Read Hmong Njua Exekees 37 Bible Online

Exekees 37 - Hmong Njua bible

Exekees 37

¹Tug TSWV lub fwjchim lug kaav hlo kuv, ces nwg tug Ntsujplig txawm coj kuv moog rua huv lub haav kws muaj pobtxhaa puv nkaus.

²Tug TSWV coj kuv moog ncig thoob plawg lub haav ntawd, kuv pum muaj pobtxhaa nyob huv ntau kawg le, cov pobtxhaa ntawd qhuav taag lawm.

³Tug TSWV nug kuv has tas, “Tub noobneej, tej pobtxhaa nuav puas yuav caj sa taug lawm?” Kuv teb has tas, “Tug TSWV kws kaav ib puas tsaav yaam, tsuas yog koj tuab leeg txhaj paub xwb!”

⁴Tug TSWV has rua kuv tas, “Koj ca le cev kuv tej lug rua cov pobtxhaa nuav. Koj has rua cov pobtxhaa qhuav nuav kuas ca le noog tug TSWV tej lug.

⁵Koj has rua cov pobtxhaa nuav tas, tug TSWV kws kaav ib puas tsaav yaam has rua mej le nuav: Kuv yuav tshuab paa rua mej kuas mej caj sa.

⁶Kuv yuav muab leeg, muab nqaj, muab tawv lug qhwv mej hab kuv yuav rau paa rua mej kuas mej rov caj sa. Mej txhaj yuav paub has tas, kuv yog tug TSWV.”

⁷Kuv txhaj le cev tug TSWV tej lug rua cov pobtxhaa nuav lawv le tug TSWV has rua kuv; thaus kuv taabtom has, kuv txawm nov cov pobtxhaa ntawd lug sis dlhos nrov ndlij ndlawj ua ke nyob lawv le nyag chaw.

⁸Thaus kuv tsaa qhovmuag saib, kuv pum muaj leeg muaj nqaj rua sau cov pobtxhaa hab muaj tawv hlaav lug qhwv cov nqaj, tabsis tsi tau muaj sa le.

⁹Tug TSWV has rua kuv tas, “Tub noobneej, koj ca le cev kuv tej lug rua tej cua. Koj has rua cov cua tas, tug TSWV kws kaav ib puas tsaav yaam has kuas cua ca le tuaj plaub ceg kaum ntuj tuaj tshuab paa rua cov cev tuag nuav kuas puab rov caj sa.”

¹⁰Kuv txawm cev tug TSWV tej lug lawv le nwg has rua kuv. Ces paa txawm nkaag lug rua huv cov cev tuag ntawd, puab txawm caj sa hab sawv. Puab coob npaum nkaus le ib paab tubrog coob coob.

¹¹Tug TSWV has rua kuv tas, “Tub noobneej, cov Yixalayees zoo le cov pobtxhaa nuav ntaag. Puab has tas, puab qhuav taag lawm, puab tsi muaj kev ca sab rua yaav tom ntej le.

¹²Koj ca le cev kuv tej lug rua kuv tsaav tuabneeg Yixalayees has tas, kuv yog tug TSWV kws kaav ib puas tsaav yaam, kuv yuav qheb puab tej qhov ntxaa. Kuv yuav rhu hab coj puab rov lug rua huv tebchaws Yixalayees.

¹³Thaus kuv qheb puab tej qhov ntxaa hab rhu puab huv tej qhov ntxaa lug, puab txhaj yuav paub has tas kuv yog tug TSWV.

¹⁴Kuv yuav muab kuv tug ntsujplig tso rua huv puab, mas puab yuav caj sa hab ca puab nyob huv puab lub tebchaws. Puab txhaj yuav paub has tas, kuv yog tug TSWV. Kuv yeej coglug tseg lawm has tas kuv yuav ua tej nuav, ces kuv yuav ua le ntawd. Kuv yog tug TSWV kws has le ntawd.”

¹⁵Tug TSWV has rua kuv tas:

¹⁶“Tub noobneej, koj ca le muab ib tug paas ntoo lug hab sau npe ntawv rua tug paas ntawd has tas, ‘Cov Yudas lub tebchaws.’ Hab koj muab dlua ib tug paas ntoo lug, sau dlua ib cov npe ntawv rua tug paas ntawd has tas, ‘Cov Yixalayees lub tebchaws.’

¹⁷Ces koj muab ob tug paas ntawd ob tog tw lug sis twb ua ke ua ib tug.

¹⁸Thaus koj cov tuabneeg nug koj has tas, qhov kws koj ua le ntawd yog txhais le caag,

¹⁹ces koj teb rua puab has tas, tug TSWV kws kaav ib puas tsaav yaam yuav muab tug paas ntoo kws pev txug cov Yixalayees lug tuav twb rua tug paas ntoo kws pev txug cov Yudas. Kuv yuav tuav ob tug paas nuav ua ib tug rua huv kuv txhais teg.

²⁰“Koj ca le muab ob tug paas ntawd tuav ua tuab tug rua huv koj txhais teg taabmeeg rua suavdlawg pum.

²¹Koj has rua puab tas, tug TSWV kws kaav ib puas tsaav yaam has tas, kuv yuav coj kuv tsaav tuabneeg tawm huv lwm lub tebchaws kws puab moog nyob ntawd rov lug nyob rua huv puab lub tebchaws.

²²Kuv yuav muab puab ua ib tsaav tuabneeg nyob huv lub tebchaws ntawd, sau cov Yixalayees tej roob hab yuav muaj tuab tug vaajntxwv kaav puab. Puab yuav tsi ua ob tsaav tuabneeg nyob ob lub tebchaws lawm.

²³Puab yuav tsi pe tej mlom kws ua rua puab tsi huv lossis puab yuav tsi ua txhum ntxiv le lawm. Kuv yuav paab kuas puab dlim ntawm puab tej kev txhum hab kev ntxeev sab rua kuv. Kuv yuav ntxuav kuas puab huv; puab yuav yog kuv tsaav tuabneeg hab kuv yuav yog puab tug Vaajtswv.

²⁴Muaj ib tug zoo le kuv tug tubkhai Daviv yuav lug ua vaajntxwv kaav puab. Puab yuav koom tuab tug vaajntxwv, puab yuav muab sab npuab kuv hab ua lawv le kuv tej kevcai.

²⁵Puab yuav nyob huv lub tebchaws kws kuv muab rua kuv tug tubkhai Yakhauj, yog lub tebchaws kws puab cov yawmkoob ibtxwm nyob lug lawm. Puab tej mivnyuas, hab tej xeebntxwv yuav nyob huv lub tebchaws ntawd moog ibtxhis. Muaj ib tug zoo ib yaam le kuv tug tubkhai Daviv yuav lug ua vaajntxwv kaav puab moog ibtxhis le.

²⁶Kuv yuav coglug nrug puab sis raug zoo kuas puab nyob tso sab lug moog ibtxhis. Kuv yuav foom koob moov rua puab kuas puab fuamvaam coob, hab kuv yuav tsaa kuv lub Tuamtsev rua huv puab lub tebchaws moog ibtxhis.

²⁷Kuv yuav nrug puab nyob; kuv yuav yog puab tug Vaajtswv hab puab yuav yog kuv tsaav tuabneeg.

²⁸Thaus kuv tsaa kuv lub Tuamtsev rua puab, txhua tsaav tuabneeg yuav paub has tas, kuv yog tug TSWV kws xaiv cov Yixalayees lug ua kuv tsaav tuabneeg moog ibtxhis.”