Read Hmong Njua Daniyees 12 Bible Online

Daniyees 12 - Hmong Njua bible

Daniyees 12

¹Tug timtswv ceebtsheej kws naav rig tsho ntaub maag has tas, “Lub sijhawm ntawd Mikhayees kws yog tug timtswv ceebtsheej kws muaj fwjchim luj kws tsomkwm koj tsaav tuabneeg yuav lug. Thaus ntawd yuav muaj kev txomnyem kawg nkaus. Txij thaus chiv muaj tuabneeg lug moog txug naj nub nua yeej tsi tau muaj dlua kev txomnyem luj npaum le zag nuav. Thaus txug lub sijhawm ntawd koj tsaav tuabneeg txhua tug kws muaj npe sau rua huv Vaajtswv phoo ntawv yuav dlim.

²Cov tuabneeg kws tuag lawm, muaj coob leej yuav sawv rov qaab lug. Muaj ibtxha yuav tau txujsa ntev dlhawv moog ibtxhis tsi kawg, tabsis muaj ibtxha yuav raug kev txomnyem hab kev txaajmuag moog ibtxhis le.

³Cov txwjlaug kws txawj ntse yuav ci ntsaa ab ib yaam le tej dluab ci sau ntuj ntsuab. Hab cov tuabneeg kws qha tau ntau leej lug ua tuabneeg ncaaj nceeg, puab yuav ci ntsaa ab ib yaam le tej nubqub moog ibtxhis.”

⁴Tug timtswv ceebtsheej ntawd has rua kuv tas, “Daniyees, koj ca le kaw phoo ntawv ntawd, hab nas homthawj rua tsi pub nthuav moog txug lub sijhawm nplajteb kawg. Txij nuav moog muaj tuabneeg coob leej yuav siv zug nrhav kuas totaub txug tej yaam kws yuav tshwm lug, tabsis yuav nkim puab tug zug xwb.”

⁵Tom qaab ntawd kuv pum dlua ob tug txivneej sawv ntawm ntug dlej, ib leeg sawv ib saab ntug dlej.

⁶Muaj ib tug has rua tug timtswv ceebtsheej kws naav rig tsho ntaub maag hab sawv peg hauv dlej kws nrug dleb mivntsiv has tas, “Tshuav ntev le caag tej xwm kws txawv txawv nuav maam le dlua moog?”

⁷Tug timtswv ceebtsheej ntawd tsaa nwg ob txhais teg rua sau ntuj hab tuav Vaajtswv tug kws muaj sa nyob moog ibtxhis lub npe coglug. Kuv nov nwg has tas, “Yuav ntev peb xyoos hab rau hli. Thaus luas tsimtxom Vaajtswv tsaav tuabneeg dlhau lawm, mas ib puas tsaav yaam nuav maam le yuav dlua moog.”

⁸Kuv nov tej lug kws nwg has tabsis kuv tsi totaub, kuv txhaj nug has tas, “Tug Tswv, tej xwm nuav yuav dlua moog le caag?”

⁹Nwg teb kuv has tas, “Daniyees, koj moog tau lawm, rua qhov tej lug nuav luas yuav muab npog ca, tsi pub leejtwg paub moog txug thaus lub sijhawm kawg.

¹⁰Yuav muaj tuabneeg coob leej raug ntxuav kuas huv. Cov tuabneeg ua phem yuav tsi totaub, tabsis puab tsuas muaj ua phem moog le. Tsuas yog cov tuabneeg txawj ntse txhaj yuav totaub xwb.

¹¹“Txij nub kws luas tsi pub suavdlawg naj nub coj tsaj tuaj tua fij, hab luas muab yaam kws phem qas kawg nkaus kws ua kuas muaj kev kub ntxhuv coj lug teeb ca moog txug lub sijhawm kawg yuav ntev ib txheeb ob puas cuaj caum nub maam le dlua moog.

¹²Txhua tug kws muab sab npuab Vaajtswv yuav nyob ruaj khov moog dlhau ib txheeb peb puas peb caug tsib nub, hab puab yuav nyob kaaj sab lug.

¹³“Daniyees, koj los yuavtsum tau muab sab npuab Vaajtswv moog txug nub kawg. Koj yeej yuav tuag, tabsis thaus lub sijhawm nplajteb kawg koj yuav sawv rov lug txais koj tej nqe zug.”