Read Hmong Njua Daniyees 10 Bible Online

Daniyees 10 - Hmong Njua bible

Daniyees 10

¹Thaus kws Xailas ua vaajntxwv kaav tebchaws Pawxias tau peb xyoos lawm, Vaajtswv qha ib zaaj lug rua Daniyees tug kws muaj dlua ib lub npe hu ua Npeetesaxas. Tej lug ntawd yog lug tseeb, tabsis tsi yoojyim totaub. Vaajtswv lug qha tej lug ntawd lub ntsab rua Daniyees paub huv nruab npau suav.

²Daniyees has tas, lub sijhawm ntawd kuv nyuaj sab tau peb lub limtam.

³Kuv noj dlaabtsi los tsi qaab, ib txhais nqaj los kuv tsi noj, ib paas kua txiv maab los kuv tsi haus. Tau peb lub limtam nkaus kuv tsi pleev tshuaj tsw qaab hab tsi ntsis plaubhau le.

⁴Xyoo ntawd, thawj lub hlis nub neeg nkaum plaub, kuv taabtom sawv ntawm tug Dlej luj Tikis.

⁵Kuv tsaa qhovmuag saib pum ib tug tuabneeg naav rig tsho ntaub maag, hab sa ib txuj hlaab kub.

⁶Nwg lub cev ci nplaag ib yaam le tej hlaws muaj nqes. Nwg lub ntsejmuag ci ib yaam le tsaglig xub, nwg lub qhovmuag ci ib yaam le suavtawg. Nwg ob txhais npaab hab ob txhais ceg ci pum kev laam lug ib yaam le tej tooj lab kws luas muab txhuam ci ci lawm. Hab nwg lub suab has lug nrov npaum nkaus le ib paab tuabneeg coob coob lub suab nrov.

⁷Kuv tuab leeg pum zaaj ywgtoog nuav xwb. Cov tuabneeg kws nrug kuv nyob ua ke, puab tsi pum dlaabtsi le, tabsis puab ntshai kawg, puab tsiv moog nkaum taag lawm.

⁸Tshuav kuv tuab leeg nyob saib zaaj ywgtoog kws txawv txawv nuav xwb. Kuv ib ce tsaug tsi muaj zug le lawm. Kuv lub ntsejmuag thumxem taag, tsi muaj leejtwg cim tau kuv le.

⁹Thaus kuv nov nwg has lug, kuv ca le qaug rua huv aav hab nov qaab hlas lawm.

¹⁰Tabsis muaj ib txhais teg lug tsaa kuv sawv txhus caug ndlua, kuv ib ce tshee nyo.

¹¹Tug timtswv ceebtsheej has rua kuv tas, “Daniyees, Vaajtswv hlub koj heev. Koj ca le sawv hab ua tuab zoo noog kuv tej lug. Vaajtswv khaiv kuv lug cuag koj.” Thaus nwg has le ntawd taag, kuv txawm sawv ntsug ib ce tshee nyo.

¹²Nwg has rua kuv tas, “Daniyees, koj tsi xob ntshai! Thawj nub kws koj txu koj lub fwjchim hab tsaa suab thov Vaajtswv kuas koj totaub zaaj nuav lub ntsab. Nwg tub nov koj tej lug thov lawm. Kuv lug teb koj tej lug thov ntawd ntaag.

¹³Tabsis tug timtswv kws zuv lub tebchaws Pawxias tawmtsaam kuv tau neeg nkaum ib nub nkaus. Tom qaab ntawd Mikhayees kws yog ib tug thawj ntawm cov timtswv ceebtsheej txhaj lug paab kuv, ces kuv txawm tso Mikhayees tawmtsaam nrug tug timtswv kws zuv lub tebchaws Pawxias.

¹⁴Kuv lug has qha koj paub tej kws yuav muaj tshwm lug yaav tom ntej nuav hab yuav muaj lug raug koj tsaav tuabneeg. Tej kws koj tau ua ywgtoog pum ntawd yog tej kws yuav tshwm lug yaav tom ntej nuav ntaag.”

¹⁵Thaus nwg has le ntawd, kuv txawm nyo taubhau rua huv aav, kuv has tsi tau ib lu lug le.

¹⁶Tug timtswv ceebtsheej kws muaj ntsiv zoo le tug tuabneeg txawm cev teg kov kuv dlaim tawv ncauj. Kuv txhaj has rua nwg tas, “Tug Tswv, zaaj ywgtoog nuav ua rua kuv ib ce tshee nyo tsi muaj zug le lawm.

¹⁷Kuv zoo ib yaam le tug tubqhe kws sawv ntawm nwg tug tswv xubndlag. Kuv yuav has le caag rua koj, rua qhov kuv tub tsi muaj zug hab ua tsi taug paa le lawm.”

¹⁸Nwg txawm rov kov kuv dlua ib zag ntxiv, kuv txhaj le muaj zug mivntsiv tuaj.

¹⁹Nwg has rua kuv tas, “Vaajtswv hlub koj heev, yog le ntawd, koj tsi xob txhawj lossis ntshai, ca le ua sab luj.” Thaus nwg has le ntawd taag, kuv noog zoo le kuv lub cev txawm muaj zug tuaj, ces kuv txhaj has rua nwg tas, “Tug Tswv, thov koj ca le qha tej kws koj yuav has ntawd rua kuv. Koj tub paab kuv muaj zug mivntsiv lawm.”

²⁰Nwg teb has tas, “Koj puas paub has tas, yog vim le caag kuv txhaj le tuaj nrhav koj? Nub nua yog kuv tuaj qha rua koj paub txug tej kws tub muab sau tseg rua huv Phoo Ntawv kws yog Lug Tseeb lawm. Taamsim nuav, kuv yuavtsum tau rov qaab moog tawmtsaam tug timtswv kws zuv lub tebchaws Pawxias. Hab tom qaab ntawd tug timtswv kws zuv lub tebchaws Kilis yuav tuaj, yeej tsi muaj leejtwg yuav paab tau kuv, tsuas yog Mikhayees tuab leeg kws yog tug timtswv saib cov Yixalayees, txhaj le paab tau kuv xwb.”