Read Hmong Njua Exekees 32 Bible Online

Exekees 32 - Hmong Njua bible

Exekees 32

¹Lub kaum ob hlis ntuj nub xab ib, xyoo kaum ob kws peb raug nteg moog, tug TSWV has rua kuv tas:

²“Tub noobneej, koj ca le has rua Falaus kws yog cov Iziv tug vaajntxwv le nuav: Koj has tas koj yog tug tsuv ntxhuav kws nyob xyaw txhua tsaav tuabneeg, tabsis koj zoo le tug naab qaa luj kws nyob huv paag dlej, koj ob txhais kutaw dlu ua rua lub paag dlej nru taag hab tej dlej tsi huv lawm.

³Thaus muaj ntau tsaav tuabneeg tuaj sis sau ua ke, kuv yuav muab kuv lub vaag khwb nkaus koj hab ca puab hai koj moog rua tim ntug.

⁴Kuv yuav muab koj pov rua huv aav, ca tej noog hab tej tsaj huv nplajteb tuaj noj koj.

⁵Kuv yuav muab koj lub cev tuag kws lwj pov moog kuas puv txhua lub roob hab txhua lub haav.

⁶Kuv yuav muab koj cov ntshaav laub kuas ndlwg moog puv txhua lub roob hab txhua tug dlej.

⁷Thaus kuv ua rua koj puamtsuaj, kuv yuav ua kuas lub ntuj tsaus ndlais, tej nubqub, lub nub hab lub hli yuav tsi ci lawm.

⁸Kuv yuav muab tej kws ci pum kev rua sau nruab ntug tshem tawm kuas lub nplajteb tsaus ntuj nti. Kuv yog tug TSWV kws kaav ib puas tsaav yaam has le ntawd.

⁹“Kuv yuav ua rua ntau tsaav tuabneeg raug kev nyuaj sab thaus kuv ntab koj moog nyob xyaw ntau tsaav tuabneeg huv tej tebchaws kws koj tsi tau paub dlua.

¹⁰Tej kws kuv ua rua koj, yuav ua rua ntau tsaav tuabneeg yoob taag. Thaus kuv yoj kuv raab ntaaj, tej vaajntxwv yuav ntshai heev. Nub kws koj poob moog ntawd, puab txhua tug yuav ntshai heev hab txhawj txug puab txujsa.”

¹¹Tug TSWV kws kaav ib puas tsaav yaam has rua cov Iziv tug vaajntxwv tas, “Koj yuav raug tug vaajntxwv kws kaav tebchaws Npanpiloos raab ntaaj tua xwb.

¹²Kuv yuav ca lwm tsaav tuabneeg cov tubrog kws ua nruj ua tsiv nqaa ntaaj tuaj tua koj cov tuabneeg kuas tuag taag. Koj hab txhua yaam kws koj khaav yuav raug puamtsuaj taag.

¹³Kuv yuav muab koj tej tsaj tua kuas tuag taag rua ntawm tej ntug paag dlej. Yuav tsi tshuav tuabneeg lossis tsaj lug ua kuas dlej nru lawm.

¹⁴Kuv yuav ca koj tej dlej nyob tug yeeg hab ntshab si, hab ca koj tej dlej ndlwg ntsag tu. Kuv yog tug TSWV kws kaav ib puas tsaav yaam has le ntawd.

¹⁵Thaus kuv muab tebchaws Iziv ua kuas nyob qhuav nkuag ca hab tua cov tuabneeg kws nyob huv tuag taag lawm, puab txhaj yuav paub has tas, kuv yog tug TSWV.

¹⁶Ntawm nuav yog zaaj nkauj quaj ntsuag kws luas yuav hu! Tej quaspuj huv txhua tsaav tuabneeg yuav hu zaaj nkauj quaj ntsuag rua Iziv hab nwg cov tuabneeg. Kuv yog tug TSWV kws kaav ib puas tsaav yaam has le ntawd.”

¹⁷Lub ib hlis ntuj nub kaum tsib, xyoo kaum ob kws peb raug nteg moog, tug TSWV has rua kuv tas:

¹⁸“Tub noobneej, koj ca le quaj ntsuag rua cov tuabneeg Iziv. Koj ca le xaa puab nrug lwm tsaav tuabneeg kws muaj fwjchim moog rua huv tubtuag teb.

¹⁹Koj has rua puab tas: Mej xaav has tas, mej zoo nkauj tshaaj luas lwm tug nua los? Mej yuav tau moog rua huv tubtuag teb hab pw nrug cov tuabneeg kws tsi ua kevcai txav.

