yaam has le ntawd.”

¹¹Tug TSWV has rua kuv tas:

¹²“Tub noobneej, koj ca le quaj ntsuag rua tug vaajntxwv kaav lub nroog Tiles kws yuav raug tej xwm phem. Koj ca le has tug TSWV kws kaav ib puas tsaav yaam tej lug rua nwg le nuav: Yaav taag lug koj muaj yaam ntxwv zoo, koj ntse hab zoo nraug kawg le!

¹³Koj nyob huv Edees kws yog Vaajtswv lub vaaj, hab koj naav tej tsoog tsho qai zeb muaj nqes kws yog: kanelis, kixaulais, aunixis, npelis, taupas, yapes, xafiles, nkanes hab emelas. Koj naav kub ci ntsaa ab, tej ntawd yog npaaj tseg rua koj nub kws tsim koj lawm.

¹⁴Kuv tso ib tug qhelunpees zuv koj. Koj nyob sau kuv lub roob dlawbhuv, hab moog moog lug lug ntawm cov pobzeb suavtawg.

¹⁵Koj yeej muaj tug cwjpwm zoo txij thaus kuv tsim koj lug txug rua nub kws koj moog ua kev phem kev qas.

¹⁶Koj ua laag ua luam khwv kawg, qhov ntawd coj koj moog ua txhum kevcai hab poob rua kev txhum. Kuv txhaj ntab koj tsiv tawm sau kuv lub roob dlawbhuv moog, hab tug qhelunpees kws zuv koj los ntab koj tawm ntawm cov pobzeb suavtawg moog.

¹⁷Koj khaavtheeb vim koj zoo nraug, koj lub tswvyim pluj taag vim koj lub koob meej nto moo lug. Vim le ntawd kuv txhaj muab koj pov rua huv nplajteb, kuv rau txim rua koj taabmeeg tej vaajntxwv.

¹⁸Koj ua txhum luj, vim koj ua laag ua luam tsi ncaaj, hab ua rua koj lub chaw pehawm tsi huv lawm. Yog le ntawd kuv txhaj tso suavtawg lug hlawv koj kuas ua tshauv taag rua huv nplajteb taabmeeg tej tuabneeg suavdlawg.

¹⁹Koj pluj ndlais lawm tag, pluj moog ibtxhis le. Txhua tsaav tuabneeg kws paub koj yuav ntshai hab yoob taag, puab ntshai nyob tsaam puab raug tej xwm phem kws koj raug.”

²⁰Tug TSWV has rua kuv tas:

²¹“Tub noobneej, koj ca le cev kuv tej lug tshev lub nroog Xidoos.

²²Koj ca le has tug TSWV kws kaav ib puas tsaav yaam tej lug rua cov tuabneeg huv Xidoos le nuav: Xidoos, kuv yog koj tug yeebncuab, txhua tug tuabneeg yuav qhuas kuv, vim tej kws kuv tau ua rua koj. Puab yuav paub has tas, kuv yog tug TSWV kws dlawbhuv, thaus kuv rau txim rua cov tuabneeg kws nyob huv koj.

²³Kuv yuav tso kaab mob lug raug koj, hab ua kuas muaj ntshaav ndlwg puv nkaus txhua txujkev. Yuav muaj yeebncuab tuaj txhua phaab tuaj tua koj, hab koj cov pejxeem yuav raug tua. Ces koj txhaj yuav paub has tas, kuv yog tug TSWV.”

²⁴Tug TSWV has tas, “Cov tebchaws kws nyob puagncig cov Yixalayees yuav tsi txobthuam hab tsimtxom puab lawm. Puab txhaj yuav paub has tas, kuv yog tug TSWV kws kaav ib puas tsaav yaam.”

²⁵Tug TSWV kws kaav ib puas tsaav yaam has tas, “Kuv yuav coj cov Yixalayees tawm huv tej tebchaws kws puab moog nyob rov qaab lug. Txhua tsaav tuabneeg txhaj yuav paub has tas, kuv yog tug TSWV kws dlawbhuv. Cov Yixalayees yuav tau rov lug nyob huv puab lub tebchaws kws kuv muab rua kuv tug tubkhai Yakhauj lawm.

²⁶Cov Yixalayees yuav nyob kaaj sab lug huv lub tebchaws ntawd. Puab yuav ua vaaj ua tsev hab cog txiv maab. Kuv yuav rau txim rua cov tebchaws nyob puagncig puab kws pheej txobthuam hab tsimtxom puab. Puab yuav nyob kaaj sab lug, puab txhaj paub has tas, kuv yog tug TSWV kws yog puab tug Vaajtswv.”