Read Hmong Njua Exekees 34 Bible Online

Exekees 34 - Hmong Njua bible

Exekees 34

¹Tug TSWV has rua kuv tas:

²“Tub noobneej, koj ca le tshev cov Yixalayees cov thawjcoj. Koj has tug TSWV kws kaav ib puas tsaav yaam tej lug rua puab le nuav: Mej cov kws yog Yixalayees cov tub yug yaaj raug puamtsuaj lawm lauj! Mej tsuas nrhav rua mej noj xwb, mej tsi pub hab tsi tu paab yaaj le.

³Mej haus yaaj mig, naav tej tsoog tsho kws muab plaub yaaj ntus, hab tua tej mivnyuas yaaj kws rog rog noj, tabsis mej tsi pub hab tsi tu kuv paab yaaj le.

⁴Mej tsi tu tug yaaj kws qaug quas zig, tsi khu tug kws muaj mob, tsi muab ntaub qhwv tug kws muaj qhov txhaab, tsi coj tug kws yuam kev rov lug, hab tsi moog nrhav tug kws pluj lawm. Tabsis mej quab yuam paab yaaj hab ua nruj ua tsiv rua puab.

⁵Vim tsi muaj tug tub yug yaaj, cov yaaj txhaj tawg taag hab tej tsaj qus txhaj muab cov yaaj tum noj.

⁶Yog le ntawd kuv paab yaaj txhaj moog moog lug lug sau tej laaj roob hab sau tej roob sab. Puab tawg moog nyob thoob nplajteb los tsi muaj leejtwg nrhav hab coj puab rov qaab lug.

⁷“Mej cov kws yog tub yug yaaj, ca le noog tug TSWV kws kaav ib puas tsaav yaam tej lug kws has rua mej le nuav:

⁸Kuv yog Vaajtswv tug kws muaj sa nyob, mej ca le noog kuv has. Kuv paab yaaj raug tej tsaj qus tum, vim tsi muaj tug tub yug yaaj. Kuv cov tub yug yaaj tsi moog nrhav kuv cov yaaj, tabsis puab tsuas nrhav rua puab noj xwb. Puab tsi pub hab tsi tu kuv paab yaaj le.”

⁹Cov tub yug yaaj, mej ca le noog kuv has!

¹⁰Kuv kws yog tug TSWV kws kaav ib puas tsaav yaam has tas kuv yog mej tug yeebncuab. Kuv yuav txeeb kuv paab yaaj ntawm mej moog, tsi pub mej yug kuv paab yaaj; kuv yuav tsi pub kuas mej tau noj tau haus ntawm kuv paab yaaj. Kuv yuav cawm kuas kuv paab yaaj dlim tsi pub rua mej tua noj lawm.

¹¹“Tug TSWV kws kaav ib puas tsaav yaam has tas: kuv yuav moog nrhav kuv cov yaaj hab tu puab kuas zoo,

¹²ib yaam le tug tub yug yaaj moog nrhav nwg paab yaaj kws tawg ua saab ua sua lawm. Kuv yuav moog nrhav cov yaaj kws tawg ua saab ua sua lawm hab coj puab rov lug tsev. Kuv yuav cawm puab dlim ntawm kev tsaus ntuj hab kev txhawj ntshai.

¹³Kuv yuav coj puab tawm huv lwm tsaav tuabneeg tej tebchaws lug, sau puab lug nyob ua ke hab yuav coj puab rov lug nyob huv puab lub tebchaws. Kuv yuav coj puab moog rua sau cov Yixalayees tej roob kws muaj dlej cag, hab ca puab noj tej zaub huv lub tebchaws kws muaj tuabneeg nyob.

¹⁴Kuv yuav ca puab noj tej zaub mog, hab sau cov Yixalayees tej roob yuav yog puab tej tshaav zaub; puab yuav pw noj tej zaub mog kws nyob sau cov Yixalayees tej roob.

¹⁵Kuv yuav ua tug yug kuv paab yaaj, hab nrhav chaw rua puab su. Kuv yog tug TSWV kws kaav ib puas tsaav yaam has le ntawd.

