Read Hmong Njua Exekees 46 Bible Online

Exekees 46 - Hmong Njua bible

Exekees 46

¹Tug TSWV kws kaav ib puas tsaav yaam has tas, “Rau nub kws ua num ntawd, yuavtsum muab lub roojvaag saab nubtuaj kws moog rua chaav saab huv kaw, tabsis qheb nub Xanpataus hab nub kws ua Kevcai Hli Xab.

²Tug vaajntxwv kws kaav lub tebchaws yuav moog ntawm lub tshaav puam saab nrau moog rua ntawm lub roojvaag hab sawv ntawm ib saab tug ncej roojvaag thaus kws cov povthawj muab tej khoom hlawv fij taagnrho hab fij tej khoom ua kev sis raug zoo. Nwg yuav pehawm tug TSWV nyob qhov ntawd hab tawm rov lug rua saab nrau. Lub roojvaag ntawd tsi xob kaw moog txug thaus tsaus ntuj.

³Txhua nub Xanpataus hab txhua lub Kevcai Hli Xab, cov pejxeem suavdlawg tuaj txhus caug pehawm tug TSWV ntawm lub roojvaag.

⁴Nub Xanpataus tug vaajntxwv yuavtsum coj rau tug mivnyuas yaaj hab ib tug laug yaaj kws tsi muaj ib qhov phem le tuaj hlawv fij taagnrho rua tug TSWV.

⁵Txhua zag kws fij ib tug laug yaaj twg, nwg muab ib efas moov nplej fij nrug hab ib tug mivnyuas yaaj twg, nwg muab moov nplej ntau npaum le caag fij nrug los tau, tabsis ib efas moov nplej twg muab peb fwj roj txiv ntoo xyaw.

⁶Thaus txug nub ua Kevcai Hli Xab, tug vaajntxwv muab ib tug ntsuag nyuj, rau tug mivnyuas yaaj hab ib tug laug yaaj kws tsi muaj ib qhov phem le tuaj tua fij.

⁷Txhua zag kws vaajntxwv fij tug ntsuag nyuj hab tug laug yaaj, nwg muab ib efas moov nplej fij nrug hab fij ib tug mivnyuas yaaj twg nwg muab moov nplej ntau npaum le caag fij nrug los tau, tabsis ib efas moov nplej twg muab peb fwj roj txiv ntoo xyaw.

⁸Tug vaajntxwv lug lub roojvaag twg lug, ces nwg tawm lub roojvaag ntawd rov qaab xwb.

⁹“Txhua zag kws ua Kevcai cov pejxeem tuaj pehawm tug TSWV, cov kws tuaj ntawm lub roojvaag saab qaumteb tuaj, thaus rov qaab yuavtsum tawm lub roojvaag saab qaabteb moog, hab cov kws tuaj ntawm lub roojvaag saab qaabteb tuaj, thaus rov qaab yuavtsum tawm lub roojvaag saab qaumteb moog. Tsi pub leejtwg tawm lub roojvaag kws nwg tuaj rov qaab.

¹⁰Tug vaajntxwv yuavtsum tuaj thaus cov pejxeem tuaj hab rov qaab thaus cov pejxeem rov.

¹¹Nub ua Kevcai hab ua rooj noj haus lawv le teem ca, puab muab ib efas moov nplej fij nrug ib tug ntsuag nyuj lossis tug laug yaaj, cov mivnyuas yaaj, puab yuav muab moov nplej ntau npaum le caag los tau, tabsis ib efas moov nplej twg muab peb fwj roj txiv ntoo xyaw.

¹²“Thaus tug vaajntxwv xaav fij khoom tshwjxeeb rua tug TSWV, tsi has tej khoom kws muab hlawv fij taagnrho lossis fij ua kev sis raug zoo, yuavtsum qheb lub roojvaag saab nubtuaj kws moog rua chaav saab huv rua nwg moog. Nwg muab khoom fij ib yaam le nwg fij nub Xanpataus, thaus nwg tawm lug lawm yuavtsum kaw lub roojvaag.”

¹³Tug TSWV has tas, “Txhua taagkig sawv ntxuv yuavtsum muab ib tug mivnyuas yaaj noobnyoog ib xyoos kws tsi muaj ib qhov phem le coj lug tua hlawv taagnrho fij rua tug TSWV. Yuavtsum naj nub ua le nuav.

¹⁴Txhua taagkig twg yuavtsum muab ib feem rau ntawm ib efas moov nplej xyaw ib fwj roj txiv ntoo coj moog fij. Txuj kevcai fij khoom rua tug TSWV nuav, yuavtsum coj moog ibtxhis le.

¹⁵Tug mivnyuas yaaj, cov moov nplej hab cov roj txiv ntoo yuavtsum coj moog fij rua tug TSWV txhua taagkig moog ibtxhis le.”

¹⁶Tug TSWV kws kaav ib puas tsaav yaam has tas: “Yog tug vaajntxwv kws kaav tebchaws faib nwg tej laj tej teb rua nwg cov tub ib tug, ces thaaj aav ntawd yuav yog tug tub ntawd hab cov xeebntxwv tug moog le.

¹⁷Tabsis vaajntxwv muab nwg ib thaaj aav faib rua nwg ib tug tubkhai, ces thaus txug Xyoo Tso thaaj aav ntawd yeej yog vaajntxwv tug, tsuas yog vaajntxwv hab nwg cov tub txhaj yog tswv aav moog le.

¹⁸Vaajntxwv tsi xob txeeb cov pejxeem tej laj teb lug ua nwg tug. Nwg tsuas muab tau tej aav kws yog nwg tug lawm pub rua nwg cov tub xwb, nwg tsi xob quab yuam kuv tsaav tuabneeg hab txeeb puab tej laj teb.”

¹⁹Ces tug txivneej ntawd coj kuv moog rua ntawm lub roojvaag kws tig moog rua cov chaav saab qaumteb kws ze lub roojvaag saab qaabteb ntawm chaav saab huv. Cov chaav dlawbhuv nuav yog ca rua cov povthawj nyob. Nwg qha ib chaav ntawm cov chaav kws nyob saab nubpoob rua kuv

²⁰has tas, “Ntawm nuav yog chaav kws cov povthawj hau cov nqaj kws coj moog fij dlaws txim lossis fij theej txhoj hab cub tej ncuav kws yuav coj moog fij, ua le ntawd txhaj tsi coj tej khoom dlawbhuv tawm moog rua saab nrau lub tshaav puam kws yuav ua rua tej tuabneeg raug mob.”

²¹Hab nwg coj kuv moog rua ntawm lub tshaav puam saab nrau hab qha plaub lub ceg kaum tshaav puam miv miv kws qhov ntev muaj plaub caug tshim hab qhov dlaav muaj peb caug tshim rua kuv.

²³Txhua lub ceg kaum tshaav puam luas muab pobzeb txhim ua ntsaa thoob plawg hab ua qhovcub npuab cov phaab ntsaa.

²⁴Tug txivneej ntawd has rua kuv tas, “Cov qhovcub nuav yog cov kws cov tuabneeg ua num huv lub Tuamtsev hau tej nqaj kws cov tuabneeg coj tuaj fij.”