²⁰“Cov Iziv yuav tuag nrug cov tuabneeg kws raug tua rua huv tshaav rog. Tub npaaj raab ntaaj txhij lawm yuav tua puab txhua tug.

²¹Cov thawj kws muaj fwjchim hab cov tuabneeg kws tuaj cov Iziv tog, puab zoo sab tog txais cov Iziv moog rua huv tubtuag teb. Puab qw has tas, ‘Cov tuabneeg tsi ua kevcai txav kws raug tua tuag rua huv tshaav rog lug pw ntawm nuav lawm!’

²²“Axilias cov tubrog tej ntxaa nyob puagncig nwg, puab yog cov kws raug nav ntaaj tuag rua huv tshaav rog.

²³Puab tej ntxaa nyob huv qhov kws tub tshaaj plawg huv tubtuag teb. Nwg cov tubrog puavleej tuag taag rua huv tshaav rog, hab puab tej ntxaa nyob puagncig nwg. Puab tau ua rua tej kws tseem nyob huv nplajteb ntshai kawg le.

²⁴“Elames cov tubrog tej ntxaa nyob puagncig nwg. Puab yog cov kws raug nav ntaaj tuag rua huv tshaav rog, hab puab moog rua huv tubtuag teb tsi taag ua kevcai txav le. Thaus tseem ua neej nyob, puab ua nruj ua tsiv, tabsis nwgnuav puab tuag xyaab leeg hab poob ntsejmuag kawg.

²⁵Elaas pw nrug cov tuabneeg kws raug nav ntaaj tuag rua huv tshaav rog, hab nwg cov tubrog tej ntxaa nyob puagncig nwg. Puab puavleej tsi tau ua kevcai txav hab yog raug tua tuag rua huv tshaav rog. Thaus tseem ua neej nyob puab ua nruj ua tsiv, tabsis nwgnuav puab tuag xyaab leeg hab poob ntsejmuag kawg, puab nrug cov tuabneeg kws raug tua tuag rua huv tshaav rog nyob ua ke.

²⁶“Mesekis hab Tunpas cov tubrog tej ntxaa nyob puagncig obtug. Puab yog cov kws raug nav ntaaj tuag rua huv tshaav rog, puab tsi tau ua kevcai txav le. Puab tau ua rua tej tuabneeg kws tseem ua neej nyob huv nplajteb ntshai kawg le.

²⁷Luas tsi fwm puab hab tsi coj puab moog log ib yaam le cov thawjcoj tam thaus u kws muab puab tej cuabyeej ua rog nrug puab moog rua huv tubtuag teb, muab puab tej ntaaj tag puab taubhau, hab muab puab dlaim thaiv nav ntaaj tso rua sau puab lub cev. Cov ntawd tau ua rua tej tuabneeg kws tseem ua neej nyob huv nplajteb ntshai kawg le.

²⁸“Qhov ntawd qha has tas, cov Iziv yuav raug tua hab pw nrug cov tuabneeg tsi ua kevcai txav kws raug nav ntaaj tuag rua huv tshaav rog.

²⁹“Edoos nrug nwg cov vaajntxwv hab nwg cov thawjcoj nyob huv hab. Puab muaj tubrog coob hab muaj fwjchim heev, tabsis nwgnuav puab nrug cov tuabneeg tsi ua kevcai txav kws raug nav ntaaj tuag rua huv tshaav rog pw ua ke huv tubtuag teb.

³⁰“Cov numtswv kws nyob saab qaumteb hab cov Xidauni-aas nyob ntawd hab. Yaav taag lug puab muaj fwjchim ua rua tuabneeg ntshai heev, tabsis nwgnuav puab nrug cov tuabneeg tsi ua kevcai txav kws raug nav ntaaj tuag rua huv tshaav rog poob ntsejmuag kawg moog rua huv tubtuag teb. Puab koom txujkev txaajmuag nrug cov tuabneeg kws moog rua huv tubtuag teb.

³¹“Thaus Falaus pum puab tuag le ntawd, ua rua nwg zoo sab kawg, rua qhov Falaus hab nwg cov tubrog los raug nav ntaaj tuag rua huv tshaav rog hab”. Tug TSWV kws kaav ib puas tsaav yaam has le ntawd.

³²“Falaus ua rua cov tuabneeg kws tseem ua neej nyob ntshai kawg, tabsis Falaus hab nwg cov tubrog nrug cov tuabneeg tsi ua kevcai txav kws raug nav ntaaj tuag rua huv tshaav rog pw ua ke huv tubtuag teb.” Tug TSWV kws kaav ib puas tsaav yaam has le ntawd.