Read Hmong Njua Exekees 31 Bible Online

Exekees 31 - Hmong Njua bible

Exekees 31

¹Lub peb hlis ntuj nub xab ib, xyoo kaum ib kws peb raug nteg moog, tug TSWV has rua kuv tas:

²“Tub noobneej, koj ca le has rua Falaus kws yog cov Iziv tug vaajntxwv hab nwg cov tuabneeg le nuav: Koj muaj zug heev! Kuv yuav muab koj pev rua dlaabtsi?

³Koj zoo ib yaam le tsob ntoo cab nyob peg Lenpanoos kws muaj nplooj hab ceg dlauv zoo nkauj, hab sab nto plawg sau cov fuab.

⁴Muaj dlej yug tsob ntoo luj hlub, cov dlej huv aav yug tsob ntoo kuas sab. luas ywg dlej rua tsob ntoo ntawd lub hauvpaug, hab nwg cov dlej phwj moog rua txhua tsob ntoo huv thaaj zoov ntawd.

⁵Vim muaj dlej txaus, tsob ntoo ntawd txhaj luj hab sab tshaaj lwm tsob, nwg ncau ceg ntau hab ntev.

⁶Txhua yaam noog lug ua zeg rua ntawm nwg tej ceg; tej tsaj qus lug yug mivnyuas rua huv qaab tsob ntoo ntawd; Txhua tsaav tuabneeg thoob nplajteb tuaj nraim huv nwg tug dluab ntxoov ntxoo.

⁷Tsob ntoo ntawd zoo nkauj kawg le, nwg sab hab tej ceg ntev heev. Nwg tej caag nrhau moog ti nkaus cov dlej huv nruab tivtxwv.

⁸Huv Vaajtswv lub vaaj tsi muaj ib tsob ntoo cab kws pev tau tsob ntawd; tsi muaj ib tsob ntoo kws muaj ceg ntau pev tau tsob ntawd le. Huv Vaajtswv lub vaaj tsi muaj ib tsob ntoo zoo nkauj npaum le tsob ntawd.

⁹Kuv ua rua tsob ntoo ntawd zoo nkauj hab ncau ceg ntau heev. Tsob ntoo ntawd ua rua tej ntoo huv Vaajtswv lub vaaj Edees khib kawg le.

¹⁰“Tug TSWV kws kaav ib puas tsaav yaam has rua koj tas: Vim tsob ntoo ntawd sab moog nto sau cov fuab, nwg txhaj khaavtheeb.

¹¹Yog le ntawd kuv txhaj ca lwm tsaav tuabneeg ib tug nom tuaj kaav nwg. Tug nom ntawd yuav rau txim rua tsob ntoo ntawd lawv le nwg txujkev phem kev qas.

¹²Cov tuabneeg txawv tebchaws kws tsi muaj kev taabncuab yuav tuaj ntuv tsob ntoo ntawd povtseg. Nwg tej ceg hab tej kaav yuav poob puv nkaus rua sau tej roob hab tej haav huv lub tebchaws ntawd. Txhua tsaav tuabneeg kws nyob huv tsob ntoo ntawd tug dluab ntxoov ntxoo yuav tsiv taag.

¹³Tej noog yuav yaa lug tsaws rua sau tug caav ntoo hab tej tsaj qus yuav lug tsuj tej ceg.

¹⁴Yog le ntawd, txij nuav moog yuav tsi muaj ib tsob ntoo sab moog nto sau cov fuab lawm. Txawm yog yuav ywg dlej ntau npaum le caag los yeej tsi sab le tsob ntawd. Tej ntawd puavleej yuav puamtsuaj ib yaam le tej tuabneeg nplajteb kws tub xub moog rua huv tubtuag teb lawm.”

¹⁵Tug TSWV kws kaav ib puas tsaav yaam has tas, “Thaus tsob ntoo moog rua huv tubtuag teb, kuv yuav ua kuas cov dlej huv nruab tivtxwv lug voob nkaus nwg. Kuv yuav sau tej dlej rov qaab kuas ntau tug dlej yuav tsi ndlwg. Rua qhov tsob ntoo ntawd tuag lawm, kuv yuav ca kev tsaus ntuj lug qhwv nkaus Lenpanoos tej roob hab ua kuas txhua tsob ntoo huv haav zoov qhuav taag.

¹⁶Thaus kuv muab nwg pov rua huv tubtuag teb, txhua tsaav tuabneeg yuav nov lub suab nrov qeeg nkawg. Txhua tsob ntoo huv lub vaaj Edees hab txhua tsob ntoo sau Roob Lenpanoos kws raug xaiv hab tau dlej txaus kws tub moog rua huv tubtuag teb lawm yuav zoo sab vim tsob ntoo ntawd poob rua huv tubtuag teb lawm hab.

¹⁷Puab yuav nrug nwg moog rua huv tubtuag teb nrug cov kws tub moog ua ntej lawm nyob ua ke. Cov kws nyob huv tsob ntoo ntawd tug dluab ntxoov ntxoo, yuav raug ntab moog nyob xyaw txhua tsaav tuabneeg.

¹⁸“Tsob ntoo ntawd yog Falaus hab nwg cov pejxeem. Tsi muaj ib tsob ntoo huv lub vaaj Edees sab hab muaj fwjchim le tsob ntawd. Tabsis nwgnuav, nwg moog rua huv tubtuag teb hab nrug cov tuabneeg kws tsi ua kevcai txav raug tua tuag rua huv tshaav rog nyob ib yaam le cov ntoo huv lub vaaj Edees.” Tug TSWV kws kaav ib puas tsaav yaam has le ntawd.