Read Hmong Njua Exekees 9 Bible Online

Exekees 9 - Hmong Njua bible

Exekees 9

¹Kuv nov Vaajtswv hu nrov nrov has tas, “Mej cov kws yuav rau txim rua lub nroog, ca le lug ntawm nuav, coj mej tej cuabyeej ua rog nrug mej.”

²Taamsim ntawd txawm muaj rau tug txivneej tawm ntawm lub roojvaag saab peg lug. Puab txhua tug puavleej nqaa cuabyeej ua rog hab tig ndlag rua saab qaumteb. Muaj ib tug txivneej naav rig tsho ntaub maag nrug puab paab ntawd lug, nwg tuav rawv ib lub thauv kua cwjmem. Puab lug sawv rua ntawm lub thaaj tooj.

³Cov Yixalayees tug Vaajtswv tug tshwjchim kws ci ntsaa ab txawm tawm ntawm tug qhelunpees kws yog nwg qhov chaw moog rua ntawm txujkev kws moog rua huv lub Tuamtsev. Tug TSWV hu tug txivneej kws naav rig tsho ntaub maag has tas:

⁴“Koj ca le moog kuas thoob plawg lub nroog Yeluxalees hab nas cim rua txhua tug kws muaj kev txomnyem nyuaj sab hauvplaj, vim tej kev phem kev qas kws puab ua huv lub nroog.”

⁵Hab kuv nov Vaajtswv has rua paab tuabneeg ntawd tas, “Mej ca le caum tug txivneej ntawd qaab moog kuas thoob lub nroog hab tua txhua tug, tsi xob zaam hab tsi xob taabncuab leejtwg le.

⁶Lojxov tua cov yawm laug, cov tub hluas, cov ntxhais hluas, cov quaspuj hab cov mivnyuas huv tuabsi. Tabsis mej tsi xob ua le caag rua cov kws muaj lub cim nas rua ntawm hauvplaj lawm. Mej ca le pib tua ntawm kuv lub Tuamtsev nuav moog!” Puab txawm pib tua cov thawjcoj kws sawv ntawm lub Tuamtsev.

⁷Vaajtswv has rua puab tas, “Mej ca le ua kuas lub Tuamtsev tsi huv. Coj tej tuabneeg tuag lug tso pawg lug rua huv tej chaav. Mej ca le nqeg teg ua num!” Ces puab txawm pib tua cov tuabneeg kws nyob huv nroog.

⁸Thaus puab tseem tua cov tuabneeg ntawd, kuv nyob tuab leeg xwb. Kuv txhus caug ndlua nyo ua ntsejmuag ti nkaus huv aav hab quaj thov has tas, “Tug TSWV kws kaav ib puas tsaav yaam, koj chim heev rua lub nroog Yeluxalees, ces koj txawm yuav muab cov pejxeem kws seem huv tebchaws Yixalayees tua kuas tuag taag le los?”

⁹Vaajtswv teb has tas, “Cov Yixalayees hab cov Yudas tau ua txhum hab muaj txim luj heev. Puab tua tuabneeg txhua qhov thoob plawg lub tebchaws hab puab sis ntaus sis tua puv nkaus huv lub nroog Yeluxalees. Puab has tas kuv kws yog tug TSWV tub tso puab lub tebchaws tseg lawm, kuv yeej tsi pum puab le.

¹⁰Tabsis kuv yuav tsi tseg puab hab taabncuab puab le; kuv yuav ua pauj rua puab ib yaam le puab tau ua rua lwm tug lawm.”

¹¹Ces tug txivneej kws naav rig tsho ntaub maag rov lug has rua tug TSWV has tas, “Kuv tub moog ua tav lawv le koj tej lug saamfwm lawm.”