Read Hmong Njua Exekees 40 Bible Online

Exekees 40 - Hmong Njua bible

Exekees 40

¹Nub xab kaug, lub xyoo tshab kws yog xyoo neeg nkaum tsib kws peb raug nteg moog, hab tom qaab kaum plaub xyoos kws luas tuaj txeeb tau lub nroog Yeluxalees. Nub ntawd tug TSWV lub fwjchim lug kaav hlo kuv hab coj kuv moog.

²Huv zaaj ywgtoog ntawd, Vaajtswv coj kuv moog tso rua sau ib lub roob sab huv Yixalayees lub tebchaws. Nyob ntawm kuv hauv ntej, kuv pum ib koog tsev zoo le ib lub nroog nyob saab qaabteb.

³Thaus nwg coj kuv moog ze lub nroog ntawd, kuv pum ib tug tuabneeg ci ib yaam le tooj dlaag. Nwg tuav rawv ib txuj hlua ntaub maag hab ib tug paas ntsuag sawv ntawm roojvaag.

⁴Nwg has rua kuv tas, “Tub noobneej, koj ca le tsaa qhovmuag saib. Koj ua tuab zoo noog hab ncu tej lug kws kuv has rua koj. Kuv coj koj tuaj yog xaav qha tej nuav rua koj; koj ca le moog qha txhua yaam kws koj pum rua cov Yixalayees.”

⁵Kuv pum ib tug ntsaa yeej kws xov puagncig lub Tuamtsev. Tug txivneej ntawd txawm muab nwg tug paas kws ntev rau tshim coj lug ntsuag tug ntsaa yeej, qhov tuab muaj rau tshim hab qhov sab muaj rau tshim.

⁶Ces nwg moog rua ntawm lub roojvaag saab nubtuaj. Nwg nce ntaiv moog rua theem sau, nwg ntsuag lub roojvaag qhov tub muaj rau tshim.

⁷Nyob ntawm lub roojvaag saab tom, muaj ib txujkev, txujkev ntawd ib saab twg muaj peb lub chaw faajxwm. Cov chaw ntawd ib chaav twg qhov dlaav muaj rau tshim, qhov ntev muaj rau tshim, hab tej phaab ntsaa kws quas cov chaw ntawd tuab tsib tshim. Muaj dlua ib txujkev nyob saab nrau ntev rau tshim, txujkev ntawd moog rua huv saab kws tig rua ntawm lub Tuamtsev.

⁸Nwg moog ntsuag lub roojvaag kws yuav moog rua huv lub Tuamtsev, qhov tub muaj yim tshim hab qhov tuab muaj ob tshim. Saab roojvaag ntawd tig moog rua lub Tuamtsev.

⁹

¹⁰(Txujkev kws moog rua huv lub Tuamtsev, ib saab twg muaj peb lub chaw faajxwm. Cov chaw faajxwm ntawd qhov dlaav hab qhov ntev ib yaam nkaus, hab tej saab phaab ntsaa kws quas cov chaw ntawd los tuab ib yaam nkaus.)

¹¹Tug txivneej ntawd ntsuag lub roojvaag qhov dlaav muaj kaum tshim hab qhov ntev muaj kaum peb tshim.

¹²Saab phaab ntsaa ntawm hauv ntej cov chaw faajxwm, qhov sab muaj ib tshim hab qhov tuab muaj ib tshim. (Cov chaw ntawd txhua chaav puavleej dlaav rau tshim).

¹³Nwg ntsuag cov chaw ntawd saab phaab ntsaa tom qaab ib chaav rua ib chaav hlaa txujkev ntawd muaj neeg nkaum tsib tshim.

¹⁴Nwg ntsuag chaav kws moog rua ntawm lub tshaav puam, qhov dlaav muaj rau caum tshim.

¹⁵Nwg ntsuag lub roojvaag saab phaab ntsaa nrau moog rua saab phaab ntsaa huv muaj tsib caug tshim.

¹⁶Nyob ntawm tug ntsaa loog saab nrau muaj ib cov qhovrais qheb hab saab ntsaa loog huv luas txaug tej tsob dluab toovlaaj rua.

¹⁷Tug txivneej ntawd coj kuv ntawm lub roojvaag moog rua huv lub tshaav puam. Nyob lawv tug ntsaa loog saab huv muaj peb caug chaav kws tig tuaj rua ntawm lub tshaav puam, hab saab nrau cov chaav ntawd luas muab pobzeb pua

¹⁸puagncig lub tshaav puam. Lub tshaav puam saab nrau qeg dlua lub tshaav puam saab huv.

