Read Hmong Njua Exekees 33 Bible Online

Exekees 33 - Hmong Njua bible

Exekees 33

¹Tug TSWV has rua kuv tas:

²“Tub noobneej, ca le has rua koj cov tuabneeg tas, thaus kuv coj kev tsuv kev rog tuaj rua huv lub tebchaws, yog cov tuabneeg kws nyob huv lub tebchaws xaiv puab ib tug ua tub faajxwm hab

³thaus nwg pum muaj yeebncuab tuaj tawmtsaam lub tebchaws, nwg tshuab raaj tshuab xyu ceebtoom rua suavdlawg.

⁴Yog leejtwg nov lub suab ceebtoom ntawd, tabsis nwg tsi quavntsej le, yog yeebncuab muab nwg tua tuag, ces nwg ris nwg lub txim xwb.

⁵Nwg tuag vim nwg tsi quavntsej lub suab ceebtoom. Tabsis yog nwg ua lawv le lub suab ceebtoom, ces nwg yeej yuav tsiv dlim xwb.

⁶Tabsis yog tug tub faajxwm pum yeebncuab tuaj, nwg tsi tshuab raaj tshuab xyu ceebtoom rua suavdlawg paub, yog yeebncuab tuaj tua cov tuabneeg txhum ib tug lawm, ces kuv yuav muab tug ntawd lub txim rua tug faajxwm ris.

⁷“Tub noobneej, nwgnuav kuv yuav tsaa koj ua ib tug tub faajxwm rua cov Yixalayees. Koj yuavtsum qha kuv tej lug ceebtoom rua puab paub.

⁸Yog kuv has rua ib tug tuabneeg txhum tas, tug tuabneeg txhum, koj yuav tuag. Tabsis koj tsi moog qha kuas nwg tso kev txhum tseg, nwg txhaj tsi tuag, ces kuv yuav muab nwg lub txim rua koj ris.

⁹Yog koj tub qha rua tug tuabneeg txhum ntawd lawm, tabsis nwg tsi tso nwg txujkev txhum tseg, nwg yuav tuag rua nwg txujkev txhum, ces kuv yuav tsi muab nwg lub txim rua koj ris.”

¹⁰Tug TSWV has rua kuv tas: “Tub noobneej, koj has rua cov Yixalayees has tas, mej pheej has tas, ‘Peb nyuaj sab rua peb tej kev txhum hab tej kev phem kev qas kws peb tau ua. Peb puamtsuaj lawm. Peb yuav ua le caag ua neej nyob?’

¹¹Koj has rua puab tas, kuv yog tug TSWV kws kaav ib puas tsaav yaam, hab yog Vaajtswv tug kws muaj sa nyob. Kuv tsi xaav pum tug tuabneeg txhum tuag. Kuv xaav kuas nwg tso nwg txujkev txhum tseg hab muaj txujsa nyob xwb. Cov Yixalayees, mej ca le tso mej tej kev phem kev qas tseg. Vim le caag mej xaav tuag?

¹²“Tub noobneej, nwgnuav koj ca le has rua cov Yixalayees has tas, yog muaj ib tug tuabneeg ncaaj nceeg moog ua txhum, tej kev ncaaj nceeg kws nwg ua taag lug yeej paab tsi tau nwg le! Yog muaj ib tug tuabneeg txhum tso nwg tej kev phem kev qas tseg, nwg yuav tsi raug txim. Tabsis yog ib tug tuabneeg ncaaj nceeg moog ua txhum, kuv yuav tsi zaam txim rua nwg le.

¹³Txawm yog kuv has tas, kuv yuav muab txujsa rua tug tuabneeg ncaaj nceeg, tabsis yog nwg xaav has tas tej kev ncaaj nceeg kws nwg ua yaav taag lug paab tau nwg lawm, nwg ca le moog ua kev txhum, ces kuv yuav tsi suav nwg tej kev ncaaj nceeg yaav taag lug le. Nwg yuav tuag rua nwg tej kev txhum.

¹⁴Yog kuv has rua ib tug tuabneeg txhum tas, koj yuav tuag. Tabsis yog nwg tso nwg tej kev txhum tseg, ua ncaaj nceeg hab ua zoo,

¹⁵xws le: nwg thim tej khoom kws nwg nyag lug rov rua luas, nwg tso kev txhum tseg, hab ua lawv le txuj kevcai kws paab tau tuabneeg muaj txujsa, ces nwg yuav muaj sa nyob tsi tuag.

¹⁶Kuv yuav zaam tej kev txhum kws nwg ua taag lug hab nwg yuav muaj sa nyob, rua qhov nwg rov lug ua ncaaj hab ua zoo lawm.

