Read Hmong Njua Exekees 43 Bible Online

Exekees 43 - Hmong Njua bible

Exekees 43

¹Tug txivneej ntawd coj kuv moog rua ntawm lub roojvaag kws tig moog rua saab nubtuaj,

²kuv pum cov Yixalayees tug Vaajtswv tug tshwjchim ci ntsaa ab saab nubtuaj tuaj. Vaajtswv lub suab nrov nroo ntwg ib yaam le dlej havtxwv ndlaas, ces Vaajtswv tug tshwjchim ci ntsaa ab rua lub nplajteb.

³Zaaj ywgtoog nuav zoo ib yaam le zaaj kws kuv pum thaus Vaajtswv rhuav lub nroog Yeluxalees, hab zaaj kws kuv pum nyob ntawm ntug Dlej Khenpales. Ces kuv ca le txhus caug ndlua hab nyo ntshis rua huv aav.

⁴Tug TSWV tug tshwjchim lug ntawm lub roojvaag saab nubtuaj moog rua huv lub Tuamtsev.

⁵Tug TSWV tug Ntsujplig lug kaav hlo kuv hab coj kuv moog rua ntawm lub tshaav puam saab huv, kuv pum tug TSWV tug tshwjchim ci ntsaa ab thoob plawg lub Tuamtsev.

⁶Tug txivneej ntawd sawv ntawm kuv ib saab, ces kuv nov tug TSWV has lug huv lub Tuamtsev tuaj rua kuv tas,

⁷“Tub noobneej, ntawm nuav yog kuv lub zwmtxwv. Kuv yuav nrug cov Yixalayees nyob hab kaav puab moog ibtxhis le, tsi has cov Yixalayees lossis puab cov vaajntxwv yuav tsi moog pe lwm tsaav tuabneeg tej vaajtswv hab tsi nyob ze puab tej vaajntxwv tej cev tuag, ua rua kuv lub npe Dlawbhuv raug txobthuam;

⁸Cov vaajntxwv ntawd ua puab lub loog, tej qhovrooj, tej paws rooj hab tej ncej qhovrooj, ncaaj kuv lub Tuamtsev tej paws rooj hab tej ncej qhovrooj, tsuas yog muaj tuab saab phaab ntsaa quas puab hab kuv nkaus xwb. Puab ua rua kuv lub npe kws Dlawbhuv raug txobthuam; vim tej kev phem kev qas kws puab ua; kuv chim, kuv txhaj ua rua puab puamtsuaj taag.

⁹Txij nuav moog puab yuavtsum tseg tsi xob pe lwm tsaav tuabneeg tej vaajtswv hab tshem puab cov vaajntxwv tej cev tuag kuas dleb ntawm kuv. Yog puab ua le ntawd, kuv yuav nrug puab nyob moog ibtxhis.”

¹⁰Tug TSWV has rua kuv tas, “Tub noobneej, koj ca le qha tug qauv ua lub Tuamtsev nuav rua cov Yixalayees, kuas puab txaajmuag rua tej kev txhum kws puab tau ua lawm.

¹¹Yog puab paub txaajmuag rua tej kws puab tau ua taag lug lawm, koj maam le qha tug qauv kws ua lub Tuamtsev rua puab paub: dlaim dluab tsev, txujkev lug hab txujkev tawm, lub cheeb tsev, txhua yaam kws ua lub Tuamtsev, tej kevcai hab kev tswjfwm huv tuabsi. Koj ca le sau txhua yaam nuav qha rua puab kuas paub has tas yuav ua le caag txhaj npaaj tau hab ua tau lawv le tug qauv hab tej kevcai.

¹²Ntawm nuav yog lub Tuamtsev txuj kevcai: puagncig lub Tuamtsev moog rua sau tej pov roob, puavleej yog qhov chaw dlawbhuv.”

¹³Ntawm nuav yog ntsuag lub thaaj, yog siv tuab tug paas kws ntsuag lub Tuamtsev. Lub thaaj ntawd tug taw puagncig sab ib tshim hab dlaav ib tshim, hab puab ib dlaim ua tug ntug lawv tug taw sab ib dlus.

¹⁴Txij ntawm tug taw huv aav moog rua sau ntu miv, sab ob tshim, dlaav ib tshim; txij ntawm ntu miv moog rua sau ntu luj, sab plaub tshim hab dlaav ib tshim.

¹⁵Lub thaaj theem kawg sau sab plaub tshim, lub ncauj nthuav hab muaj plaub tug kub nyob ntawm plaub ceg kaum.

¹⁶Lub thaaj ua plaub faab, ib faab twg muaj kaum ob tshim.

¹⁷Lub npoo thaaj qhov luj nthuav ua plaub faab, ib faab twg muaj kaum plaub tshim hab tug puab npoo dlaav ib dlus, (tug npoo thaaj dlaav ib tshim,) tug ntaiv nyob rua saab nubtuaj.

¹⁸Tug TSWV kws kaav ib puas tsaav yaam has rua kuv tas, “Tub noobneej, koj ca le noog tej lug kws kuv has. Thaus ua tau lub thaaj lawm, koj ca le tua tsaj hlawv fij rua sau hab muab cov ntshaav nchus rua sau ua kevcai fij lub thaaj.

¹⁹Cov povthawj xeem Levis kws yog Xadaus caajceg txhaj yog cov kws tuaj cuag tau kuv hab fij khoom rua kuv. Kuv yog tug TSWV kws kaav ib puas tsaav yaam has le ntawd. Koj muab ib tug ntsuag nyuj rua puab tua fij dlaws txim.

²⁰Koj muab ib cov ntshaav moog nchus rua plaub tug kub sau plaub ceg kaum thaaj hab thoob plawg lub npoo thaaj. Qhov kws koj ua le nuav, yog ua kevcai ntxuav kuas lub thaaj dlawbhuv.

²¹Koj muab tug nyuj kws tua fij dlaws txim coj moog hlawv fij rua ntawm lub Tuamtsev saab nrau.

²²Nub tom qaab koj muab ib tug laug tshis kws tsi muaj ib qhov phem le coj lug tua fij dlaws txim hab koj muab cov ntshaav nchus rua sau lub thaaj ua kevcai ntxuav ib yaam le koj muab cov ntshaav nyuj ua lawm.

²³Thaus kws koj ua kevcai ntxuav le ntawd taag lawm, koj muab ib tug ntsuag nyuj hab ib tug thaav yaaj kws tsi muaj ib qhov phem le

²⁴coj lug rua kuv. Cov povthawj yuav muab ntsev nphoo rua ob tug tsaj ntawd hab muab tua hlawv fij rua kuv.

²⁵Xyaa nub ntawd, ib nub twg koj yuavtsum muab ib tug thaav tshis, ib tug ntsuag nyuj hab ib tug thaav yaaj kws tsi muaj ib qhov phem le lug tua ua khoom fij dlaws txim kuas txwm xyaa nub.

²⁶Xyaa nub ntawd cov povthawj ua kevcai ntxuav lub thaaj kuas tav.

²⁷Thaus dlhau xyaa nub ntawd lawm, nub yim, cov povthawj txawm pib fij khoom rua sau lub thaaj, hlawv khoom theej txhoj hab fij khoom ua kev sis raug zoo. Ces kuv yuav txaus sab rua mej suavdlawg. Kuv yog tug TSWV kws kaav ib puas tsaav yaam has le ntawd.”