Read Hmong Njua Daniyees 11 Bible Online

Daniyees 11 - Hmong Njua bible

Daniyees 11

¹“Nwg yog tug kws paab hab tiv thaiv kuv. Tej lug kws kuv qha rua koj paub nuav yog lug tseeb tag.”

²Tug timtswv ceebtsheej has tas, “Yuav muaj dlua peb tug vaajntxwv lug kaav tebchaws Pawxias. Tom qaab ntawd, tug vaajntxwv plaub yuav lug kaav, nwg yuav muaj txag npluanuj heev dlua lwm tug vaajntxwv. Thaus nwg muaj fwjchim hab muaj txhua tsaav txhua yaam txhij lawm, nwg yuav moog ntaus lub tebchaws Kilis.

³“Tom qaab ntawd yuav muaj dlua ib tug vaajntxwv kws sab tawv heev lug kaav ntau lub tebchaws. Nwg yuav ua ib puas tsaav yaam lawv le nwg lub sab nyam.

⁴Thaus kws nwg muaj fwjchim heev lawm, tej tebchaws kws nwg kaav yuav tawg ua plaub paab, hab nwg caajceg yuav tsi tau ua vaajntxwv kaav tebchaws lawm, tabsis luas lwm tug yuav lug kaav. Puab cov ntawd yuav tsi muaj fwjchim luj npaum le nwg.

⁵“Tug vaajntxwv kws kaav lub tebchaws Iziv yuav muaj fwjchim heev, tabsis nwg cov thawj tubrog muaj ib tug tseem muaj fwjchim luj dlua nwg, mas tug ntawd yuav kaav ntau lub tebchaws.

⁶Tom qaab ntawd ntau xyoo, tug vaajntxwv kws kaav lub tebchaws Iziv yuav moog nrug tug vaajntxwv kws kaav lub tebchaws Xilias sis raug zoo. Nwg yuav muab nwg tug ntxhais rua tug vaajntxwv Xilias yuav ua quaspuj. Tabsis puab tsuas sis raug zoo ib ntus xwb. Tug ntxhais ntawd tug quasyawg, nwg tug tub hab cov tubkhai kws nrug nwg moog ntawd yuav raug luas muab tua povtseg taag huv tuabsi.

⁷Tom qaab ntawd nwg cov neejtsaa yuav muaj ib tug lug ua vaajntxwv kaav tebchaws. Tug ntawd yuav tawmtsaam cov Xilias tug vaajntxwv cov tubrog. Nwg yuav moog rua huv cov Xilias lub yeej hab yuav tua yeej puab.

⁸Nwg yuav muab puab tej mlom hab txhua yaam muaj nqes kws muab nyaj muab kub ua, hab muab fij rua tej vaajtswv lawm, nqaa huv tuabsi moog rua nraag tebchaws Iziv. Ob peb xyoos tom qaab kws lub tebchaws tsi muaj kev sis ntaus sis tua lawm,

⁹cov Xilias tug vaajntxwv maam le txhij tubrog moog tua lub tebchaws Iziv. Tabsis vaajntxwv Iziv yuav tua vaajntxwv Xilias cov tubrog swb hab thim rov qaab.

¹⁰“Cov Xilias tug vaajntxwv cov tub npaaj yuav ua rog hab txhij tau ib paab tubrog coob heev ua npoj ntwg. Cov tubrog ntawd, muaj ib tug yuav sau hlo cov tubrog tuaj yaam le nthwv dlej ntsawj moog dlhau plawg rua huv yeebncuab lub yeej hab ntaus puab tawg rhe.

¹¹Cov Iziv tug vaajntxwv yuav chim heev, nwg txhij tubrog tuaj tua cov Xilias tug vaajntxwv hab nteg tau nwg cov tubrog coob coob coj lug ua qhev.

¹²Cov Iziv tug vaajntxwv khaavtheeb heev, rua qhov nwg moog ntaus yeej rog, hab tua luas tej tubrog tuag coob leej, tabsis tsi yog nwg yuav kovyeej moog le.

