Read Hmong Njua Exekees 7 Bible Online

Exekees 7 - Hmong Njua bible

Exekees 7

¹Tug TSWV has rua kuv tas:

²“Tub noobneej, kuv yog tug TSWV kws kaav ib puas tsaav yaam, kuv has tej lug nuav rua cov Yixalayees lub tebchaws: nub kawg lug txug lub tebchaws lawm!

³“Cov Yixalayees, nub kawg tub lug txug lawm. Mej yuav raug kuv txujkev chim, rua qhov kuv yuav txav txim rua mej pauj tej kev phem kev qas kws mej tau ua taag lug lawm.

⁴Kuv yuav tsi tseg mej hab tsi taabncuab mej le. Kuv yuav rau txim rua mej vim tej kev phem kev qas kws mej tau ua, mej txhaj paub has tas kuv yog tug TSWV.”

⁵Tug TSWV kws kaav ib puas tsaav yaam has tas: “Yuav muaj kev siv kev npug lug raug mej ib yaam taag ib yaam tuaj.

⁶Nub kawg lug txug lawm, nub kawg lug txug lawm. Kev siv kev npug zag kawg lug tawmtsaam mej lawm. Nwg lug txug lawm.

⁷Nub kawg lug txug rua mej cov tuabneeg kws nyob huv lub tebchaws nuav lawm. Lub sijhawm lug txug lawm, yuav tsi muaj pe mlom hab kev lomzem nyob sau tej roob, tabsis tsuas muaj kev nyuaj sab lawm xwb.

⁸“Tshuav tsi ntev lawm mej yuav raug kuv txujkev chim. Kuv yuav rau txim pauj tej kev phem kev qas kws mej tau ua taag lug.

⁹Kuv yuav tsi tseg mej hab tsi taabncuab mej le. Kuv yuav rau txim rua mej vim tej kev phem kev qas kws mej tau ua, mej txhaj paub has tas, kuv yog tug TSWV hab yog tug kws rau txim rua mej.”

¹⁰Nub kws muaj kev puamtsuaj lug txug lawm. Kev siv kev npug taabtom fuam luj zuj zug hab kev khaavtheeb muaj tshwm tuaj.

¹¹Kev siv kev npug fuam luj zuj zug moog ua kev phem kev qas. Puab tej kev muaj txag npluanuj, kev ua num ua tswv hab kev muaj koob muaj meej yuav pluj moog taag.

¹²Lub sijhawm lug txug lawm. Tug kws muag khoom los tsi xob tu sab, tug kws yuav khoom los tsi xob zoo sab, rua qhov Vaajtswv txujkev txav txim yuav lug raug txhua tug huv tuabsi.

¹³Yaam kws tej tub laag tub luam muab muag lawm, puab yeej muab tsi tau rov lug taag puab simneej, rua qhov Vaajtswv yuav txav txim rua txhua tug tsi zaam le. Cov tuabneeg kws ua phem ua qas yuav tsi muaj ib tug muaj sa nyob.

¹⁴Thaus luas tshuab xyu suavdlawg yeej npaaj txhij lawm, tabsis tsi muaj leejtwg kaam moog ntaus rog, vim le ntawd Vaajtswv txujkev chim txhaj yuav lug raug txhua tug huv tuabsi.

¹⁵Nyob saab nrau muaj kev sis ntaus sis tua txhua qhov, nyob saab huv muaj kev mob kev nkeeg hab kev tshaib kev nqhes. Tug kws nyob tom teb yuav tuag rua nav ntaaj nav rag, hab tug kws nyob huv nroog los yuav tuag rua kev mob kev nkeeg hab kev tshaib kev nqhes.

¹⁶Muaj ibtxha yuav tsiv dlim moog rua sau tej hauv roob ib yaam le tej nquab kws ntshai hab yaa huv haav lug. Puab yuav quaj tu sab rua puab tej kev txhum.

¹⁷Puab tej npaab yuav tsaug leeg hab puab tej hauvcaug yuav tshee tsi muaj zug.

¹⁸Puab yuav muab ntaub tsaaj lug npua hab quaj tshee nyo. Puab yuav muab puab tej plaubhau chais hab puab yuav raug kev txaajmuag.

¹⁹Puab yuav muab puab tej nyaj tej kub povtseg rua huv plawv kev, ib yaam le tej lamsim. Vim tej nyaj tej kub ntawd paab tsi tau puab dlim ntawm tug TSWV txujkev chim kws luj kawg nkaus. Tej nyaj tej kub kws puab muaj los yeej dlaws tsi tau puab txujkev tshaib nqhes hab paab tsi tau kuas puab muaj kev txaus sab. Tej nyaj tej kub ntawd tsuas yog ua kuas puab moog ua kev txhum xwb.

²⁰Puab khaavtheeb rua puab tej saw nyaj saw kub kws zoo nkauj, tabsis puab siv tej ntawd nchuav ua tej mlom kws phem qas. Vim le ntawd tug TSWV txhaj muab puab tej nyaj tej kub tig moog ua kev phem tawmtsaam puab.

²¹Tug TSWV has tas, “Kuv yuav ca lwm tsaav tuabneeg tuaj fuab ib puas tsaav yaam kws puab muaj. Cov tuabneeg kws tsi ncaaj nceeg yuav tuaj txeeb puab tej nyaj txag hab coj moog siv ua kev phem kev qas.

²²Thaus tubsaab tuaj tsoo nkaag moog ua tsi huv rua lub Tuamtsev, hab nqaa tej khoom tsimtxaj moog ua kev phem kev qas los kuv yeej yuav tsi quavntsej puab le.

²³“Muaj kev kub ntxhuv, kev sis ntaus sis tua thoob lub tebchaws hab muaj kev siv kev npug nyob txhua lub nroog.

²⁴Kuv yuav coj lwm tsaav tuabneeg kws ua phem kawg nkaus tuaj rua huv mej lub tebchaws hab ca puab txeeb mej tej vaaj tse. Thaus kws kuv tso lwm tsaav tuabneeg tuaj ua tsi huv rua mej lub Tuamtsev, mej cov tuabneeg kws muaj zug heev yuav ua tsi tau dlaabtsi.

²⁵Kev txhawj kev ntshai lug txug lawm. Mej yuav nrhav kev thaajyeeb, tabsis yuav nrhav tsi tau le.

²⁶Kev siv kev npug ib yaam taag ib yaam tuaj, hab yuav muaj xaiv muaj lug has tsi paub taag. Mej yuav thov cov cev Vaajtswv lug kuas cev Vaajtswv lug rua mej, tabsis Vaajtswv tsi lug qha rua puab lawm. Cov povthawj yuav tsi muaj lug dlaabtsi qha rua cov tuabneeg hab cov txwjlaug los yuav tsi muaj tswvyim tuavxaam lawm.

²⁷Vaajntxwv yuav quaj ntsuag, tej numtswv yuav taag kev ca sab hab cov pejxeem yuav ntshai tshee quas nyo. Kuv yuav rau txim rua mej, vim tej kws mej tau ua taag lug lawm, kuv yuav txav txim rua mej ib yaam le mej tau txav txim rua lwm tug lawm. Mej txhaj paub has tas kuv yog tug TSWV.”