Read Hmong Njua Exekees 3 Bible Online

Exekees 3 - Hmong Njua bible

Exekees 3

¹Vaajtswv has tas, “Tub noobneej, koj ca le noj thooj ntawv nuav; hab moog has rua cov Yixalayees.”

²Kuv txhaj le rua qhovncauj hab nwg muab thooj ntawv rua kuv noj.

³Nwg has tas, “Tub noobneej, ca le noj thooj ntawv kws kuv muab rua koj; noj kuas puv koj lub plaab.” Thaus kuv noj thooj ntawv ntawd, mas qaab zib npaum le zib ntaab ntaag.

⁴Vaajtswv has tas, “Tub noobneej, koj ca le moog cuag cov Yixalayees hab has rua puab lawv le kuv qha rua koj lawm.

⁵Kuv tsi khaiv koj moog rua lwm tsaav tuabneeg kws koj tsi paub luas tej lug, tabsis yog khaiv koj moog rua tsaav tuabneeg Yixalayees xwb.

⁶Yog has tas kuv khaiv koj moog rua tej tsaav tuabneeg kws has tej lug kws koj tsi yoojyim totaub, mas puab tseem yuav noog koj has dlua.

⁷Tabsis cov Yixalayees yuav tsi muaj ib tug noog koj has, txawm yog kuv has los puab tub tsi noog. Puab cov ntawd yeej yog noob tawv ncauj hab tsi noog lug.

⁸Nwgnuav kuv yuav ua kuas koj muaj lub sab tawv ib yaam le puab, koj txhaj le muaj cuabkaav tiv taug puab.

⁹Kuv yuav ua kuas koj tawv ib yaam le lub qai zeb muaj nqes kws tawv dlua tej pobzeb hauvsim; koj tsi xob ntshai cov tuabneeg ntxeev sab ntawd hlo le.”

¹⁰Vaajtswv has ntxiv tas, “Tub noobneej, ca le ua tuab zoo noog tej lug kws kuv has rua koj hab khaws txhua yaam rua nruab sab.

¹¹Koj ca le moog cuag koj cov tuabneeg kws raug luas nteg coj moog rua lwm tebchaws lawm, hab has rua puab tas, tug TSWV kws kaav ib puas tsaav yaam has le nuav. Txawm yog puab yuav noog koj has hab tsi noog los xij.”

¹²Ces Vaajtswv tug Ntsujplig txawm lug muab kuv nqaa hlo hab kuv nov ib lub suab has tom qaab tuaj has tas, “Ca le qhuas tug TSWV kws muaj tshwjchim ci ntsaa ab kws nyob sau ntuj.”

¹³Kuv nov cov qhelunpees cov tis sis txhuam hab cov lug lub suab sau nruab ntug nrov cuag aav qeeg thoob nplajteb.

¹⁴Tug TSWV tug ntsujplig lug kaav hlo kuv hab coj kuv moog, kuv dlhuav hab npautawg kawg le.

¹⁵Yog le ntawd kuv txhaj moog rua huv Tiles Anpis kws nyob ntawm ntug Dlej Khenpales, qhov chaw kws cov Yixalayees raug nteg moog nyob, hab kuv nyob qhov ntawd tau xyaa nub, kuv xaav tsi thoob rua tej kws kuv pum hab kuv nov ntawd le.

¹⁶Tom qaab xyaa nub ntawd, tug TSWV rov has rua kuv.

¹⁷Nwg has tas, “Tub noobneej, kuv muab koj tsaa ua ib tug faajxwm saib cov Yixalayees. Koj yuav coj kuv tej lug ceebtoom moog qha rua puab.

¹⁸Yog kuv has tas ib tug tuabneeg txhum yuav tuag, tabsis koj tsi qha kuas nwg hloov sab, kuas nwg tsi xob raug kev pluj tuag, nwg yuav tuag vim nwg tej kev txhum, mas kuv yuav muab nwg lub txim rua koj ris.

¹⁹Yog has tas koj tub xub qha rua tug tuabneeg txhum ntawd lawm, tabsis nwg tsi kaam tso nwg tej kev txhum tseg, mas tug ntawd yuav tuag vim nwg tej kev txhum, tabsis koj yuav dlim.

²⁰“Yog ib tug tuabneeg ncaaj nceeg tso kev ncaaj nceeg tseg moog ua txhum, yog kuv muab kev sim sab lug cuab nwg kev, yog koj tsi moog qha nwg, mas nwg yuav tuag vim nwg tej kev txhum, kuv yuav tsi suav tej kws nwg tau ua zoo taag lug lawm, hab kuv yuav muab nwg lub txim rua koj ris.

²¹Yog koj ntuag ib tug tuabneeg ncaaj nceeg kuas tsi xob ua txhum, yog nwg noog koj lug hab tsi ua txhum, nwg yuav tsi raug kev pluj kev tuag, ces kuv yuav tseg koj txujsa.”

²²Tug Tswv lub fwjchim lug kaav hlo kuv hab tug TSWV has rua kuv tas, “Koj ca le sawv moog rua tom lub haav. Kuv muaj lug yuav has rua koj tod!”

²³Yog le ntawd, kuv txhaj moog rua tom lub haav, kuv pum tug TSWV tug tshwjchim ci ntsaa ab ib yaam le kuv tau pum ntawm ntug Dlej Khenpales, kuv txawm qhau cev hlo ua ntsejmuag ti nkaus rua huv aav,

²⁴Tabsis Vaajtswv tug Ntsujplig lug kaav hlo kuv hab tsaa kuv sawv. Tug TSWV has rua kuv tas, “Koj ca le rov moog tsev, kaw qhovrooj hab nyob tuabywv.

²⁵Tub noobneej, koj yuav raug luas muab hlua khi hab koj yuav tsiv tsi dlhau ntawm puab moog le.

²⁶Kuv yuav ua kuas koj tug nplaig txhaav hab has tsi tau lug rua cov tuabneeg ntxeev sab ntawd.

²⁷Thaus kuv has lug rua koj hab pub koj rov has tau lug, ces koj yuav has rua puab tas, tug TSWV kws kaav ib puas tsaav yaam has le nuav. Puab cov ntawd muaj ibtxha yuav noog koj has hab muaj ibtxha yuav tsi noog, rua qhov puab yog noob ntxeev sab.”