Read Hmong Njua Exekees 6 Bible Online

Exekees 6 - Hmong Njua bible

Exekees 6

¹Tug TSWV has rua kuv tas:.

²“Tub noobneej, koj tsaa qhovmuag saib cov Yixalayees tej roob hab qha kuv tej lug rua puab.

³Koj has kuas cov Yixalayees tej roob noog tug TSWV kws kaav ib puas tsaav yaam tej lug, hab has rua tej roob, tej pov roob, tej kwj haa hab tej haav le nuav, kuv yuav rhu ntaaj tsuav cov tuabneeg tej chaw pe mlom kuas puamtsuaj taag.

⁴Tej thaaj fij khoom hab tej thaaj hlawv tshuaj tsw qaab yuav raug rhuav kuas tawg taag. Txhua tug tuabneeg yuav raug tua tuag taag rua ntawm puab tej mlom.

⁵Kuv yuav muab Yixalayees cov tuabneeg tuag tso rua ntawm puab tej mlom hauv ntej; kuv yuav muab puab tej pobtxhaa tso pawg lug puagncig puab tej thaaj.

⁶Cov Yixalayees tej nroog yuav raug rhuav puamtsuaj taag, puab tej thaaj hab puab tej mlom yuav raug tsoo kuas tawg ntsoog ntxawg, puab tej thaaj hlawv tshuaj tsw qaab los yuav tawg taag, hab tej num kws puab ua yuav pluj moog.

⁷Yuav muaj tuabneeg tuag pawg lug txhua qhov, ces mej cov kws seem yuav paub has tas, kuv yog tug TSWV.

⁸“Kuv yuav ca ibtxha tsiv dlim tsi raug tua hab yuav coj puab moog nrug lwm tsaav tuabneeg nyob,

⁹puab yuav moog ua tuabneeg poob tebchaws. Thaus ntawd puab yuav ncu txug kuv, hab paub has tas kuv yog tug kws rau txim rua puab hab ua rua puab poob ntsejmuag vim puab tsi muab sab npuab kuv, puab tso kuv tseg hab moog pe mlom. Ces puab yuav rov ntxub puab, vim tej kev phem kev qas kws puab tau ua taag lug lawm.

¹⁰Puab yuav paub has tas kuv yog tug TSWV, hab kuv tej lug yog lug tseeb tsi yog laam has.”

¹¹Tug TSWV kws kaav ib puas tsaav yaam has tas, “Koj ca le npuaj teg ntaug taw hab quaj tu sab nrho, vim tej kev phem kev qas hab tej kev pe dlaab pe mlom kws cov Yixalayees tau ua. Puab yuav tuag taag rua huv tshaav rog lossis kev tshaib kev nqhes lossis kev mob kev nkeeg.

¹²Cov kws nyob dleb yuav tuag rua kev mob kev nkeeg; cov kws nyob ze yuav raug tua tuag rua huv tshaav rog; cov kws dlim huv tshaav rog los yuav tuag rua kev tshaib kev nqhes. Puab yuav raug kuv txujkev chim kws luj kawg nkaus.

¹³Thaus mej pum tej tuag nyob ntawm tej mlom hab nyob puagncig tej thaaj, thoob plawg rua sau tej pov roob sab, sau tej ncov roob, huv qaab txhua tsob ntoo kws muaj nplooj tsaus nti, huv qaab txhua tsob ntoo qheb, hab txhua qhov chaw kws puab hlawv khoom fij rua puab tej mlom. Ces mej txhua tug yuav paub has tas kuv yog tug TSWV tag.

¹⁴Kuv yuav tsaa teg tawmtsaam puab hab ua kuas puab lub tebchaws raug puamtsuaj. Kuv yuav ua kuas lub tebchaws ua tsi tau noj, txij kag nraag taj suabpuam lug txug ndlua peg lub nroog Linpelas kws nyob rua saab qaumteb, hab yuav tsi tseg chaw rua cov Yixalayees nyob le. Ces mej txhua tug yuav paub has tas kuv yog tug TSWV.”