¹⁷“Mej cov tuabneeg has tas, tej kws tug TSWV ua, nwg ua tsi ncaaj. Tsi yog le ntawd; tabsis puab yog cov kws ua tsi ncaaj ntaag!

¹⁸Yog muaj ib tug tuabneeg ncaaj nceeg tso kev ua zoo tseg, hab moog ua kev phem kev qas, nwg yuav tuag rua nwg txujkev txhum.

¹⁹Yog muaj ib tug tuabneeg txhum tso nwg tej kev txhum tseg, rov lug ua ncaaj hab ua zoo, nwg yuav muaj sa ua neej nyob.

²⁰Cov Yixalayees, mej has tas tej kws kuv ua, kuv ua tsi ncaaj. Yog le ntawd, kuv yuav txav txim rua mej lawv le teg num kws mej ua taag lug lawm ntaag.”

²¹Lub kaum hlis ntuj nub xab ib, xyoo kaum ob kws peb raug nteg moog, muaj ib tug txivneej tsiv dlim huv lub nroog Yeluxalees tuaj qha rua kuv has tas, luas txeeb tau lub nroog Yeluxalees lawm.

²²Ua ntej mo kws tug txivneej ntawd tuaj cuag kuv, kuv tub xub nov tug TSWV lub fwjchim lug nyob ntawm kuv lawm. Taagkig tom qaab kws tug txivneej ntawd tuaj txug, tug TSWV ua rua kuv has tau lug.

²³Tug TSWV has rua kuv tas:

²⁴“Tub noobneej, cov tuabneeg kws nyob huv cov Yixalayees tej nroog kws pob puag taag lawm has tas: ‘Tsuas muaj Anplahaas tuab leeg xwb, Vaajtswv txhaj muab taagnrho lub tebchaws nuav rua nwg, tabsis nwgnuav peb muaj coob heev lawm, yog le ntawd lub tebchaws yog peb suavdlawg tug huv tuabsi.’

²⁵“Koj ca le has tug TSWV kws kaav ib puas tsaav yaam tej lug rua puab le nuav: Mej noj tej nqaj kws txhaam ntshaav, pe mlom hab tua tuabneeg. Vim le caag mej tseem has tas, lub tebchaws nuav yog mej tug?

²⁶Mej tso sab rua mej tej ntaaj, mej ua kev phem kev qas hab mej ntxag luas tej quaspuj. Vim le caag mej tseem has tas, lub tebchaws nuav yog mej tug?

²⁷“Kuv yog tug TSWV kws kaav ib puas tsaav yaam hab yog Vaajtswv tug kws muaj sa nyob, koj has rua puab tas, cov tuabneeg nyob huv tej nroog kws pob puag taag lawm yuav raug nav ntaaj tuag taag. Cov kws nyob tom taj suabpuam yuav raug tej tsaj qus tum. Cov kws tsiv moog nkaum rua peg tej roob hab huv tej qhov tsua, yuav raug kaab mob tuag taag.

²⁸Kuv yuav ua kuas lub tebchaws nuav nyob qhuav nkuag ca, hab puab tug zug kws ua rua puab khaavtheeb yuav pluj moog. Tej roob huv tebchaws Yixalayees los yuav nyob qhuav nkuag, tsi muaj leejtwg yuav taug kev hlaa le.

²⁹Thaus kuv rau txim rua cov tuabneeg vim puab tej kev txhum, hab ua rua lub tebchaws nyob qhuav nkuag ca, puab txhaj yuav paub has tas, kuv yog tug TSWV.”

³⁰Tug TSWV has tas: “Tub noobneej, thaus koj tsaav tuabneeg tuaj nyob ua ke rua ntawm tej ntsaa loog lossis ntawm puab tej qhovrooj sis thaam txug koj. Puab ib leeg has rua ib leeg tas, ‘Peb ca le moog noog saib tug TSWV has le caag rua peb?’.

³¹Kuv tsaav tuabneeg sis sau tsheej paab tuaj noog tej lug kws koj has, tabsis puab tsi ua lawv le koj has. Puab lub ncauj laam has lug zoo xwb, puab tseem ua phem ua qas le qub.

³²Koj tsuas zoo le tug kws muaj lub suab zoo hu zaaj nkauj sis hlub hab txawj ntaus nkauj nogncaas rua puab noog xwb. Puab nov tej lug kws koj has, tabsis puab tsi ua lawv le ntawd.

³³Tej lug kws koj has tas yuav tshwm muaj, tej ntawd tub tshwm muaj lawm. Thaus ntawd puab txhaj yuav paub has tas, muaj ib tug cev Vaajtswv lug nrug puab nyob.”