Read Hmong Njua Exekees 42 Bible Online

Exekees 42 - Hmong Njua bible

Exekees 42

¹Tug txivneej ntawd coj kuv moog rua ntawm lub tshaav puam saab nrau hab coj kuv moog rua huv lub tsev kws nyob saab qaumteb ntawm lub Tuamtsev. Lub tsev ntawd nyob tsi dleb lub tsev kws nyob rua saab nubpoob ntawm lub Tuamtsev.

²Lub tsev nuav qhov ntev muaj ib puas tshim hab qhov dlaav muaj tsib caug tshim.

³Saab kws tig rua ntawm lub Tuamtsev, qhov dlaav ntawm lub tsev ntawd moog rua ntawm lub Tuamtsev muaj neeg nkaum tshim, hab ib saab tig rua ntawm lub tshaav puam saab nrau kws luas muab pobzeb pua lawm. Lub tsev ntawd ua peb tshooj, ib tshooj txuas ib tshooj.

⁴Lub tsev nuav saab qaumteb muaj ib txujkev tshaab plawg huv, dlaav kaum tshim hab ntev ib puas tshim, hab muaj qhovrooj moog rua huv tej chaav.

⁵Cov chaav kws nyob tshooj kawg sau, nqaim dlua cov chaav kws nyob tshooj nruab nraab hab tshooj huv qaab kawg, rua qhov tshooj sau luas tseg qaab khaav dlaav dlua.

⁶Cov chaav ntawm peb tshooj ntawd puavleej ua sis txuas, yog le ntawd, txhaj tsi muaj ncej txheem ib yaam le cov tsev kws nyob rua huv lub tshaav puam.

⁷Lub tsev ntawd tshooj huv qaab saab phaab ntsaa nrau, tog kws muaj cov chaav ntev tsib caug tshim hab tog kws tsi muaj cov chaav los ntev tsib caug tshim hab. Tshooj kawg sau luas kem ua tej chaav thoob plawg lub tsev ntawd.

⁹Cov chaav tshooj huv qaab saab phaab ntsaa tom kawg lub tsev saab nubtuaj muaj ib txujkev moog rua lub tshaav puam saab nrau. Saab qaabteb ntawm lub Tuamtsev muaj ib lub tsev nyob tsi dleb lub tsev kws nyob rua saab nubpoob ntawm lub Tuamtsev.

¹¹Muaj ib txujkev tshaab plawg huv lub tsev ntawd ib yaam le lub peg saab qaumteb hab. Txujkev ntawd qhov dlaav hab qhov ntev los zoo ib yaam hab puavleej muaj qhovrooj moog rua huv tej chaav ib yaam nkaus.

¹²Huv qaab cov chaav ntawm lub tsev saab qaabteb muaj ib lub qhovrooj nyob ntawm saab phaab ntsaa saab nubtuaj lug xaus.

¹³Tug txivneej ntawd has rua kuv tas, “Ob lub tsev nuav puavleej dlawbhuv, cov povthawj kws moog cuag tug TSWV nqaa tej khoom fij dlawbhuv lug noj rua huv ob lub tsev nuav. Rua qhov cov chaav ntawd dlawbhuv, cov povthawj txhaj coj tej khoom fij kws dlawbhuv lug tso rua huv: tej qoobloo, tej tsaj theej txhoj dlaws txim lossis ntxuav kev txhum.

¹⁴Thaus cov povthawj moog rua huv lub Tuamtsev lawm, yog puab yuav tawm moog rua saab nrau lub tshaav puam, puab yuavtsum muab tej tsho dlawbhuv kws puab naav pehawm tug TSWV hle ca hab hloov dlua khaub dluag, maam le tawm moog rua saab nrau kws muaj tuabneeg.”

¹⁵Thaus tug txivneej ntawd ntsuag lub Tuamtsev saab huv taag lawm, nwg coj kuv ntawm lub roojvaag saab nubtuaj moog rua saab nrau hab ntsuag puagncig lub Tuamtsev saab nrau.

¹⁶Nwg nqaa tug paas ntsuag moog ntsuag saab nubtuaj ntawm lub Tuamtsev, muaj tsib puas tshim.

¹⁷Ces nwg tsua moog ntsuag saab qaumteb, saab qaabteb hab saab nubpoob, txhua phaab puavleej muaj tsib puas tshim ib yaam nkaus,

²⁰plaub phaab ntsaa loog ntawd, ib phaab twg ntev tsib puas tshim. Tug ntsaa loog quas qhov kws dlawbhuv hab qhov kws tsi dlawbhuv.