Read Hmong Njua Exekees 39 Bible Online

Exekees 39 - Hmong Njua bible

Exekees 39

¹Tug TSWV kws kaav ib puas tsaav yaam has tas, “Tub noobneej, koj ca le cev kuv tej lug tawmtsaam Nkos kws yog vaajntxwv kaav lub nroog Mesej hab Tunpas has tas, kuv yog nwg tug yeebncuab.

²Kuv yuav muab nwg tig moog rua lwm txujkev hab coj nwg dleb heev peg saab qaumteb tuaj kuas txug rua ntawm cov Yixalayees tej roob.

³Kuv yuav ntaus nwg raab neevnti kuas poob ntawm nwg saab teg txhumphem hab ntaus nwg xibxub kuas poob ntawm nwg saab teg xis.

⁴Nkos hab nwg cov tubrog hab lwm tsaav tuabneeg cov tubrog kws koom nrug nwg yuav tuag taag rua sau cov Yixalayees tej roob, kuv yuav ca noog hab tej tsaj qus lug noj puab tej cev tuag.

⁵Puab yuav tuag taag rua tom tej taj nraag. Kuv yog tug TSWV kws kaav ib puas tsaav yaam has le ntawd.

⁶Kuv yuav tso suavtawg hlawv tebchaws Mankos hab cov nroog kws nyob lawv ntug dlej havtxwv kws tej tuabneeg nyob kaaj sab lug, puab txhaj yuav paub has tas, kuv yog tug TSWV.

⁷Kuv yuav ua kuas kuv tsaav tuabneeg Yixalayees paub kuv lub npe kws dlawbhuv, hab kuv yuav tsi ca kuv lub npe raug luas txobthuam ntxiv lawm. Txhua tsaav tuabneeg txhaj yuav paub has tas, kuv yog tug TSWV kws yog cov Yixalayees tug Vaajtswv kws dlawbhuv.”

⁸Tug TSWV kws kaav ib puas tsaav yaam has tas, “Nub kws kuv has tseg ntawd yeej yuav muaj tshwm lug xwb.

⁹Cov tuabneeg kws nyob huv cov Yixalayees tej nroog yuav tawm moog khaws tej cuabyeej ua rog: tej thaiv nav ntaaj, tej neevnti, tej xub, tej muv hab tej qws lug ca ua tawg txaus rauv xyaa lub xyoos.

¹⁰Puab yuav tsi tau moog txav tawg huv tej teb lossis tom tej haav zoov, rua qhov puab tau tej cuabyeej ua rog ntawd ua tawg rauv lawm. Cov Yixalayees yuav moog tua hab fuab cov tuabneeg kws tau tuaj tua hab fuab puab yaav taag lug lawm.” Tug TSWV kws kaav ib puas tsaav yaam has le ntawd.

¹¹Tug TSWV has tas, “Nub ntawd kuv yuav muab cov Tuabneeg Taug Kev lub Haav huv tebchaws Yixalayees kws nyob saab nub tuaj ntawm ntug Havtxwv Tuag rua Nkos ua chaw log tuag. Luas yuav muab Nkos hab nwg cov tubrog log rua huv lub haav ntawd. Ces luas yuav hu lub haav ntawd has tas, ‘Nkos Cov Tubrog Lub Haav.’

¹²Cov Yixalayees log cov tuabneeg tuag ntawd xyaa lub hlis maam taag, ces lub tebchaws txhaj rov huv.

¹³Cov tuabneeg kws nyob huv tebchaws sis paab muab cov tuabneeg tuag ntawd log, ces nub kws kuv muaj yeej, cov tuabneeg kws log cov tuag ntawd yuav tau koob meej. Kuv yog tug TSWV kws kaav ib puas tsaav yaam has le ntawd.

¹⁴Tom qaab xyaa lub hlis lawm, puab yuav xaiv ib cov txivneej moog ncig lub tebchaws nrhav cov tuabneeg tuag kws seem hab muab log, lub tebchaws txhaj huv.

¹⁵Thaus cov txivneej ntawd moog nrhav pum cov tuabneeg tuag tej pobtxhaa, ces puab rhais cim rua ntawm cov pobtxhaa ib saab, cov tuabneeg log tuag maam le coj cov pobtxhaa ntawd moog log rua huv Nkos cov tubrog lub haav.

