Read Hmong Njua Exekees 45 Bible Online

Exekees 45 - Hmong Njua bible

Exekees 45

¹Thaus mej muab lub tebchaws faib rua txhua xeem, mej yuavtsum tshwj ib thaaj aav huv lub tebchaws rua tug TSWV ua qhov chaw dlawbhuv. Qhov ntev muaj neeg nkaum tsib txheeb tshim hab qhov dlaav muaj neeg nkaum txheeb tshim.

²Thaaj aav kws ca ua lub Tuamtsev ua xwmfaab xwmmeem, ib phaab twg muaj tsib puas tshim. Hab txhua phaab yuavtsum tseg aav seem tsib caug tshim rua saab nrau.

³Ib nraab ntawm thaaj aav ntawd, muab neeg nkaum tsib txheeb tshim ntev hab kaum txheeb tshim dlaav, ca ua lub Tuamtsev kws yog qhov chaw dlawbhuv kawg nkaus.

⁴Thaaj aav ntawd yog thaaj kws dlawbhuv huv lub tebchaws, hab yog thaaj kws tseg ca rua cov povthawj kws ua tug TSWV teg num huv lub Tuamtsev. Thaaj aav ntawd ca ua tsev rua cov povthawj nyob hab ua lub Tuamtsev.

⁵Ib nraab ntawm thaaj aav ntawd yog ca ua tsev rua cov Levis kws ua num huv lub Tuamtsev. Puab ua vaaj ua tsev nyob huv thaaj aav ntawd.

⁶Mej muab thaaj aav saab nrau kws nyob npuab thaaj chaw dlawbhuv, qhov ntev muaj neeg nkaum tsib txheeb tshim, hab qhov dlaav muaj tsib txheeb tshim ua cov Yixalayees tug.

⁷Mej tshwj ib thaaj aav rua tug Vaajntxwv kws kaav lub tebchaws. Thaaj aav ntawd txij ndlua ntawm thaaj chaw Dlawbhuv saab nubpoob moog txug rua ntug Havtxwv Meditelanees; hab saab nubtuaj moog rua tug nrimteb kawg. Thaaj aav ntawd qhov ntev mas ntev ib yaam le cov Yixalayees lub tebchaws tug nrimteb saab nubtuaj moog rua saab nubpoob.

⁸Thaaj aav ntawd yog tug Vaajntxwv kws kaav tebchaws kws nyob rua huv lub tebchaws Yixalayees tug, nwg txhaj tsi txeeb tej aav kws tseg ua cov Yixalayees tug.

⁹Tug TSWV kws kaav ib puas tsaav yaam has tas, “Mej cov numtswv kws kaav cov Yixalayees tau ua txhum ntev lug lawm! Mej ca le tseg tsi xob quab yuam hab tsimtxom cov pejxeem. Ca le ua qhov ncaaj hab ua qhov tseeb. Mej tsi xob ntab kuv cov tuabneeg tawm huv puab lub tebchaws moog ntxiv lawm. Kuv yog tug TSWV kws kaav ib puas tsaav yaam has le ntawd.

¹⁰“Mej yuavtsum siv lub efas hab lub npaj kws tsi ntxo luas:

¹¹“Lub efas kws luj tej yaam qhuav yuavtsum sis luag le lub npaj kws luj tej yaam ua kua, ib efas muaj ib feem ntawm ib humes, hab ib npaj los muaj ib feem ntawm ib humes.

¹²“Qhov kws mej luj yog le nuav: Neeg nkaum Kelas muaj ib sekees Rau caum Sekees muaj ib minas.

¹³“Ntawm nuav yog has txug kev fij khoom kws mej yuav tau fij: moov nplej rau efas twg mej muab ib efas; pobkws: rau efas twg mej muab ib efas; Roj txiv ntoo: kaum npaj twg mej muab ib npaj; (mej yuavtsum siv lub npaj lug luj: kaum npaj muaj ib humes, ib humes hab ib kelas sis npaug). Yaaj: Mej cov Yixalayees, yog leejtwg muaj ob puas tug yaaj, muab ib tug tuaj fij. “Mej yuav tau coj tej qoobloo tuaj fij, tej tsaj kws hlawv fij taagnrho, hab tej tsaj kws fij ua kev sis raug zoo, kuv txhaj yuav zaam mej lub txim. Kuv yog tug TSWV kws kaav ib puas tsaav yaam has le ntawd.

¹⁶“Taagnrho cov tuabneeg kws nyob huv lub tebchaws yuavtsum coj tej khoom fij tuaj rua tug vaajntxwv kws kaav cov Yixalayees.

¹⁷Tug vaajntxwv teg num yog muab tej tsaj kws tua hlawv fij taagnrho, tej qoobloo, hab muab tej cawv txiv maab, fij ua khoom theej txhoj rua cov Yixalayees thaus ua Kevcai Hli Xab, Nub Xanpataus hab lwm yaam kevcai. Nwg yog tug muab tej tsaj fij taagnrho dlaws txim, fij tej qoobloo, tej tsaj kws hlawv fij taagnrho hab tej khoom kws fij ua kev sis raug zoo, kuv txhaj tshem cov Yixalayees tej kev txhum.”

¹⁸Tug TSWV kws kaav ib puas tsaav yaam has tas, “Lub ib hlis ntuj nub xab ib, koj yuavtsum muab ib tug ntsuag nyuj kws tsi muaj ib qhov phem le tuaj tua ua khoom fij ntxuav lub Tuamtsev.

¹⁹Tug povthawj yuav muab ib cov ntshaav ntawm tug tsaj kws tua fij dlaws txim coj moog pleev rua lub Tuamtsev ob tug ncej qhovrooj, plaub ceg kaum thaaj hab cov ncej roojvaag kws moog rua chaav saab huv.

²⁰Lub ib hlis ntuj nub xab xyaa, koj ua ib yaam nkaus le kws koj ua nub xab ib, nyob tsaam muaj tej tug yuam kev ua txhum lossis tsi quavntsej nwg tej kev txhum. Koj txhaj le ntxuav tau lub Tuamtsev kuas huv.

²¹“Lub ib hlis ntuj nub kaum plaub, mej yuavtsum pib ua Kevcai Hlaa Dlhau. Xyaa nub ntawd mej noj tej ncuav kws tsi xyaw keeb xwb.

²²Thawj nub tug vaajntxwv yuavtsum muab ib tug ntsuag nyuj tua fij dlaws nwg hab cov pejxeem suavdlawg lub txim.

²³Xyaa nub kws ua Kevcai ntawd, ib nub twg tug vaajntxwv yuavtsum fij ib tug ntsuag nyuj hab ib tug laug yaaj kws tsi muaj ib qhov phem le, hlawv taagnrho fij rua tug TSWV. Hab xyaa nub ntawd ib nub twg nwg muab ib tug laug tshis tua fij dlaws txim.

²⁴Nwg muab ib efas moov nplej fij nrug ib tug nyuj, ib efas moov nplej fij nrug ib tug yaaj hab ib efas moov nplej twg xyaw peb fwj roj txiv ntoo.

²⁵“Lub xyaa hlis ntuj nub kaum tsib kws pib ua Kevcai nyob Tsev Pheebsuab, tug vaajntxwv yuavtsum fij tej tsaj kws muab hlawv taagnrho, tej tsaj kws hlawv fij dlaws txim, tej qoobloo hab tej roj txiv ntoo ib yaam le ua Kevcai Hlaa Dlhau.”