Read Hmong Njua Exekees 41 Bible Online

Exekees 41 - Hmong Njua bible

Exekees 41

¹Tom qaab ntawd tug txivneej tsua coj kuv moog rua chaav huv plawv kws yog Chaav Dlawbhuv. Nwg ntsuag cov ncej ib saab twg dlaav rau tshim

²hab lub qhovrooj dlaav kaum tshim, ob saab phaab ntsaa ntawm lub qhovrooj ib saab twg tuab tsib tshim. Nwg ntsuag lub cheeb huv chaav ntawd, qhov ntev muaj plaub caug tshim hab qhov dlaav muaj neeg nkaum tshim.

³Nwg moog rua chaav huv plawv hab ntsuag cov ncej ntawm lub qhovrooj muaj ob tshim, lub qhovrooj dlaav rau tshim, hab ob saab phaab ntsaa ib saab twg tuab xyaa tshim.

⁴Nwg ntsuag chaav ntawd lub cheeb, qhov dlaav hab qhov ntev muaj neeg nkaum tshim ib yaam nkaus. Chaav nuav yog chaav kws nyob huv plawv. Nwg has rua kuv tas, “Chaav nuav yog Chaav kws Dlawbhuv kawg nkaus.”

⁵Tug txivneej ntawd ntsuag lub Tuamtsev saab phaab ntsaa saab huv qhov tuab muaj rau tshim. Muaj tej chaav miv miv dlaav plaub tshim lawv lub Tuamtsev saab phaab ntsaa.

⁶Cov chaav ntawd luas ua peb tshooj, ib tshooj twg muaj peb caug chaav. Cov phaab ntsaa kws xov txhua chaav ntawd, tshooj sau nyag dlua tshooj huv qaab, ua le ntawd lug txug tshooj kawg huv qaab, yog le ntawd cov phaab ntsaa txhaj txheem taug tshooj ntawd khov, tsi taag ntsa cov phaab ntsaa rua ntawm lub Tuamtsev le.

⁷Yog tuaj saab nrau saib lub tuamtsev cov phaab ntsaa txij ndlua huv taw ntsaa moog nto rua sau tug nqaaj tsuag, tuab ib yaam nkaus. Muaj ob tug ntaiv lawv lub Tuamtsev saab phaab ntsaa nrau cov chaav moog rua sau, ib tshooj rua ib tshooj.

⁸Cov chaav ntawm saab phaab ntsaa nrau tuab tsib tshim; lub Tuamtsev saab qaumteb muaj ib lub qhovrooj moog rua huv cov chaav ntawd hab saab qaabteb muaj ib lub qhovrooj moog rua huv cov chaav ntawd hab xwb. Kuv pum muaj ib theem puagncig lub Tuamtsev dlaav tsib tshim; theem ntawd sab ntawm npoo aav rua sau kwvyees rau tshim hab nyob nrug cov chaav kws lawv cov phaab ntsaa lub Tuamtsev sis txig. Ntu nruab nraab ntawd moog rua ntawm cov chaav kws cov povthawj nyob, dlaav neeg nkaum tsib tshim puagncig lub Tuamtsev.

¹²Lub tsev nyob saab nubpoob kws tig tuaj rua ntawm lub Tuamtsev lub tshaav puam, qhov dlaav muaj xyaa caum tshim, qhov ntev muaj cuaj caum tshim hab cov phaab ntsaa tuab tsib tshim.

¹³Tug txivneej ntawd ntsuag thoob plawg lub Tuamtsev saab nrau, qhov ntev muaj ib puas tshim. Hab saab tom qaab lub Tuamtsev moog rua ntawm lub tsev kws nyob saab nubpoob muaj ib puas tshim;

¹⁴qhov dlaav ntawm hauv ntej lub Tuamtsev saab nubtuaj hab lub tshaav puam muaj ib puas tshim hab.

¹⁵Nwg tsua ntsuag lub tsev qhov ntev moog rua saab nubpoob nrug ob tog hauvmum muaj ib puas tshim. Lub qhovrooj kws moog rua huv lub Tuamtsev, Chaav Dlawbhuv hab Chaav kws dlawbhuv kawg nkaus

¹⁶puavleej yog muab txag ntoo xov huv taw ntsaa moog nto plawg rua sau cov qhovrais. Cov qhovrais puavleej muaj dlaim kaw.

¹⁷Cov phaab ntsaa saab huv lub Tuamtsev, luas txaug dluab thoob plawg huv taw ntsaa moog rua sau txij nkaus cov qhovrooj,

¹⁸yog txaug ua dluab toovlaaj hab dluab qhelunpees, ib tug quas ib tug thoob plawg saab phaab ntsaa. Ib tug qhelunpees twg muaj ob lub ntsejmuag:

¹⁹Lub ntsejmuag tuabneeg tig rua saab kws muaj tsob toovlaaj, lub ntsejmuag tsuv ntxhuav tig dlua rua lwm saab kws muaj tsob toovlaaj, hab txaug le ntawd thoob plawg cov phaab ntsaa;

²⁰huv taw ntsaa moog txij nkaus cov qhovrooj.

²¹Cov ncej qhovrooj ntawm Chaav Dlawbhuv ua plaub faab. Ntawm hauv ntej Chaav kws dlawbhuv kawg nkaus, muaj ib yaam zoo le

²²lub thaaj kws muab ntoo txua, qhov sab muaj peb tshim, hab qhov dlaav muaj ob tshim. Cov ceg, tug taab hab cov thaiv puavleej yog ntoo. Tug txivneej ntawd has rua kuv tas, “Lub rooj nuav yog lub kws txawb rua ntawm Tug TSWV xubndlag.”

²³Muaj dlua ib lub qhovrooj moog rua ntawm Chaav Dlawbhuv hab muaj ib lub moog rua huv Chaav kws dlawbhuv kawg nkaus.

²⁴Ob lub qhovrooj ntawd puavleej muaj ob dlaim txag qhovrooj kws qheb tau rua ob saab.

²⁵Luas txaug tej dluab toovlaaj hab tej dluab qhelunpees rua cov txag qhovrooj ntawm Chaav Dlawbhuv, ib yaam le cov kws luas txaug rua ntawm tej phaab ntsaa. Hab luas muab ntoo lug ntsa ua lub qhovrooj saab nrau.

²⁶Chaav ntawd ob saab phaab ntsaa puavleej muaj qhovrais hab luas txaug tej dluab toovlaaj rua ntawm cov phaab ntsaa.