Read Hmong Njua Exekees 35 Bible Online

Exekees 35 - Hmong Njua bible

Exekees 35

¹Tug TSWV has rua kuv tas:

²“Tub noobneej, koj ca le tshev lub tebchaws Edoos.”

³Koj has tug TSWV kws kaav ib puas tsaav yaam tej lug rua nwg le nuav: “Edoos cov roob, kuv yog koj tug yeebncuab! Kuv yuav muab koj ua kuas nyob qhuav nkuag ca.

⁴Kuv yuav ua kuas koj tej nroog pob puag taag; hab ca lub tebchaws nyob qhuav nkuag, koj txhaj paub has tas, kuv yog tug TSWV.

⁵“Koj ibtxwm yog cov Yixalayees tug yeebncuab, koj ua rua cov Yixalayees raug nav ntaaj tuag thaus kuv tso kev puamtsuaj lug raug puab hab thaus kuv rau txim zag kawg rua puab, vim puab tej kev txhum.

⁶Yog le ntawd, kuv yog tug TSWV kws kaav ib puas tsaav yaam hab yog Vaajtswv tug kws muaj sa nyob, kuv yuav npaaj kev tuag rua koj. Kev tuag yuav caum koj, koj yuav tsiv tsi dlim le. Koj txhum vim koj tua tuabneeg.

⁷Kuv yuav ua kuas lub tebchaws Edoos tej roob nyob qhuav nkuag ca, hab tua txhua tug kws taug kev hlaa lub tebchaws ntawd.

⁸Kuv yuav ua kuas tuabneeg tuag puv nkaus sau tej roob, hab cov tuabneeg kws raug nav ntaaj tuag huv tshaav rog tej cev yuav puv nkaus sau tej laaj roob hab huv tej haav.

⁹Kuv yuav ua kuas koj lub tebchaws nyob qhuav nkuag moog ibtxhis, hab yuav tsi muaj tuabneeg nyob huv koj tej nroog le lawm. Ces koj txhaj yuav paub has tas kuv yog tug TSWV.

¹⁰“Txawm yog kuv yog tug TSWV kws yog puab tug Vaajtswv los koj tseem has tas, tsaav tuabneeg Yudas hab Yixalayees ob lub tebchaws puavleej yog koj le, koj yuav ua tug kaav puab.

¹¹Kuv yog TSWV kws kaav ib puas tsaav yaam hab yog Vaajtswv tug kws muaj sa nyob, kuv yuav ua pauj koj tej kev chim, kev khib hab kev ntxub kuv tsaav tuabneeg rov rua koj. Puab txhaj yuav paub has tas, yog kuv rau txim rua koj, vim tej kws koj tau ua rua puab lawm.

¹²Koj yuav paub has tas kuv yog tug TSWV kws nov koj tej lug txobthuam cov Yixalayees tej roob has tas, cov Yixalayees tej roob peb muab ua puamtsuaj taag hab nyob qhuav nkuag ca lawm.

¹³Kuv tub nov mej tej lug khaavtheeb hab tej lug kws mej has tawmtsaam kuv lawm.”

¹⁴Tug TSWV kws kaav ib puas tsaav yaam has tas, “Kuv yuav ua kuas koj nyob qhuav nkuag ca, tuabneeg thoob nplajteb txhaj yuav zoo sab vim koj raug puamtsuaj

¹⁵ib yaam le koj zoo sab thaus koj pum tsaav tuabneeg Yixalayees raug rhuav nyob qhuav nkuag ca. Lub roob Xe-iles hab taagnrho tebchaws Edoos yuav nyob qhuav nkuag ca, puab txhua tug txhaj yuav paub has tas, kuv yog tug TSWV.”