Read Hmong Njua Daniyees 2 Bible Online

Daniyees 2 - Hmong Njua bible

Daniyees 2

¹Thaus Nenpukajnexales ua vaajntxwv tau ob xyoos, nwg txawm ua ib zaaj npau suav. Zaaj npau suav ntawd ua rua nwg ntxhuv sab heev hab pw tsi tsaug zug le.

²Yog le ntawd nwg txhaj hu cov tuabneeg kws txawj saib teg, txawj saib yaig hab txawj ntsuag xyaab, tuaj txhais nwg zaaj npau suav. Thaus puab tuaj txug lawm,

³nwg has rua puab tas, “Kuv ua ib zaaj npau suav tsi zoo, mas kuv ntxhuv sab heev, kuv xaav paub has tas, zaaj npau suav ntawd yog le caag hab has txug dlaabtsi?”

⁴Puab has lug Alamais rua vaajntxwv has tas, “Thov kuas vaajntxwv muaj txujsa nyob moog ibtxhis! Thov qha vaajntxwv zaaj npau suav rua peb, peb yuav txhais cov ntsab lug rua vaajntxwv paub.”

⁵Vaajntxwv has rua puab tas, “Kuv tub txav txim sab lawm has tas, yog mej pav tsi tau zaaj npau suav hab txhais tsi tau cov ntsab lug rua kuv paub, ces kuv yuav muab mej hlais ib dlaig zuj zug hab muab mej tej vaaj tse rhuav povtseg huv tuabsi.

⁶Tabsis yog mej qha hab txhais tau rua kuv, kuv yuav muab nqe zug hab pub koob meej rua mej. Mej ca le pav hab txhais rua kuv noog taamsim nuav.”

⁷Puab rov has rua vaajntxwv has tas, “Yog vaajntxwv pav vaajntxwv zaaj npau suav rua peb noog, peb txhaj yuav paub txhais zaaj npau suav ntawd.”

⁸Vaajntxwv teb has tas, “Kuv paub has tas, mej xaav sej kuv xwb, tabsis kuas mej paub has tas kuv tub has tseeb rua mej lawm,

⁹yog mej tsi pav zaaj npau suav rua kuv paub, ces mej txhua tug yuav raug txim ib yaam nkaus. Mej yeej tuavhuv lawm has tas, mej yuav dlaag kuv ntau yaam kuas kuv hloov kuv tej lug, tabsis kuv yeej tsi hloov hlo le. Mej ca le qha kuv zaaj npau suav rua kuv, kuv txhaj paub has tas, mej txawj txhais.”

¹⁰Puab has ntxiv rua vaajntxwv has tas, “Tej tuabneeg kws nyob huv nplajteb nuav yeej tsi muaj ib tug kws yuav qha tau tej kws koj has ko rua koj paub le. Hab tej vaajntxwv, tsi has tug kws yuav muaj fwjchim luj npaum le caag los yeej tsi muaj ib tug yuav has le koj has ko rua cov tuabneeg kws txawj saib teg, txawj ua yeegsiv hab txawj saib xyaab hlo le.

¹¹Tej lug kws koj nug ko nyuaj heev, tsi muaj leejtwg yuav teb tau rua koj, ntshai tsuas yog tej vaajtswv txhaj yuav teb tau xwb, tabsis tej vaajtswv ntawd yeej tsi nrug tuabneeg nyob ua ke.”

¹²Vim puab teb le ntawd, vaajntxwv txhaj chim heev. Nwg tau saamfwm kuas luas muab nwg cov tuavxaam tua povtseg huv tuabsi.

¹³Ces vaajntxwv txhaj tawm ib tsaab ntawv saamfwm rua suavdlawg paub has tas, kuas muab puab cov ntawd tua povtseg, lojxov Daniyees hab nwg peb tug phoojywg huv tuabsi.

¹⁴Daniyees txawm moog cuag Ali-aus kws yog tug thawj saib cov tubrog kws zuv vaajntxwv lub loog. Ali-aus yog tug kws vaajntxwv yuav tso moog tua vaajntxwv cov tuavxaam. Daniyees ua tuab zoo xaav ua ntej,

¹⁵nwg maam moog nug Ali-aus has tas, yog vim le caag vaajntxwv yuav tawm tsaab ntawv tawv ua luaj le ntawd? Ali-aus txhaj pav zaaj ntawd rua Daniyees noog.

¹⁶Daniyees moog cuag vaajntxwv taamsim ntawd. Nwg thov vaajntxwv kuas pub sijhawm ntev mivntsiv rua puab, nwg maam le qha hab txhais zaaj npau suav ntawd rua vaajntxwv.

¹⁷Daniyees rov qaab moog tsev hab nwg pav zaaj ntawd rua Hananiyees, Misayees, hab Axaliyas puab kws yog nwg peb tug phoojywg noog.

¹⁸Nwg has kuas puab thov Vaajtswv tug kws nyob sau ntuj taabncuab puab hab qha tej yaam kws tsi muaj leejtwg paub rua puab, kuas puab txhaj yuav tsi raug tua nrug cov tuavxaam kws nyob huv lub nroog Npanpiloos.

¹⁹Ces mo ntawd, Daniyees txawm ua ywgtoog pum hab Vaajtswv qha zaaj kws tsi muaj leejtwg paub ntawd rua Daniyees. Ces Daniyees ua Vaajtswv tug kws nyob sau ntuj tsaug:

²⁰“Vaajtswv yog tug txawj ntse hab muaj fwjchim luj! Ca le qhuas nwg moog ibtxhis.