¹⁶(Luas yuav tis npe rua ib lub nroog nyob ntawd hu ua Hamaunas.) Ces lub tebchaws txhaj huv lawm.”

¹⁷Tug TSWV kws kaav ib puas tsaav yaam has rua kuv tas, “Tub noobneej, koj ca le hu tej noog hab tej tsaj qus kws nyob puagncig ntawd tuaj noj tej khoom fij kws kuv yuav muab rua puab noj. Muaj ib rooj noj haus luj nyob rua sau cov Yixalayees tej roob, puab yuav tuaj noj nqaj hab haus ntshaav.

¹⁸Tej noog hab tej tsaj qus yuav tuaj noj cov tubrog tej nqaj hab haus cov numtswv kws kaav nplajteb tej ntshaav ib yaam le haus tej laug yaaj, tej mivnyuas yaaj, tej tshis hab tej txiv nyuj kws rog cov ntshaav huv tebchaws Npasaas.

¹⁹Thaus kuv tua cov tuabneeg ntawd ib yaam le tua tsaj ua khoom fij, tej noog hab tej tsaj qus yuav noj tej roj ua rua puab dlhuav hab haus tej ntshaav ua rua puab qaug.

²⁰Tej noog hab tej tsaj qus yuav tau noj tej nqaj neeg, cov tubrog caij neeg, cov numtswv hab txhua tug tubrog kws nyob sau kuv lub rooj. Kuv yog tug TSWV kws kaav ib puas tsaav yaam has le ntawd.”

²¹Tug TSWV has tas, “Kuv yuav ua kuas txhua tsaav tuabneeg pum kuv tug tshwjchim kws ci ntsaa ab, thaus kws kuv txav txim rua txhua tsaav tuabneeg.

²²Txij thaus ntawd lug cov Yixalayees yuav paub has tas, kuv yog tug TSWV kws yog puab tug Vaajtswv.

²³Txhua tsaav tuabneeg yuav paub has tas, qhov kws cov Yixalayees raug nteg moog nyob rua lwm tebchaws, vim puab tau ua kev txhum tawmtsaam kuv. Kuv tso puab tseg, puab txhaj raug yeebncuab tej nav ntaaj tuag rua huv tshaav rog.

²⁴Kuv rau txim rua puab lawv le puab tej kev phem kev qas hab ua tsi huv, kuv txhaj tso puab tseg lawm.”

²⁵Tug TSWV kws kaav ib puas tsaav yaam has tas, “Nwgnuav kuv yuav taabncuab Yakhauj cov xeebntxwv kws yog tsaav tuabneeg Yixalayees hab ua kuas puab rov vaammeej dlua. Kuv yuav fwm kuv lub npe kws dlawbhuv.

²⁶Thaus puab rov lug nyob kaaj sab lug huv puab lub qub tebchaws, yuav tsi muaj leejtwg tuaj ua phem rua puab, puab yuav ncu tsi txug puab txujkev txaajmuag kws puab tau ntxeev sab rua kuv lawm.

²⁷Kuv yuav coj kuv tsaav tuabneeg kws raug ntab moog nyob rua lwm tsaav tuabneeg kws yog puab cov yeebncuab tej tebchaws rov qaab lug. Thaus ntawd txhua tsaav tuabneeg txhaj yuav paub has tas, kuv yog tug Vaajtswv kws dlawbhuv.

²⁸Kuv tsaav tuabneeg txhaj yuav paub has tas, kuv yog tug TSWV kws yog puab tug Vaajtswv. Puab yuav paub zaaj nuav zoo, rua qhov kuv ca puab raug luas nteg moog nyob rua lwm tebchaws, nwgnuav kuv coj puab rov lug nyob huv puab lub tebchaws, tsi tseg ib tug nyob rua lwm tebchaws le.

²⁹Kuv yuav pub kuv tug Ntsujplig rua kuv tsaav tuabneeg Yixalayees, kuv yuav tsi tso puab tseg ib zag le lawm. Kuv yog tug TSWV kws kaav ib puas tsaav yaam has le ntawd.”