Read Hmong Njua Exekees 48 Bible Online

Exekees 48 - Hmong Njua bible

Exekees 48

¹Puab lub tebchaws tug nrim saab qaumteb, txij ndlua ntawm ntug Havtxwv Meditelanees moog rua ntawm lub nroog Heloos, moog rua ntawm lub Dlawm Hamas, moog rua ntawm lub nroog Enoos, moog rua ntu nruab nraab ntawm lub nroog Damaxes hab Hamas. Txhua xeem puavleej tau ib thaaj aav ntawm lub tebchaws, txij ndlua ntawm tug nrimteb saab nubtuaj moog txug tug nrimteb saab nubpoob ntawm Havtxwv Meditelanees, hab qaumteb moog ti nkaus qaabteb lawv le cov npe xeem nuav: Xeem Daas Xeem Aseles Xeem Nathalis Xeem Manaxes Xeem Efalayees Xeem Lunpees Xeem Yudas Xeem — Daas Xeem — Aseles Xeem — Nathalis Xeem — Manaxes Xeem — Efalayees Xeem — Lunpees Xeem — Yudas

⁸Tshwj ib thaaj aav npuab xeem Yudas thaaj, thaaj aav ntawd qhov dlaav hab qhov ntev sis npaug zog, qaumteb rua qaabteb muaj neeg nkaum tsib txheeb tshim, hab nubtuaj rua nubpoob muaj neeg nkaum tsib txheeb tshim, ib yaam nkaus le tej feem kws muab faib rua kaum ob xeem. Yuav ua lub Tuamtsev rua huv thaaj aav ntawd.

⁹Thaaj aav kws tshwj tseg rua tug TSWV, qhov ntev muaj neeg nkaum tsib txheeb tshim hab qhov dlaav muaj neeg nkaum tsib txheeb tshim.

¹⁰Cov povthawj tau ib feem ntawm thaaj aav dlawbhuv nuav lug ua puab tug. Qhov ntev saab nubtuaj rua saab nubpoob muaj neeg nkaum tsib txheeb tshim, hab qhov dlaav qaumteb rua qaabteb muaj kaum txheeb tshim. Tug TSWV lub Tuamtsev nyob rua huv plawv thaaj aav nuav.

¹¹Thaaj aav dlawbhuv nuav yog tseg rua cov povthawj kws yog Xadaus caajceg. Puab muab sab npuab kuv, tsi tso kuv tseg hab tsi koom nrug cov Yixalayees ua txhum ib yaam le cov Levis kws tau moog ua txhum lawm.

¹²Yog le ntawd, puab txhaj tau ib feem ntawm thaaj aav kws tshwj tseg nyob npuas ntawm cov Levis le, thaaj aav ntawd yog thaaj kws dlawbhuv kawg nkaus.

¹³Cov Levis tau ib feem ntawm thaaj aav kws tshwj tseg nyob saab qaabteb npuas cov povthawj le. Thaaj aav ntawd nubtuaj rua nubpoob, qhov ntev muaj neeg nkaum tsib txheeb tshim, hab qaumteb rua qaabteb muaj neeg nkaum txheeb tshim.

¹⁴Thaaj aav kws muab fij rua tug TSWV yog thaaj kws zoo tshaaj plawg huv lub tebchaws, tsi pub muab muag, muab pauv lossis muab hloov rua leejtwg le. Thaaj aav ntawd dlawbhuv hab yog tug TSWV tug.

¹⁵Thaaj aav seem saab nrau kws npuas thaaj aav dlawbhuv, qhov ntev muaj neeg nkaum tsib txheeb tshim hab qhov dlaav muaj tsib txheeb tshim, yog tseg rua cov pejxeem ua vaaj ua tsev nyob rua huv plawv hab tseg saab nrau ua tshaav tsaj.

¹⁶Thaaj aav kws puab ua vaaj ua tsev nyob ntawd, dlaav hab ntev xwmfaab xwmmeem, ib phaab twg muaj plaub txheeb tsib puas tshim.

¹⁷Lub nroog ntawd tseg aav seem puagncig saab nrau ca ua tshaav tsaj, ib phaab twg dlaav ob puas tsib caug tshim hab ntev ob puas tsib caug tshim.

¹⁸Thaaj aav seem kws nyob npuas ntawm thaaj aav dlawbhuv, saab nubtuaj muaj kaum txheeb tshim hab saab nubpoob muaj kaum txheeb tshim. Thaaj aav ntawd ca cog qoobloo rua cov tuabneeg kws ua num huv lub nroog noj.

¹⁹Cov Yixalayees txhua xeem kws nyob huv lub nroog, moog ua cov teb ntawd.

²⁰Thaaj aav kws tshwj tseg ntawd dlaav hab ntev xwmfaab xwmmeem, ib phaab twg muaj neeg nkaum tsib txheeb tshim kws yog xaam thaaj aav kws ua lub nroog nrug.

²¹Thaaj aav kws ua lub Tuamtsev, thaaj aav kws cov povthawj nyob, thaaj aav kws cov Levis nyob, thaaj aav kws ua lub nroog hab thaaj aav kws tseg ca ua teb, saab nubtuaj lossis saab nubpoob, puavleej yog tug vaajntxwv kws kaav lub tebchaws tug. Thaaj aav ntawd saab nubtuaj, dlaav moog ti nkaus rua tug nrimteb saab nubtuaj, hab saab nubpoob moog ti nkaus rua Havtxwv Meditelanees, saab qaumteb txij ndlua ntawm xeem Npeenyamees tug nrimteb lug hab saab qaabteb txij ndlua ntawm xeem Yudas tug nrimteb lug.

²³Feem aav kws nyob rua saab qaabteb, yog muab faib rua cov xeem kws tsi tau muaj aav, tug nrim txij ndlua tug nrim tebchaws saab nubtuaj moog ti nkaus rua Havtxwv Meditelanees. Pib faib qaumteb rua qaabteb rua cov xeem nuav: Xeem Npeenyamees Xeem Xime-oos Xeem Ixakhas Xeem Xenpuloos Xeem Khas.

²⁸Thaaj aav nyob saab qaabteb kws muab tu rua xeem Khas, tug nrim txij ndlua ntawm Tamas moog txug rua saab qaabteb nubpoob moog rua cov paag dlej Kades, hab saab qaumteb nubpoob, txij ndlua ntawm Iziv tug nrimteb moog rua Havtxwv Meditelanees.

²⁹Tug TSWV kws kaav ib puas tsaav yaam has tas, “Ntawm nuav yog has txug qhov kws muab lub tebchaws faib rua cov xeem Yixalayees ua puab tug.”

³⁰Muaj kaum ob lub roojvaag kws moog rua huv lub nroog Yeluxalees. Ib saab phaab ntsaa yeej twg ntev plaub txheeb tsib puas tshim hab muaj peb lub roojvaag. Ib lub roojvaag twg yog ib xeem npe. Cov roojvaag saab qaumteb tis npe lawv le xeem Lunpees, xeem Yudas hab xeem Levis; cov roojvaag saab nubtuaj tis npe lawv le xeem Yauxej, zeem Npeenyamees hab xeem Daas; cov roojvaag saab qaabteb tis npe lawv le xeem Xime-oos, xeem Ixakhas hab xeem Xenpuloos; hab cov roojvaag saab nubpoob tis npe lawv le xeem Khas, xeem Aseles hab xeem Nathalis.

³⁵Tug ntsaa yeej puagncig lub nroog muaj kaum yim txheeb tshim. Txij nuav moog, lub nroog yuav muaj npe hu ua “Tug TSWV Nyob Ntawm Nuav!”