¹⁹Nwg ntsuag lub roojvaag theem qeg saab huv moog rua ntawm lub roojvaag theem sab saab nrau muaj ib puas tshim.

²⁰Ces tug txivneej ntawd ntsuag ntawd lub roojvaag saab qaumteb moog rua ntawm lub tshaav puam kws nyob saab nrau.

²¹Nwg ntsuag cov chaw faajxwm kws peb lub nyob rua ib saab kev, cov phaab ntsaa kws quas cov chaav hab txujkev kws nkaag saab nrau lug, dlaav hab tuab ib yaam nkaus le cov kws nyob ntawm lub roojvaag saab nubtuaj. Lub roojvaag qhov ntev muaj tsib caug tshim hab qhov dlaav muaj neeg nkaum tsib tshim.

²²Cov chaav, cov qhovrais hab cov dluab toovlaaj kws luas txaug rua ntawm cov phaab ntsaa zoo ib yaam le cov kws luas txaug rua ntawm lub roojvaag kws nyob saab nubtuaj hab. Muaj xyaa theem qeb ntai nce moog rua sau lub roojvaag kws nkaag moog rua huv lub tshaav puam.

²³Ncaaj ntawm lub roojvaag saab qaumteb lug muaj ib lub roojvaag moog rua lub tshaav puam saab huv, zoo ib yaam le lub roojvaag kws nyob saab nubtuaj. Tug txivneej ntawd ntsuag qhov dleb ntu nruab nraab ntawm ob lub roojvaag ntawd muaj ib puas tshim.

²⁴Tug txivneej ntawd coj kuv moog rua saab qaabteb, nyob nraag muaj ib lub roojvaag hab. Nwg ntsuag cov phaab ntsaa saab huv hab lub roojvaag dlaav hab tuab ib yaam le lub roojvaag saab qaumteb hab lub saab nubtuaj.

²⁵Lub roojvaag ntawd muaj qhovrais ib yaam le lwm lub roojvaag hab. Lub roojvaag ntawd qhov ntev muaj tsib caug tshim hab qhov dlaav muaj neeg nkaum tsib tshim.

²⁶Muaj xyaa theem qeb ntai nce moog rua sau lub roojvaag kws nkaag moog rua huv lub tshaav puam. Luas txaug tej tsob dluab toovlaaj rua ntawm ob saab phaab ntsaa huv lawv txujkev.

²⁷Tug txivneej ntawd ntsuag ntawm lub roojvaag saab qaabteb lug rua ntawm lub tshaav puam kws nyob saab huv, muaj ib puas tshim.

²⁸Tug txivneej ntawd coj kuv ntawm lub roojvaag saab qaabteb moog rua ntawm lub tshaav puam saab huv. Nwg ntsuag lub roojvaag ntawd txhua phaab, qhov ntev hab qhov dlaav ib yaam nkaus le lwm lub roojvaag hab.

²⁹Cov chaw faajxwm, cov roojvaag hab cov phaab ntsaa saab huv puavleej dlaav hab tuab ib yaam le lwm lub roojvaag hab, tej chaav ntawm lub roojvaag puavleej muaj qhovrais. Lub roojvaag qhov ntev muaj tsib caug tshim hab qhov dlaav muaj neeg nkaum tsib tshim.

³⁰

³¹Lub roojvaag kws tig rua ntawm lub tshaav puam saab nrau, muaj tej dluab toovlaaj kws luas txaug rua ntawm ob saab phaab ntsaa lawv txujkev. Muaj yim theem qeb ntai nce moog rua sau lub roojvaag.

³²Tug txivneej ntawd coj kuv ntawm lub roojvaag saab nub tuaj moog rua ntawm lub tshaav puam saab huv. Nwg ntsuag lub roojvaag ntawd txhua phaab, qhov ntev hab qhov dlaav ib yaam le lwm lub roojvaag hab.

³³Cov chaw faajxwm, cov roojvaag hab cov phaab ntsaa saab huv, qhov ntev hab qhov dlaav ib yaam le lwm lub roojvaag hab, tej chaav ntawd puavleej muaj qhovrais nyob puagncig. Lub roojvaag qhov ntev muaj tsib caug tshim hab qhov dlaav muaj neeg nkaum tsib tshim.

³⁴Lub roojvaag kws tig rua lub tshaav puam saab nrau, luas txaug tej dluab toovlaaj rua ob saab phaab ntsaa lawv txujkev. Muaj yim theem qeb ntai nce moog rua sau lub roojvaag.

