Read Hmong Njua Exekees 44 Bible Online

Exekees 44 - Hmong Njua bible

Exekees 44

¹Tug txivneej ntawd coj kuv moog rua ntawm lub roojvaag saab nrau kws nyob ntawm lub Tuamtsev saab nubtuaj. Lub roojvaag ntawd luas muab kaw lawm,

²hab tug TSWV has rua kuv tas, “Lub roojvaag nuav yuav kaw hab tsi qheb. Tsi pub leejtwg qheb hab moog lub roojvaag nuav le, rua qhov tug TSWV kws yog cov Yixalayees tug Vaajtswv tau moog lub roojvaag nuav lawm. Lub roojvaag nuav yuav kaw moog le.

³Tsuas yog tug vaajntxwv txhaj moog tau qhov ntawd hab noj tau tej zaub mov dlawbhuv ntawm kuv lub rooj. Nwg lug hab tawm ntawm lub roojvaag nuav moog xwb.”

⁴Ces tug txivneej ntawd coj kuv ntawm lub roojvaag saab qaumteb moog rua ntawm hauv ntej lub Tuamtsev. Thaus kuv tsaa qhovmuag saib, kuv pum tug TSWV tug tshwjchim ci ntsaa ab thoob plawg tug TSWV lub Tuamtsev. Kuv txhus caug ndlua hab nyo taubhau ti nkaus huv aav,

⁵tug TSWV has rua kuv tas, “Tub noobneej, koj ua tuab zoo noog tej kws koj nov hab ua tuab zoo saib tej kws koj pum. Kuv yuav qha tej kevcai siv lub Tuamtsev rua koj. Koj ncu ntsoov has tas, leejtwg txhaj moog tau rua huv lub Tuamtsev hab tawm rov lug, hab leejtwg moog tsi tau rua huv lub Tuamtsev.

⁶“Koj ca le has rua cov Yixalayees kws yog tuabneeg ntxeev sab has tas, kuv yog tug TSWV kws kaav ib puas tsaav yaam, kuv yuav tsi ca mej ua kev phem kev qas ntxiv lawm.

⁷Puab tau ua tsi huv rua kuv lub Tuamtsev, vim puab ca cov tuabneeg txawv tebchaws kws tsi ua kevcai txav hab tsi noog kuv lug, moog rua huv kuv lub Tuamtsev thaus mej taabtom muab tej roj hab tej ntshaav tsaj fij rua kuv. Kuv tsaav tuabneeg tau rhuav qhov kws kuv nrug puab sis coglug lawm, vim tej kev phem kev qas kws puab tau ua taag lug.

⁸Puab tsi ua cov saib hab tu tej khoom dlawbhuv huv kuv lub Tuamtsev, puab ca cov tuabneeg txawv tebchaws ua teg num ntawd.

⁹“Kuv yog tug TSWV kws kaav ib puas tsaav yaam has tas, tsi pub ib tug tuabneeg txawv tebchaws kws tsi tau ua kevcai txav hab tsi noog kuv tej lug, moog rua huv kuv lub Tuamtsev. Txawm yog cov tuabneeg txawv tebchaws kws ibtxwm nrug cov Yixalayees nyob los tsi pub moog rua huv le.”

¹⁰Tug TSWV has rua kuv tas: “Kuv yuav rau txim rua cov Levis kws nrug cov Yixalayees yuam kev ua txhum, tso kuv tseg hab moog pe mlom lawm.

¹¹Tsimnyog puab ua kuv teg num huv kuv lub Tuamtsev, zuv tej roojvaag, tu lub Tuamtsev, tua tej tsaj kws cov tuabneeg coj tuaj tua hlawv ua khoom fij theej txhoj, hab paab tej tuabneeg suavdlawg.

¹²Tabsis vim puab coj cov Yixalayees moog pe mlom, qhov kws puab ua le ntawd, txhaj ua rua cov Yixalayees poob rua txujkev txhum. Kuv yog tug TSWV kws kaav ib puas tsaav yaam, kuv coglug has tas, kuv yuav rau txim rua puab.

¹³Tsi pub puab ua cov povthawj kws ua kuv teg num lossis moog ze tej khoom dlawbhuv lossis moog rua huv Chaav kws dlawbhuv kawg nkaus. Vim puab ua kev phem kev qas, kuv txhaj rau txim rua puab.

¹⁴Kuv yuav tsaa puab ua cov zuv lub Tuamtsev, cov hu nkauj hab saib lwm yaam num huv lub Tuamtsev.”