¹³“Cov Xilias tug vaajntxwv yuav rov txhij tubrog coob tshaaj cov qub tuaj ntxiv. Thaus zoo nub zoo nyoog lawm, nwg hab nwg cov tubrog kws muaj tej cuabyeej ua rog khov kho, maam le rov qaab tuaj ntaus dlua.

¹⁴Thaus ntawd yuav muaj ntau leej sawv tawmtsaam cov Iziv tug vaajntxwv. Daniyees, koj cov tuabneeg kws tsiv tsaim heev, ibtxha yuav ntxeev sab, vim puab tub ua ywgtoog pum lawm, tabsis puab yuav swb luas.

¹⁵Cov Xilias tug vaajntxwv yuav tuaj vij hab txeeb tau ib lub nroog kws muaj ntsaa yeej khov kho thaiv. Cov tubrog Iziv yuav tua tsi yeej, txawm yog cov tubrog Iziv kws txawj tua rog heev los yuav tua tsi yeej.

¹⁶Cov Xilias yuav ua ib puas tsaav yaam lawv le puab lub sab nyam, yuav tsi muaj leejtwg cheem tau puab. Puab yuav tuaj nyob huv lub tebchaws kws Vaajtswv coglug tseg has tas, nwg yuav muab rua cov Yixalayees, hab puab yuav kaav taagnrho lub tebchaws ntawd.”

¹⁷“Cov Xilias tug vaajntxwv yuav tuav tswvyim hab txhij taagnrho nwg cov tubrog moog tua cov Iziv tug vaajntxwv. Nwg yuav moog nrug cov yeebncuab sis coglug, hab yuav muab nwg tug ntxhais rua cov Iziv tug vaajntxwv yuav ua quaspuj. Nwg yuav ua le ntawd, nwg txhaj tau kev moog rhuav cov yeebncuab lub tebchaws kuas puamtsuaj, tabsis nwg yuav ua tsi tau lawv le nwg lub sab xaav tseg.

¹⁸Ces tom qaab ntawd nwg yuav moog ua rog rua cov tebchaws kws nyob lawv ntug havtxwv, txeeb kuas tau ntau lub tebchaws. Tabsis muaj ib tug thawj tubrog kws yog dlua lwm tsaav tuabneeg yuav tuaj tua yeej nwg, ua rua nwg poob ntsejmuag heev. Tug thawj tubrog ntawd yuav pauj vaajntxwv txujkev khaavtheeb rov rua vaajntxwv.

¹⁹Cov Xilias tug vaajntxwv yuav rov moog rua peg nwg cov yeej kws nyob huv nwg lub tebchaws, tabsis nwg yuav swb luas hab nwg lub koob meej yuav pluj moog.

²⁰“Tom qaab ntawd yuav muaj dlua ib tug lug ua vaajntxwv. Tug vaajntxwv ntawd yuav khaiv ib tug nom moog quab yuam cov pejxeem them se, kuas nwg lub tebchaws txhaj le muaj txag npluanuj. Tom qaab ntawd tug vaajntxwv nuav yuav raug luas nyag tua povtseg, tsi yog raug tua tuag taabmeeg rua suavdlawg pum lossis tuag rua huv tshaav rog.”

²¹Tug timtswv ceebtsheej ntawd qha ntxiv has tas, “Tug vaajntxwv tshab kws yuav lug kaav tebchaws Xilias ntawd yog ib tug tuabneeg limham heev. Nwg yeej tsi muaj feem tau lug ua vaajntxwv, tabsis ib simfuam xwb nwg ca le tau lug ua vaajntxwv. Nwg yuav dlaag hab txeeb tau luas tej fwjchim.

²²Txhua tug kws tawmtsaam nwg, txawm yog tug Povthawj Hlub kws ua Vaajtswv teg num los yeej yuav raug tshem moog.

²³Nwg yuav moog ntxag lwm tsaav tuabneeg nrug nwg sis raug zoo. Txawm yog nwg kaav ib tsaav tuabneeg tsawg tsawg xwb los nwg yuav muaj zug heev zuj zug.

