Read Hmong Njua Exekees 47 Bible Online

Exekees 47 - Hmong Njua bible

Exekees 47

¹Tug txivneej ntawd coj kuv rov lug rua ntawm lub qhovrooj Tuamtsev. Muaj ib tug dlej txhawv huv qaab lub qhovrooj ndlwg moog rua saab nubtuaj, (rua qhov lub Tuamtsev tig rua saab nubtuaj.) Tug dlej ntawd ndlwg huv qaab lub Tuamtsev saab nraag moog hlaa lub thaaj ceg kaum saab qaabteb.

²Tug txivneej ntawd coj kuv ntawm lub Tuamtsev moog rua peg lub roojvaag saab qaumteb hab ncig moog rua ntawm lub roojvaag kws tig rua saab nubtuaj; ces tug dlej ntawd ndlwg tawm ntawm lub roojvaag saab qaabteb.

³Tug txivneej ntawd muab nwg tug paas lug ntsuag ntawm lub qhov kws dlej txhawv moog rua saab nubtuaj, muaj ib txheeb tshim hab nwg coj kuv nqeg rua huv dlej; dlej tub txij kuv muagtaw xwb.

⁴Nwg ntsuag moog ntxiv ib txheeb tshim, dlej tub txij kuv hauvcaug. Nwg rov ntsuag moog ntxiv ib txheeb tshim, dlej tub txij kuv dluav lawm.

⁵Nwg tseem rov ntsuag dlua ib txheeb tshim ntxiv, dlej tub heev ua rua kuv kwm tsi dlhau lawm. Dlej tub heev moog tsi tau le, yuav tau ua luam dlej txhaj moog dlhau xwb.

⁶Nwg has rua kuv tas, “Tub noobneej, koj sau tej nuav ca.” Ces tug txivneej ntawd txawm coj kuv rov moog rua tim ntug dlej,

⁷thaus kws kuv moog txug rua tid, kuv pum muaj ntoo ntau ntau nyob lawv ob saab ntug dlej.

⁸Nwg has rua kuv tas, “Tug dlej nuav ndlwg phua plhawv lub tebchaws moog rua saab nubtuaj, moog tshuam lub haav Yauladees hab ndlwg moog rua Havtxwv Tuag lawm. Thaus tug dlej nuav ndlwg moog txug nraag Havtxwv tuag, cov dlej nuav yuav hloov cov dlej dlaw ntsev huv havtxwv kuas tsuag.

⁹Tug dlej nuav ndlwg moog txug qhov twg, yuav muaj txhua yaam tsaj hab muaj ntseg coob nyob huv. Tug dlej nuav yuav ua rua Havtxwv Tuag tsuag. Hab tug dlej nuav ndlwg moog txug qhov twg txhua tsaav yaam yuav muaj sa.

¹⁰Cov tuabneeg nrhav ntseg yuav tuaj zab puab tej vaag ntawm ntug havtxwv, txij ndlua ntawm lub Qhovdlej Enkedis moog txug rua ntawm lub Qhovdlej Enkalayees. Lub paag dlej ntawd yuav muaj ntau yaam ntseg nyob huv ib yaam le Havtxwv Meditelanees.

¹¹Tabsis tej paag dlej hab tej haav av kws nyob lawv ntug havtxwv yuav tsi tsuag. Tej dlej ntawd yuav dlaw ntsev le qub.

¹²Muaj txhua yaam ntoo kws txi txiv noj tau tuaj lawv ob saab ntug dlej. Cov ntoo ntawd tej nplooj tsi ntsws, tsi qhuav hab txi txiv txhua lub hlis, rua qhov muaj tug dlej kws txhawv huv lub Tuamtsev lug yug cov ntoo ntawd. Cov ntoo ntawd tej txiv ca noj hab tej nplooj ca ua tshuaj.”

¹³Tug TSWV kws kaav ib puas tsaav yaam has tas, “Ntawm nuav yog tej nrimteb huv lub tebchaws kws muab faib rua kaum ob xeem Yixalayees hab xeem Yauxej tau ob npaug.

¹⁴Kuv tau coglug tseg rua mej cov yawmkoob lawm has tas, kuv yuav muab lub tebchaws nuav rua puab ua puab tug moog le; nwgnuav mej ca le muab faib kuas suavdlawg tau sis npaug zog.

¹⁵“Tug nrim saab qaumteb txij ndlua ntawm ntug Havtxwv Meditelanees moog rua ntawm lub nroog Heloos, moog rua lub Dlawm Hamas hab moog rua lub nroog Xedas,

¹⁶moog rua ntawm lub nroog Npeluthas hab Xinpelayees (ob lub nroog nuav nyob ntu nruab nraab ntawm lub nroog Damaxes hab lub nroog Hamas,) hab moog rua ntawm lub nroog Tikoos kws nyob npuab tug nrim tebchaws ntawm cheebtsaam Haulaas.

¹⁷Tug nrim saab qaumteb, txij ndlua ntawm ntug Havtxwv Meditelanees moog rua ntawm lub nroog Enoos, moog hlaa ntawm lub nroog Damaxes hab lub nroog Hamas tug nrimteb moog rua saab qaumteb lawm.

¹⁸“Tug nrim saab nubtuaj txij ndlua ntawm lub nroog Damaxes hab lub nroog Haulaas ntu nruab nraab kws yog tug Dlej Yauladees ua nrim rua tebchaws Yixalayees nyob saab nubpoob hab cheebtsaam Nkile-as nyob saab nubtuaj, moog ti nkaus rua ntawm lub nroog Tamaj kws nyob ntawm ntug dlej Havtxwv Tuag.

¹⁹“Tug nrim saab qaabteb, txij ndlua ntawm lub nroog Tamaj moog rua ntawm cov paag dlej Kades Melinpas nce rua saab qaumteb nubpoob lawv cov Iziv tug nrimteb moog rua Havtxwv Meditelanees lawm.

²⁰“Tug nrim saab nubpoob, yog lawv ntug Havtxwv Meditelanees nce moog rua ntawm Hamas saab nubpoob.

²¹“Ca le muab lub tebchaws nuav faib rua mej kaum ob xeem Yixalayees;

²²Lub tebchaws nuav yuav ua mej tug moog le. Cov tuabneeg txawv tebchaws kws nrug mej nyob hab puab tej tubki kws yug huv mej lub tebchaws muaj feem tau aav lug ua puab tug thaus mej faib aav. Mej yuavtsum ua zoo rua puab ib yaam le mej ua rua mej cov kwvtij Yixalayees, puab muaj cai nrug mej cov Yixalayees txhua xeem rhu ntawv faib aav.

²³Txhua tug tuabneeg txawv tebchaws muaj feem nrug xeem kws puab nrug nyob ntawd tau aav lug ua puab tug. Kuv yog tug TSWV kws kaav ib puas tsaav yaam has le ntawd.”