Read Hmong Njua Exekees 5 Bible Online

Exekees 5 - Hmong Njua bible

Exekees 5

¹Tug TSWV has tas, “Tub noobneej, ca le muab ib raab ntaaj kws ntse heev lug chais koj cov fwjtxwv hab cov plaubhau kuas dlu lug. Muab teev lug kiv cov plaubhau ntawd hab muab faib ua peb feem.

²Thaus luas vij lub nroog dlhau lawm, koj muab ib feem coj moog hlawv rua huv nroog, muaj dlua ib feem koj muab koj raab ntaaj tsuav ncig lub nroog, hab muab dlua ib feem tso rua cua tshuab yaa moog, kuv yuav rhu kuv raab ntaaj caum.

³Koj muab ob peb txuj plaubhau ntsaws rua huv koj lub nqaws tsho ca.

⁴Hab koj rov rhu ob peb txuj coj moog hlawv rua huv qhovcub dlua hab ca kuas kub nyab taag. Txij ntawd moog suavtawg yuav kis moog kub tsaav tuabneeg Yixalayees kuas taag.”

⁵Tug TSWV kws kaav ib puas tsaav yaam has tas, “Koj saib maj! Kuv muab lub nroog Yeluxalees tso rua huv plawv nplajteb kws muaj ntau lub tebchaws nyob puagncig nwg.

⁶Tabsis vim Yeluxalees tawmtsaam kuv tej lug saamfwm, kuv txhaj paub has tas nwg ua phem tshaaj lwm tsaav tuabneeg hab tawv ncauj tshaaj cov tebchaws kws nyob puagncig nwg. Yeluxalees tso kuv tej lug saamfwm tseg hab tsi coj lawv le kuv tej Kevcai.

⁷Yeluxalees, kuv yog tug TSWV kws kaav ib puas tsaav yaam, koj noog kuv has: vim koj tsi coj lawv le kuv tej Kevcai hab tsi ceev kuv tej lug saamfwm, koj txhaj tsim kev kub ntxhuv ntau dlua cov tebchaws kws nyob puagncig koj. Koj tseem xyum ua lawv le lwm tsaav tuabneeg ua hab.

⁸Kuv yog tug TSWV kws kaav ib puas tsaav yaam, kuv qha rua koj has tas kuv yog koj tug yeebncuab ntaag. Kuv yuav rau txim rua koj taabmeeg txhua tsaav tuabneeg.

⁹Vim tej kev phem kev qas kws koj ua, kuv yuav rau txim rua lub nroog Yeluxalees kws yaav taag lug kuv tsi tau rau dlua, hab yaav tom ntej los yuav tsi rau ib zag le lawm.

¹⁰Vim le ntawd cov tuabneeg kws nyob huv lub nroog Yeluxalees, nam txiv yuav noj mivnyuas hab mivnyuas yuav noj nam txiv. Kuv yuav rau txim rua mej cov kws tseem ua neej nyob kuas tsiv moog nyob ua saab ua sua rua txhua qhov.

¹¹“Kuv yog Vaajtswv tug kws muaj sa nyob, kuv has rua mej tas, vim mej tau ua kev phem kev qas hab pe mlom ua rua kuv lub Tuamtsev tsi dlawbhuv lawm, kuv yuav muab mej tso tseg tsi taabncuab mej hlo le.

¹²Mej cov tuabneeg ib feem peb yuav tuag rua kev mob kev nkeeg hab kev tshaib kev nqhes rua huv nroog; ib feem peb yuav tuag rua nav ntaaj nav rag rua saab nrau ntug nroog; hab ib feem peb kuv yuav muab tso rua cua ntsawj yaa moog hab kuv yuav rhu ntaaj caum.

¹³“Mej yuav raug kuv txujkev chim hab kev npautawg moog txug thaus kuv lub sab nqeg. Thaus mej pum tej nuav lawm, mej yuav paub has tas, kuv yog tug TSWV kws has tej nuav. Kuv khib vim tej kws mej ua tsi ncaaj.

¹⁴Lwm tsaav tuabneeg kws nyob puagncig mej, txhua tug kws dlua kev yuav luag mej plig, txobthuam mej hab yuav tshuv kev moog.

¹⁵“Thaus kuv chim, kuv npautawg hab rau txim rua mej, txhua tsaav tuabneeg kws nyob puagncig mej yuav ntshai heev. Puab yuav saib tsi taug mej hab muab mej tso dlaaj tso luag.

¹⁶Kuv yuav txav tsi pub kuas mej muaj kev noj kev haus, ca mej tuag tshaib tuag nqhes. Mej yuav nyaj tshaib yoo nqhes hab tiv kev mob ib yaam le xibxub vug chob mej.

¹⁷Kuv yuav tso kev tshaib kev nqhes hab tej tsaj qus lug noj mej tej mivnyuas, kuv yuav tso kaab mob kev nkeeg, kev siv kev npug hab kev tsuv kev rog lug raug mej. Kuv yog tug TSWV kws has le ntawd.”