³⁵Ces tug txivneej ntawd coj kuv moog rua ntawm lub roojvaag saab qaumteb. Nwg ntsuag lub roojvaag ntawd qhov ntev hab qhov dlaav ib yaam le lwm lub roojvaag hab.

³⁶Cov chaw faajxwm, tej dluab kws txaug rua ntawm tej phaab ntsaa saab huv, cov roojvaag hab tej qhovrais kws nyob puagncig cov chaav ntawd puavleej dlaav hab tuab ib yaam le lwm lub roojvaag hab. Lub roojvaag ntawd qhov ntev muaj tsib caug tshim hab qhov dlaav muaj neeg nkaum tsib tshim.

³⁷Lub roojvaag kws tig rua ntawm lub tshaav puam saab huv. Muaj tej dluab toovlaaj kws luas txaug rua ntawm ob saab phaab ntsaa lawv txujkev. Muaj yim theem qeb ntai nce moog rua sau lub roojvaag.

³⁸Nyob ntawm lub tshaav puam saab nrau muaj ib chaav txuas nkaus lub roojvaag saab huv kws nyob saab qaumteb. Luas siv chaav ntawd ntxuav tej tsaj kws yuav coj moog hlawv ua khoom fij.

³⁹Chaav kws nyob ntawm lub roojvaag muaj plaub lub rooj, ib saab twg ob lub. Puab muab tej tsaj kws ua khoom fij coj lug tua rua sau plaub lub rooj ntawd, tsi has tej tsaj kws yuav muab hlawv theej txhoj lossis dlaws txim.

⁴⁰Nyob rua huv chaav saab nrau muaj plaub lub rooj zoo ib yaam le plaub lub kws nyob saab huv hab. Ib saab roojvaag txawb ob lub rooj saab peg.

⁴¹Taagnrho yog muaj yim lub rooj kws coj tej tsaj ua khoom fij tuaj tua rua sau, plaub lub nyob rua saab huv hab plaub lub nyob rua saab nrau lub tshaav puam.

⁴²Plaub lub rooj kws nyob saab huv, yog siv tua cov tsaj kws hlawv ua khoom fij, cov rooj ntawd muab pobzeb txaug ua, qhov sab muaj ib tshim, qhov dlaav hab qhov ntev puavleej muaj ib tshim hab ib dlus. Tej cuabyeej kws puab siv tua tej tsaj ua khoom fij, puab muab ca rua sau cov rooj ntawd.

⁴³Muaj ib cov nqailauj ntev le tug ntivteg ntsa thoob plawg rua ntawm cov phaab ntsaa. Tej nqaj kws tua ua khoom fij, puab muab tso rua sau cov rooj ntawd.

⁴⁴Nwg coj kuv moog rua huv lub tshaav puam saab huv. Nyob huv muaj ob chaav, chaav kws nyob ntawm lub roojvaag saab qaumteb tig rua saab qaabteb, hab chaav kws nyob ntawm lub roojvaag saab qaabteb tig rua saab qaumteb.

⁴⁵Tug txivneej ntawd has rua kuv tas, cov povthawj kws ua num huv lub Tuamtsev nyob huv chaav kws tig rua saab qaabteb,

⁴⁶hab cov povthawj kws hlawv tsaj fij rua sau lub thaaj, nyob huv chaav kws tig moog rua saab qaumteb. Cov povthawj ntawd yog Xadaus caajceg; puab puavleej yog xeem Levis hab yog cov kws muaj cai moog cuag tau tug TSWV.

⁴⁷Tug txivneej ntawd ntsuag lub tshaav puam saab huv, qhov dlaav hab qhov ntev muaj ib puas tshim ib yaam nkaus. Lub Tuamtsev nyob rua saab nubpoob hab lub thaaj nyob ntawm hauv ntej lub Tuamtsev.

⁴⁸Nwg coj kuv moog rua ntawm lub qhovrooj kws moog rua huv lub Tuamtsev. Nwg ntsuag lub qhovrooj ntawd, qhov sab muaj tsib tshim hab qhov dlaav muaj kaum plaub tshim hab ob saab phaab ntsaa tuab peb tshim.

⁴⁹Cov qeb ntai kws nce moog rua sau lub qhovrooj, qhov ntev muaj neeg nkaum tshim hab qhov dlaav muaj kaum ob tshim. Hab muaj ob tug ncej nyob ntawm ob saab qhovrooj.