¹⁵Tug TSWV kws kaav ib puas tsaav yaam has tas, “Thaus cov Yixalayees tso kuv tseg, cov povthawj xeem Levis kws yog Xadaus caajceg, tseem muab sab npuab kuv hab ua kuv teg num huv kuv lub Tuamtsev. Nwgnuav puab txhaj yog cov kws lug cuag tau kuv hab ua kuv teg num kws yog muab roj hab ntshaav tsaj fij rua kuv.

¹⁶Puab cov ntawd txhaj le moog tau rua huv kuv lub Tuamtsev, fij khoom rua sau lub thaaj hab ua cov coj kev pehawm Vaajtswv huv lub Tuamtsev.

¹⁷Thaus puab lug ntawm lub roojvaag lug rua huv chaav kws nyob huv lub Tuamtsev, puab yuavtsum naav tej tsoog tsho ntaub maag. Tsi xob naav tej tsoog tsho ntaub plaub yaaj, thaus puab lug ua num chaav huv lossis huv lub Tuamtsev.

¹⁸Puab naav rig ntaub maag tuab lu, hab muab ib pluaj ntaub maag paav taubhau, tabsis tsi xob naav tej yaam kws ua rua puab nto fws.

¹⁹Ua ntej puab tawm moog rua ntawm lub tshaav puam saab nrau kws cov tuabneeg nyob, puab yuavtsum hloov cov khaub dluag kws puab naav ua num ca rua huv cov chaav kws Dlawbhuv tsaiv, puab maam le naav tej khaub dluag kws puab ibtxwm naav, txhaj tsi ua rua tej tuabneeg raug mob.

²⁰“Tsi pub cov povthawj chais puab tej plaubhau kuas dlu lug lossis tseg puab tej plaubhau kuas ntev dlhau, tabsis yuavtsum txav kuas zoo saib.

²¹Tsi pub cov povthawj haus cawv txiv maab ua ntej puab moog rua chaav kws nyob saab huv.

²²Tsi pub cov povthawj yuav puj nrauj, tsuas pub yuav tug nkaujxwb kws yog tuabneeg Yixalayees lossis tug puj ntsuag kws tug quasyawg yog povthawj xwb.

²³“Cov povthawj yuavtsum qha kuas kuv tsaav tuabneeg paub yaam kws dlawbhuv hab yaam kws tsi dlawbhuv, hab kuas paub yaam huv hab yaam kws tsi huv.

²⁴Thaus muaj plaub ntug, cov povthawj yog cov txav txim lawv le kuv tej kevcai. Puab yuav ceev tej rooj noj rooj haus lawv le kuv tej kevcai, kev tswjfwm hab ceev nub Xanpataus ua nub tseemceeb.

²⁵“Tsi pub cov povthawj moog kov tug tuabneeg tuag kws yuav ua rua puab tsi huv, puab tsuas kov tau tug kws yog puab nam puab txiv, puab cov mivnyuas lossis puab tug tijlaug, tug kwv lossis tug muam kws tseem tsi tau yuav quasyawg xwb.

²⁶Tom qaab kws tug ntawd ua kevcai ntxuav kuas huv lawm, nwg yuav tau tog xyaa nub,

²⁷nwg maam le moog rua chaav kws nyob huv lub Tuamtsev hab fij khoom ua kevcai ntxuav kuas huv, nwg txhaj rov moog ua tau num nyob huv lub Tuamtsev. Kuv yog tug TSWV kws kaav ib puas tsaav yaam has le ntawd.

²⁸“Cov povthawj kev noj haus yog cov Yixalayees muab lawv le kuv tau has tseg lawm. Cov povthawj tsi muaj laj tsi muaj teb ua puab tug. Kuv yog tug kws yug puab.

²⁹Tej khoom fij kws yog qoobloo, tej tsaj kws coj tuaj theej txhoj hab tej tsaj kws coj tuaj fij dlaws txim, puavleej yog muab ua zaub mov rua cov povthawj. Cov povthawj tau txhua yaam kws cov Yixalayees coj tuaj rua kuv ua puab tug.

³⁰Txhua yaam qoobloo kws mej sau tau, mej muab thawj kawm kws zoo tshaaj ntawm thawj phaum kws mej sau tau hab txhua yaam kws mej coj tuaj fij rua kuv yog cov povthawj tug. Txhua zag kws mej cub ncuav, mej muab thawj lub rua cov povthawj, kuv txhaj foom koob moov rua mej tsev tuabneeg.

³¹Cov povthawj yuavtsum tsi xob noj tej noog lossis tej tsaj kws nwg tuag nwg lossis tej tsaj kws lwm tug tsaj tum tuag hlo le.”