Read Hmong Njua Exekees 29 Bible Online

Exekees 29 - Hmong Njua bible

Exekees 29

¹Lub kaum hli ntuj nub kaum ob, xyoo kaum kws peb raug nteg moog, tug TSWV has rua kuv tas:

²“Tub noobneej, koj ca le cev kuv tej lug tshev Falaus kws yog cov Iziv tug vaajntxwv. Koj qha rua nwg has tas, nwg hab nwg cov tuabneeg yuav raug txim.

³Koj has tug TSWV kws kaav ib puas tsaav yaam tej lug rua Falaus kws yog cov Iziv tug vaajntxwv le nuav: Kuv yog koj tug yeebncuab, koj yog tug naab qaa luj kws nyaum heev pw huv haav dlej. Koj has tas, tug dlej Niles yog koj le hab koj yog tug tsim nwg.

⁴Kuv yuav muab nuv chob koj puabtsaig kuas tshaab plawg, hab ua kuas tej ntseg kws nyob huv koj tug dlej lu koj tej khum.

⁵Kuv yuav muab koj hab cov ntseg kws lu rua ntawm koj cov khum pov rua tom taj suabpuam hab yuav tsi muaj tuabneeg muab koj log. Kuv yuav ca tej noog hab tej tsaj lug noj koj.

⁶Cov tuabneeg kws nyob huv tebchaws Iziv txhaj yuav paub has tas kuv yog tug TSWV.” Tug TSWV has tas, “Cov Yixalayees tso sab rua koj txujkev paab, tabsis koj tub khov tsi cuag tug nyuas kaav lojkov.

⁷Thaus cov Yixalayees cev teg tuav koj, koj luv chob puab pwgpu, hab thaus puab pheeb koj, koj luv ua rua puab saav dluav.

⁸Yog le ntawd, kuv yog tug TSWV kws kaav ib puas tsaav yaam has qha rua koj tas, kuv yuav tso tuabneeg nqaa ntaaj tuaj tua koj, puab yuav tua koj cov tuabneeg hab tej tsaj txhu kuas tuag taag.

⁹Tebchaws Iziv yuav nyob qhuav nkuag ca, koj txhaj yuav paub has tas kuv yog tug TSWV. “Rua qhov koj has tas, tug dlej Niles yog koj le, hab koj yog tug tsim,

¹⁰nwgnuav kuv yog koj hab tug dlej Niles tug yeebncuab. Kuv yuav ua kuas tebchaws Iziv nyob qhuav nkuag ca, txij ndlua ntawm lub nroog Midaules kws nyob saab qaumteb moog ti nkaus lub nroog Axavas kws nyob saab qaabteb hab moog txug ndlua ntawm cov tuabneeg Sudaas tug nrimteb.

¹¹Yuav tsi muaj tuabneeg lossis tsaj taug kev hlaa lub tebchaws ntawd le. Yuav tsi muaj tuabneeg nyob rua huv lub tebchaws ntawd plaub caug xyoo.

¹²Kuv yuav ua kuas lub tebchaws nyob nphob xuav rua huv nplajteb nuav. Nwg tej nroog yuav pob puag moog txug plaub caug xyoo hab yuav puamtsuaj phem tshaaj lwm lub nroog. Kuv yuav ua kuas cov tuabneeg Iziv poob tebchaws. Puab yuav tawg moog nyob xyaw lwm tsaav tuabneeg rua txhua lub tebchaws.”

¹³Tug TSWV kws kaav ib puas tsaav yaam has tas, “Tom qaab kws dlhau plaub caug xyoo lawm, kuv yuav coj cov tuabneeg Iziv kws moog nyob xyaw lwm tsaav tuabneeg rov qaab lug,

¹⁴hab kuv yuav ca puab lug nyob rua saab qaabteb huv tebchaws Iziv kws yog puab qub teb qub chaw. Puab lub tebchaws yuav tsi muaj fwjchim,

¹⁵lub tebchaws ntawd yog lub kws tsi muaj fwjchim tshaaj plawg huv nplajteb nuav. Puab yuav tsi tau kaav lwm tsaav tuabneeg ntxiv lawm. Kuv yuav ua kuas puab tsi muaj fwjchim, puab txhaj yuav kaav tsi tau lwm tsaav tuabneeg.

¹⁶Cov Yixalayees yuav tsi moog vaamkhom cov Iziv paab lawm. Cov Iziv txujkev txhum ua rua cov Yixalayees pum has tas, puab tso sab yuam kev rua cov Iziv lawm. Ces cov Yixalayees txhaj yuav paub has tas, kuv yog tug TSWV kws kaav ib puas tsaav yaam.”

¹⁷Lub ib hlis ntuj nub xab ib, xyoo neeg nkaum xyaa kws peb raug nteg moog, tug TSWV has rua kuv tas:

¹⁸“Tub noobneej, Vaajntxwv Nenpukajnexales kws kaav tebchaws Npanpiloos tub sawv kev tuaj ntaus lub nroog Tiles lawm. Nwg yuam nwg cov tubrog kuas ris nraa nyaav heev, ua rua puab dlo hau hab xubpwg hle tawv taag. Txawm le ntawd los nwg hab nwg cov tubrog tsi tau ib yaam dlaabtsi huv lub nroog Tiles ua nqe zug le.

¹⁹Kuv kws yog tug TSWV kws kaav ib puas tsaav yaam has le nuav: Kuv yuav muab lub tebchaws Iziv cob rua Vaajntxwv Nenpukajnexales, nwg yuav fuab hab nqaa cov Iziv tej nyaj tej kub moog them nwg cov tubrog.

²⁰Kuv yuav muab lub tebchaws Iziv ua nqe zug rua nwg, rua qhov nwg cov tubrog ua num rua kuv. Kuv yog tug TSWV kws kaav ib puas tsaav yaam has le ntawd.

²¹“Txug thaus kws tej ntawd tshwmsim lawm, kuv yuav ua kuas cov Yixalayees rov muaj fwjchim. Exekees, koj ca le moog has kuas txhua tug nov, puab txhaj yuav paub has tas kuv yog tug TSWV.”