Read Hmong Njua Daniyees 1 Bible Online

Daniyees 1 - Hmong Njua bible

Daniyees 1

¹Thaus kws Yehauyakhees ua vaajntxwv kaav tebchaws Yudas tau peb xyoos lawm, mas Vaajntxwv Nenpukajnexales kws kaav tebchaws Npanpiloos tau tuaj vij hab tua lub nroog Yeluxalees.

²Tug TSWV ca Nenpukajnexales tuaj nteg tau Vaajntxwv Yehauyakhees hab coj qee yaam khoom tseemceeb kws nyob huv lub Tuamtsev moog lawm. Nwg tseem nteg tau ib cov tuabneeg coj moog rua tim nwg lub tsev teev dlaab kws nyob huv lub nroog Npanpiloos, hab muab tej khoom tseemceeb ntawd moog tso rua huv tej chaav rau khoom huv lub tsev teev dlaab ntawd.

³Vaajntxwv Nenpukajnexales saamfwm kuas Asenpenas kws yog tug thawj saib nwg lub loog, moog xaiv cov tub hluas Yixalayees kws puab nteg tau lug ntawd, qee leej kws yog caajceg vaajntxwv hab yog caajceg ua num ua tswv tuaj kawm txujci.

⁴Cov hluas ntawd yuavtsum yog cov kws zoo nraug, muaj tswvyim zoo, kawm paub ntau yaam, kawm tau sai hab yog tuabneeg tsi muaj mob, puab txhaj le yuav moog ua tau num nyob huv vaajntxwv lub loog. Asenpenas yuavtsum tau qha cov hluas ntawd kuas txawj nyeem hab sau tau cov tuabneeg Npanpiloos cov ntawv.

⁵Vaajntxwv has kuas luas naj nub muab zaub mov hab cawv txiv maab kws qaab heev, ib yaam le cov kws luas muab rua cov tuabneeg kws nyob huv vaajntxwv lub loog noj hab haus, rua cov hluas ntawd noj hab haus. Thaus puab kawm puv peb lub xyoos hab tav lawm, yuav coj puab moog cuag vaajntxwv.

⁶Cov hluas kws luas xaiv moog ntawd muaj npe le nraag nuav: Daniyees, Hananiyees, Misayees hab Axaliyas, puab cov nuav puavleej yog caajceg ntawm xeem Yudas.

⁷Tug thawj kws saib vaajntxwv lub loog, muab puab tis dlua npe hu le nuav: Npeetesaxas, Sadalas, Mesakas hab Anpenekaus.

⁸Daniyees tsi xaav ua rua nwg lub cev tsi huv, nwg txhaj xaav has tas, nwg yuav tsi noj tej zaub mov hab tsi haus tej cawv txiv maab kws nyob huv vaajntxwv lub loog. Yog le ntawd, nwg txhaj thov kuas Asenpenas paab nwg.

⁹Vaajtswv ua rua Asenpenas nyam hab hlub Daniyees.

¹⁰Asenpenas tseem ntshai vaajntxwv hab, nwg txhaj has rua Daniyees has tas, “Vaajntxwv has kuas koj noj hab haus tej nuav. Yog koj tsi noj, thaus vaajntxwv pum has tas, koj tsi puv le lwm tug tub hluas, tej zag vaajntxwv yuav muab kuv tua povtseg los tsi paub.”

¹¹Yog le ntawd, Daniyees txhaj moog cuag tug kws Asenpenas tsaa ua tug saib Daniyees hab nwg peb tug phoojywg.

¹²Daniyees has tas, “Thov ca koj sim peb, koj muab zaub hab mov rua peb noj hab muab dlej rua peb haus moog txug kaum nub tsaiv.

¹³Ces koj ua tuab zoo saib peb hab cov tub hluas kws noj vaajntxwv tej zaub mov, saib peb txawv puab le caag los tsi txawv, koj txhaj paub has tas tsimnyog yuavtsum noj yaam dlaabtsi zoo dlua.”

¹⁴Tug kws saib Daniyees puab txhaj pum zoo ca puab sim kaum nub saib zoo le caag.

¹⁵Thaus puv kaum nub lawm, ua cav nwg pum has tas, Daniyees puab puv hab muaj zug tshaaj cov tub hluas kws noj vaajntxwv tej zaub mov.

¹⁶Yog le ntawd, tug kws saib Daniyees puab txhaj tsi muab vaajntxwv tej zaub mov rua puab noj lawm, tabsis nwg muab zaub, mov hab dlej rua puab noj hab haus lawm xwb.

¹⁷Vaajtswv pub plaub tug hluas ntawd muaj kev txawj ntse, kawm ntawv tau zoo hab paub ntau yaam txujci. Hab Vaajtswv tseem pub rua Daniyees txawj txhais tej ywgtoog hab tej npau suav.

¹⁸Thaus txwm nkaus peb lub xyoos kws vaajntxwv teem ca lawm, Asenpenas txawm coj taagnrho cov tub hluas kws nwg xaiv ntawd moog cuag Vaajntxwv Nenpukajnexales.

¹⁹Vaajntxwv nrug puab txhua tug thaam, mas nwg pum has tas Daniyees, Hananiyas, Misayees, hab Axaliyas puab ntse tshaaj lwm tug, mas vaajntxwv txhaj muab puab lug ua num nyob huv nwg lub loog.

²⁰Txhua yaam kws vaajntxwv nug puab, puab paub taagnrho. Vaajntxwv pum has tas, puab plaub leeg ntawd teb tau zoo dlua cov tuabneeg kws txawj saib teg lossis txawj ua yeegsiv kws nyob huv vaajntxwv lub tebchaws kaum npaug lawm.

²¹Daniyees ua num nyob huv vaajntxwv lub loog moog txug thaus Xailas kws yog tug vaajntxwv kaav tebchaws Pawxias, tuaj tua yeej hab txeeb tau lub tebchaws Npanpiloos.