²⁴Nwg yuav nyag kev moog tua ib lub xeev kws vaammeej heev, hab nwg ua tej yaam kws nwg cov yawmkoob tsi tau ua dlua le. Nwg yuav muab tej kws nwg moog txeeb tau lug ntawd faib rua nwg paab nwg pawg xwb. Nwg npaaj moog ntaus luas tej yeej, tabsis nwg tsuas ua tau le ntawd ib ntus xwb.

²⁵“Nwg muaj lub sab tawv hab txhij tubrog coob heev moog ntaus tug vaajntxwv kws kaav lub tebchaws Iziv, hab nwg tsi ntshai leejtwg le. Cov Iziv tug vaajntxwv los yuav txhij cov tubrog kws ua tau tshaaj hab muaj zug khov kho tuaj tiv thaiv, tabsis cov Iziv tug vaajntxwv yuav tua tsi yeej lawv le nwg lub sab xaav, rua qhov nwg raug luas dlaag ntxag xwb.

²⁶Nwg cov tuabneeg kws paab nwg tuav tswvyim yog cov kws yuav txuv nwg ntaag. Nwg cov tubrog yuav raug luas tua tuag coob.

²⁷Tom qaab ntawd, ob tug vaajntxwv nuav yuav nyob ua ke noj haus, tabsis obtug nyag taug nyag xaav yuav ua zaaj phem, ib tug yuav dlaag ib tug. Obtug yuav ua tsi tau lawv le obtug lub sab xaav, rua qhov tseem tsi tau txug lub sijhawm kws Vaajtswv teem ca.

²⁸Cov Xilias tug vaajntxwv yuav coj tej khoom kws nwg tuaj txeeb tau taagnrho rov moog rua peg nwg lub tebchaws. Nwg npaaj sab yuav rhuav txuj kevcai kws Vaajtswv tsaav tuabneeg coj. Nwg yuav ua lawv le nwg lub sab nyam tsaiv, nwg maam le rov qaab moog rua peg nwg lub tebchaws.

²⁹“Tom qaab ntawd nwg tseem npaaj sab yuav rov moog tua lub tebchaws Iziv dlua hab. Zag nuav yuav zoo tsi thooj le zag kws taag lug lawm.

³⁰Cov tubrog Loos yuav caij nkoj tuaj taav nwg kev, ua rua nwg ntshai heev. “Ces nwg yuav thim nwg cov tubrog hab chim heev rov lug. Nwg maam le lug tuav tswvyim rhuav Vaajtswv txuj Kevcai kws Vaajtswv tsaav tuabneeg coj. Nwg ua lawv le cov tuabneeg kws tub tso Vaajtswv txuj kevcai tseg lawm has.

³¹Nwg cov tubrog qee leej yuav moog ua tsi huv rua tug TSWV lub Tuamtsev. Puab tsi pub suavdlawg naj nub tua tsaj fij. Puab yuav muab yaam kws phem qas kawg nkaus hab tshawv saib tshaaj plawg lug teeb ca rua huv.

³²Tug vaajntxwv ntawd yuav ntxag tau cov tuabneeg kws tso Vaajtswv txuj kevcai tseg lawm, tabsis cov tuabneeg kws tseem muab sab npuab Vaajtswv, yuav nyob ruaj nreeg tiv.

³³Cov txwjlaug kws txawj ntse yuav qha puab tej kev txawj ntse rua ntau leej, tabsis cov txwjlaug ntawd qee leej yuav tuag rua nav ntaaj nav rag, qee leej yuav raug luas muab suavtawg hlawv tuag, qee leej yuav raug ntaus, raug fuab, hab coj moog ua qhev ib ntus.

³⁴Thaus taabtom muaj kev sis ntaus sis tua ntxhuv quas nyo ntawd, yuav muaj tuabneeg tuaj paab Vaajtswv tsaav tuabneeg qho mivntsiv. Txawm yog muaj tuabneeg tuaj paab le ntawd los puab yog cov tuabneeg kws tsi muaj lub sab paab tag tag.

