Read Hmong Njua Exekees 30 Bible Online

Exekees 30 - Hmong Njua bible

Exekees 30

¹Tug TSWV has rua kuv ntxiv tas:

²“Tub noobneej, koj ca le cevlug lawv le tug TSWV kws kaav ib puas tsaav yaam tej lug: Nub kws muaj kev txhawj ntshai lug yuav txug!

³Nub ntawd tub lug ze lawm, yog nub kws tug TSWV rau txim, yog nub muaj kev tsaus ntuj hab kev txomnyem rua txhua tsaav tuabneeg.

⁴Yuav muaj kev ua tsuv ua rog huv tebchaws Iziv. hab muaj kev kub ntxhuv nyob huv tebchaws Sudaas. Ntau leej yuav raug tua rua huv tebchaws Iziv; Tuabneeg yuav tuaj fuab ua rua lub tebchaws puamtsuaj taag.

⁵“Kev sis tua zag nuav ua rua cov tubrog Sudaas, Linpias, Lidias, Alanpias, Kub hab kuv cov tubrog raug tua tuag taag.”

⁶Tug TSWV has tas, “Cov tuabneeg kws tuaj paab cov Iziv hab Iziv cov tubrog kws khaavtheeb yuav raug tua tuag taag rua huv tshaav rog. Txij ndlua ntawm Midaules kws nyob saab qaumteb moog txug rua ntawm lub nroog Axavas kws nyob saab qaabteb. Tug TSWV kws kaav ib puas tsaav yaam has le ntawd.

⁷Cov tebchaws ntawd yuav nyob qhuav nkuag huv nplajteb hab puab tej nroog yuav puamtsuaj taag.

⁸Thaus kws kuv tis suavtawg hlawv lub tebchaws Iziv, cov tuabneeg kws paab nwg yuav raug tua tuag taag huv tuabsi. Puab txhaj yuav paub has tas, kuv yog tug TSWV.

⁹“Thaus txug nub ntawd cov Iziv yuav raug puamtsuaj taag. Kuv yuav tso ib paab tuabneeg caij nkoj moog hem cov tuabneeg Sudaas kws nyob tso sab lug kuas puab ntshai heev. Nub ntawd tub lug yuav txug.”

¹⁰Tug TSWV kws kaav ib puas tsaav yaam has tas, “Kuv yuav ca Vaajntxwv Nenpukajnexales kws kaav tebchaws Npanpiloos ua kuas tebchaws Iziv txujkev npluanuj pluj kag moog.

¹¹Nenpukajnexales hab nwg tsoom tubrog kws tsi taabncuab leejtwg yuav coj ntaaj tuaj tua tebchaws Iziv kuas puamtsuaj taag hab yuav muaj tuabneeg tuag nyob rua txhua qhov.

¹²Kuv yuav ua kuas tug dlej Niles nqhuab hab muab lub tebchaws Iziv rua cov tuabneeg txawv tebchaws kws sab phem ua kuas puamtsuaj taag. Kuv yog tug TSWV kws has le ntawd.”

¹³Tug TSWV kws kaav ib puas tsaav yaam has tas, “Kuv yuav rhuav tej mlom hab tej vaajtswv cuav kws nyob huv lub nroog Meefis kuas puamtsuaj. Kuv yuav ua rua txhua tug ntshai, kuas tsi muaj ib tug twg kaam lug kaav lub tebchaws Iziv le.

¹⁴Kuv yuav ua kuas tebchaws Iziv saab qaabteb nyob qhuav nkuag ca, hab tis suavtawg hlawv lub nroog Xau-as kws nyob saab qaumteb, hab kuv yuav rau txim rua lub tuamceeb nroog Thenpes.

¹⁵Kuv txujkev chim yuav lug raug lub nroog Peluxi-oos kws yog cov Iziv lub nroog ruaj khov hab kuv yuav rhuav lub nroog Thenpes tej kev npluanuj.

¹⁶Kuv yuav tis suavtawg hlawv lub tebchaws Iziv, ces lub nroog Peluxi-oos yuav raug kev txomnyem. Lub nroog Thenpes tej ntsaa yeej pob taag hab dlej yuav nyaab lub nroog.

¹⁷Cov tub hluas kws nyob huv lub nroog Heli-aupulis hab Npunpatis yuav raug luas tua tuag taag, dlua le cov yuav raug luas nteg moog.

¹⁸Thaus kuv txu cov Iziv lub fwjchim hab puab txujkev khaavtheeb, kev tsaus ntuj yuav lug raug lub nroog Tapahes, fuab yuav lug roog lub tebchaws Iziv, ces cov tuabneeg kws nyob huv nwg tej nroog yuav raug luas nteg moog.

¹⁹Thaus kuv rau txim rua lub tebchaws Iziv, puab txhaj yuav paub has tas kuv yog tug TSWV.”

²⁰Lub ib hlis ntuj nub xab xyaa, xyoo kaum ib kws peb raug nteg moog, tug TSWV has rua kuv tas:

²¹“Tub noobneej, kuv tub ua rua Falaus kws yog cov Iziv tug vaajntxwv txhais npaab luv lawm. Tsi muaj leejtwg muab ntaub qhwv, khu kuas zoo, hab muaj zug rov tuav taug ntaaj.

²²Yog le ntawd, kuv kws yog tug TSWV kws kaav ib puas tsaav yaam has le nuav: ‘Kuv yog Falaus kws yog cov Iziv tug vaajntxwv tug yeebncuab, kuv yuav luv dlua nwg ib saab npaab kuas ob saab luv huv tuabsi, nwg txhaj tuav tsi tau ntaaj.

²³Kuv yuav ua kuas cov Iziv tawg moog nyob thoob nplajteb.

²⁴Kuv yuav ua rua tug vaajntxwv kws kaav tebchaws Npanpiloos ob txhais npaab muaj zug heev hab muab kuv raab ntaaj cob rua nwg. Tabsis kuv yuav muab Falaus kws ua vaajntxwv kaav cov Iziv ob txhais npaab luv, ces nwg yuav quaj hab tuag taabmeeg nwg tug yeebncuab.

²⁵Kuv yuav txu Falaus tug zug hab txhawb cov Npanpiloos tug vaajntxwv tug zug. Thaus kuv muab kuv raab ntaaj rua tug vaajntxwv kws kaav tebchaws Npanpiloos moog tua tebchaws Iziv, txhua tug txhaj yuav paub has tas, kuv yog tug TSWV.

²⁶Kuv yuav ua kuas cov Iziv tawg moog nyob thoob nplajteb. Puab txhaj yuav paub has tas, kuv yog tug TSWV.’ ”