¹⁶“Kuv yuav moog nrhav cov yaaj kws pluj lawm, hab coj cov yuam kev rov lug, muab ntaub qhwv cov kws muaj qhov txhaab, khu cov kws muaj mob hab paab cov kws qaug quas zig, tabsis cov kws rog hab muaj zug, kuv yuav muab ua kuas puamtsuaj moog, rua qhov kuv yog tug yug yaaj kws ncaaj nceeg.

¹⁷“Tug TSWV kws kaav ib puas tsaav yaam has tas: Mej cov kws yog kuv paab yaaj, kuv yuav txav txim rua mej ib tug zuj zug, muab tug phem cais tawm ntawm tug zoo, hab cais cov yaaj tawm ntawm cov tshis.

¹⁸Mej noj tej zaub kws zoo los tsi txaus mej sab, mej tseem muab kutaw tsuj tej zaub kws mej noj seem! Mej haus tej dlej kws ntshab los tsi txaus mej sab, mej tseem muab kutaw dlu tej dlej kws mej haus seem kuas nru!

¹⁹Kuv cov yaaj yuav noj tej zaub kws mej muab kutaw tsuj hab haus tej dlej kws mej muab kutaw dlu kuas nru lawm xwb los?

²⁰“Yog le ntawd, kuv kws yog tug TSWV kws kaav ib puas tsaav yaam has rua mej tas, kuv yuav txav txim rua mej, tsi has cov yaaj rog hab cov yaaj ntxaug huv tuabsi.

²¹Mej muab xubpwg thawb hab muab kub nrau cov yaaj kws qaug quas zig kuas puab tawg ri sua rua txhua qhov.

²²Tabsis kuv yuav cawm kuv paab yaaj kuas dlim ntawm txujkev puamtsuaj. Kuv yuav txav txim rua kuv paab yaaj ib tug zuj zug, muab tug zoo cais tawm ntawm tug phem.

²³Kuv yuav tsaa ib tug ua tug tub yug yaaj; tug ntawd yog kuv tug tubkhai Daviv. Nwg yuav pub zaub rua puab noj hab ua puab tug tub yug yaaj.

²⁴Kuv yog tug TSWV, kuv yuav ua puab tug Vaajtswv hab kuv tug tubkhai Daviv yuav ua puab tug vaajntxwv. Kuv yog tug TSWV kws has le ntawd.

²⁵Kuv yuav coglug pub kev thaajyeeb rua puab, hab lawv tej tsaj qus tawm huv puab lub tebchaws moog. Kuv paab yaaj yuav nyob hab pw huv haav zoov tso sab lug.

²⁶“Kuv yuav foom koob moov rua puab hab ca puab nyob puagncig kuv lub roob kws dlawbhuv. Kuv yuav tso naag lug lawv caij lawv nyoog, tej naag ntawd yog koob moov kws kuv tso lug.

²⁷Tej ntoo yuav tawg paaj txi txiv, tej teb yuav zoo qoobloo hab txhua tug yuav tau nyob kaaj sab lug huv lub tebchaws ntawd. Thaus kuv luv puab tug quabtwg hab tso puab dlim ntawm txujkev ua luas qhev, puab txhaj yuav paub has tas, kuv yog tug TSWV.

²⁸Lwm tsaav tuabneeg yuav tsi tuaj fuab puab hab tej tsaj qus yuav tsi tum puab. Puab yuav nyob kaaj sab lug, tsi muaj leejtwg tuaj ua rua puab ntshai lawm.

²⁹Kuv yuav muab lub tebchaws kws aav zoo hab aav rog rua puab hab yuav tsi pub kuas muaj kev tshaib nqhes nyob huv puab lub tebchaws. Lwm tsaav tuabneeg yuav tsi txobthuam puab ntxiv lawm.

³⁰Txhua tug yuav paub has tas, kuv yeej tsomkwm cov Yixalayees kws yog kuv tsaav tuabneeg. Kuv yog tug TSWV kws kaav ib puas tsaav yaam has le ntawd.

³¹“Mej yog kuv paab yaaj, yog paab yaaj kws kuv yug zoo, mej yog kuv cov tuabneeg, hab kuv yog mej tug Vaajtswv.” Tug Tswv kws kaav ib puas tsaav yaam has le ntawd.