³⁵Cov txwjlaug kws txawj ntse ntawd muaj qee leej yuav raug luas tua povtseg, tabsis tej nuav yog luas tshau Vaajtswv tsaav tuabneeg kuas huv tsi muaj txhum moog txug lub sijhawm kawg kws Vaajtswv teem ca.

³⁶“Tug vaajntxwv kws kaav lub tebchaws Xilias yuav ua lawv le nwg lub sab nyam. Nwg yuav khaav has tas, nwg muaj fwjchim luj dlua tej vaajtswv hab luj dlua Vaajtswv tug kws muaj fwjchim luj kawg nkaus. Nwg yuav ua le nuav moog txug thaus kws Vaajtswv rau txim rua nwg. Rua qhov Vaajtswv yeej yuav ua lawv le Vaajtswv tau teem tseg lawm.

³⁷Cov Xilias tug vaajntxwv yuav tsi quavntsej tug vaajtswv kws nwg cov yawmkoob ibtxwm teev lug, hab nwg yuav tsi quavntsej tug vaajtswv kws cov quaspuj nyam heev. Nwg yuav tsi quavntsej txug ib tug vaajtswv twg hlo le. Rua qhov nwg xaav has tas, nwg yog tug kws muaj fwjchim luj dlua tej ntawd huv tuabsi.

³⁸Thaus nwg tseg tsi teev tej vaajtswv kws has taag lug ntawd, nwg yuav teev tug vaajtswv kws tsomkwm tej yeej tubrog. Nwg yuav muab nyaj muab kub, muab tej qai zeb hab tej khoom kws muaj nqes coj moog fij rua tug vaajtswv kws nwg cov yawmkoob yeej ibtxwm tsi tau teev dlua le.

³⁹Nwg yuav siv cov tuabneeg kws teev lwm tug vaajtswv tuaj zuv nwg tej yeej. Nwg yuav muab lub meejmom sab rua cov tuabneeg kws ua nwg pejxeem. Nwg yuav tsaa puab ua cov numtswv luj hab yuav faib aav ua nqe zug rua puab.

⁴⁰“Thaus yuav taag lub sijhawm kws cov Xilias tug vaajntxwv kaav lub tebchaws, tug vaajntxwv kws kaav lub tebchaws Iziv yuav sau nwg cov tubrog tuaj tua tebchaws Xilias. Thaus ntawd cov Xilias tug vaajntxwv yuav sau taagnrho nwg cov tubrog huv tuabsi, tsi has tej tsheb ua rog, tej tubrog caij neeg hab tej nkoj ua rog yuav tsaus nti ib tog tuaj cuag dlej ndlwg tuaj ntaus ntau lub tebchaws.

⁴¹Nwg tseem yuav ntaus lub tebchaws kws Vaajtswv tau coglug tseg has tas, nwg yuav muab rua cov Yixalayees nyob. Yuav muaj tuabneeg tuag sis tsub sis nas txug quas txheeb quas vaam leej. Tabsis lub tebchaws Edoos, tebchaws Mau-am hab cov tuabneeg kws seem nyob huv lub tebchaws Amoos yuav tsiv dlim.

⁴²Cov Xilias tug vaajntxwv yuav ntaus ntau lub tebchaws, txawm yog tebchaws Iziv los nwg npaaj sab yuav moog ntaus hab.

⁴³Nwg yuav nqaa txhua yaam kws muab kub hab muab nyaj ua, hab txhua yaam khoom muaj nqes huv lub tebchaws Iziv moog. Nwg tseem yuav moog ntaus kuas yeej tebchaws Linpias hab tebchaws Sudaas huv tuabsi.

⁴⁴Tabsis nwg yuav nov xuv saab nubtuaj hab saab qaumteb tuaj ua rua nwg ntshai kawg, ces nwg yuav ntaus rog nyaav, mas tuabneeg yuav tuag coob heev.

⁴⁵Nwg tseem yuav tsaa nwg tej tsevntaub kws luj rua ntawm ntug havtxwv hab sau lub roob kws luas ua lub Tuamtsev ntu nruab nraab, tabsis nwg yuav tuag tuabywv tsi muaj leejtwg paab nwg le.”