Read Hmong Njua Exekees 4 Bible Online

Exekees 4 - Hmong Njua bible

Exekees 4

¹Vaajtswv has tas, “Tub noobneej, koj moog nqaa ib dlaim thwvcib lug tso rua ntawm koj xubndlag hab muab suam ua lub nroog Yeluxalees.

²Koj ua kuas muaj ntsaa yeej puagncig lub nroog, muaj chaw faajxwm, muab aav meem ua tug ntswg tiv rog, hab tso tej cuabyeej rhuav lub nroog puagncig lub nroog.

³Koj muab ib dlaim hlau lug tsaa ua ib tug ntsaa yeej quas koj hab lub nroog, pev txug lub nroog taabtom raug luas tuaj tua hab koj yog tug kws tuaj vij lub nroog ntawd ntaag. Qhov nuav yuav ua ib qho cim tseemceeb rua tsaav tuabneeg Yixalayees.

⁴“Koj pw tig rua saab txhumphem. Kuv yuav muab tsaav tuabneeg Yixalayees tej kev txhum tso rua sau koj, koj yuav pw txomnyem peb puas cuaj caum nub vim puab tej kev txhum. Ib xyoos twg kuv rau txim rua koj ib nub txhaj yuav taag puab tej kev txhum.

⁶Thaus koj ua le ntawd taag lawm, koj tsua pw tig rua saab xis tiv kev txomnyem plaub caug nub vim cov Yudas tej kev txhum. Ib xyoos twg kuv rau txim rua koj ib nub.

⁷“Koj tig xubndlag rua lub nroog Yeluxalees; nqug nrig rua lub nroog hab cev kuv tej lug tawmtsaam lub nroog ntawd.

⁸Kuv yuav muab koj khi rua ntawd, kuas koj tig tsi tau cev moog txug thaus luas tuaj vij tau lub nroog tsaiv!

⁹“Koj ca le muab moov pas, moov nplej, moov taum laag, moov taum mog, moov cej hab moov qeb sis xyaw zuaj puab ua ncuav. Npaaj tej ntawd rua koj noj lub sijhawm peb puas cuaj caum nub kws koj pw tig rua saab txhumphem ntawd.

¹⁰Ib nub twg tsuas pub koj noj yim laag ncuav xwb, tsi pub noj tshaaj ntawd le.

¹¹Ib nub twg tsuas pub koj haus ob khob dlej xwb, tsi pub haus tshaaj ntawd le.

¹²Koj muab tuabneeg tej quav qhuav ua tawg rauv, ci ncuav sau cov ncaig quav tuabneeg ntawd, hab coj moog noj taabmeeg rua txhua tug pum.”

¹³Tug TSWV has tas, “Cov Yixalayees yuav tau noj tej zaub mov tsi huv kws txwv tsi pub noj thaus kws kuv ntab puab moog nyob rua lwm tebchaws lawm.”

¹⁴Kuv teb has tas, “Tug TSWV kws kaav ib puas tsaav yaam, kuv ua tsi tau le ko! Kuv yeej tsi tau ua ib yaam tsi huv rua kuv lub cev le. Txij thaus kws kuv tseem yog mivnyuas yau lug, kuv yeej tsi tau noj tej nqaj tsaj kws nwg tuag nwg lossis tej kws tsaj qus tum tuag le. Kuv yeej tsi tau noj ib yaam zaub mov kws tsi huv le.”

¹⁵Yog le ntawd Vaajtswv txhaj has tas, “Zoo lawm lauj! Kuv yuav ca koj muab quav nyuj hloov quav tuabneeg hab koj yuav ci ncuav sau cov ncaig quav nyuj ntawd.”

¹⁶Vaajtswv has ntxiv tas, “Tub noobneej, kuv yuav txav tsi pub kuas lub nroog Yeluxalees muaj noj muaj haus, cov tuabneeg kws nyob huv yuav nyuaj sab heev, ces puab yuav muab teev luj zaub mov rua puab noj hab luj dlej rua puab haus lawm xwb.

¹⁷Zaub mov hab dlej haus los kuj taag, mas puab yuav taag kev ca sab hab puab yuav raug kev puamtsuaj vim puab tej kev txhum.”