²¹Vaajtswv yog tug tswj lub sijhawm hab tej caij nyoog; nwg tsaa hab txu tej vaajntxwv; nwg yog tug pub kuas tuabneeg muaj tswvyim hab txawj ntse.

²²Nwg muab tej kws tuabneeg tsi paub hab tsi pum lug nthuav qha rua suavdlawg; nwg paub tej kws nyob nraim nkoog huv qhov tsaus ntuj nti, hab muaj qhov pum kev ci kaaj nrig nyob puagncig nwg.

²³Kuv yawmkoob tug Vaajtswv, kuv ua koj tsaug hab fwm koj. Koj pub tswvyim hab dlaag zug rua kuv. Koj teb kuv tej lug thov hab ua rua peb paub teb vaajntxwv.”

²⁴Tom qaab ntawd Daniyees txhaj moog cuag Ali-aus tug kws vaajntxwv saamfwm kuas moog tua vaajntxwv cov tuavxaam. Daniyees has tas, “Thov tsi xob muab puab cov ntawd tua, ca le coj kuv moog cuag vaajntxwv, kuv yuav qha hab txhais nwg zaaj npau suav rua nwg.”

²⁵Ali-aus txhaj coj Daniyees moog cuag vaajntxwv hab has rua vaajntxwv has tas, “Kuv nrhav tau cov Yudais kws peb nteg lug ntawd, muaj ib tug yuav txhais tau koj zaaj npau suav.”

²⁶Vaajntxwv has rua Daniyees (tug kws muaj dlua ib lub npe hu ua Npeetesaxas) has tas, “Koj puas muaj cuabkaav qha tau kuv zaaj npau suav hab txhais cov ntsab lug rua kuv paub tag?”

²⁷Daniyees teb vaajntxwv has tas, “Vaajntxwv cov tuabneeg kws txawj saib xyaab, txawj ua yeegsiv hab txawj saib nubqub, yeej tsi muaj ib tug yuav paub txhais zaaj npau suav ntawd rua koj le.

²⁸Tsuas muaj Vaajtswv tuab leeg tug kws nyob sau ntuj, txhaj qha tau tej kws tsi muaj leejtwg paub nuav rua suavdlawg. Vaajntxwv, Vaajtswv qha tej kws yuav muaj lug yaav tom ntej nuav rua koj paub. Koj zaaj npau suav hab tej ywgtoog kws koj pum thaus koj tseem pw yog le nuav:

²⁹“Vaajntxwv, thaus koj pw tsaug zug ntawd, koj ua npau suav pum tej kws yuav muaj lug yaav tom ntej; hab Vaajtswv tug kws qha tau tej kws tsi muaj tuabneeg paub rua suavdlawg, nwg qha tej kws yuav muaj lug yaav tom ntej nuav rua koj.

³⁰Nwgnuav Vaajtswv tub qha tej yaam kws tsi muaj tuabneeg paub rua kuv lawm, tsi yog vim kuv txawj ntse dlua lwm tug, tabsis yog Vaajtswv xaav qha kuas koj paub zaaj npau suav ntawd hab tej kws koj xaav paub.

³¹“Vaajntxwv, koj ua ywgtoog pum ib tug mlom kws luj hab sab heev, sawv ntawm koj xubndlag. Tug mlom ntawd ci ntsaa ab hab txaus ntshai kawg le.

³²Tug mlom ntawd lub taubhau yog tseem kub, lub hauvsab hab ob txhais ncej npaab yog nyaj, lub dluav hab ob txhais ncej qaab ntug yog tooj lab,

³³ob txhais ceg yog hlau, hab ob txhais kutaw yog hlau xyaw aav nplaum.

³⁴Thaus kws koj taabtom saib tug mlom ntawd, txawm muaj ib lub pobzeb luj luj ndlais rhe sau pobtsuas lug kws tsi yog tuabneeg txhais teg ua poob lug raug tug mlom ntawd ob txhais kutaw kws yog hlau xyaw aav nplaum tawg ntsoog ntxawg.

³⁵Ces taamsim ntawd tej qhov kws yog aav nplaum, yog hlau, yog tooj lab hab yog nyaj yog kub, txawm tawg ntsoog ntxawg ua tej dlaim ib yaam le tej npluag nplej kws nyob huv tshaav ntaus nplej thaus lub caij ntuj qhua; ces cua muab ntsawj yaa taag lawm tsi tshuav ib qho le. Tabsis lub pobzeb kws poob lug raug tug mlom ntawd txawm luj zuj zug tuaj ua ib lub roob puv nkaus nplajteb.

³⁶“Koj zaaj npau suav muaj lawv le kuv has taag lug nuav. Nwgnuav kuv yuav qha zaaj npau suav ntawd lub ntsab rua vaajntxwv saib yog le caag.

³⁷Vaajntxwv, koj yog tug kws muaj fwjchim luj dlua lwm tug vaajntxwv huv tuabsi. Vaajtswv tug kws nyob sau ntuj tsaa koj ua fuabtais, nwg pub koj muaj fwjchim, muaj zug hab muaj koob meej nto moo lug.

³⁸Vaajtswv tsaa koj ua tug kaav txhua qhov kws muaj tuabneeg nyob, kaav ib puas tsaav yaam tsaj hab tej noog. Lub taubhau kub ntawd yog koj ntaag.

³⁹Tom qaab koj, yuav muaj dlua lwm lub tebchaws sawv lug, lub tebchaws ntawd muaj fwjchim yau dlua koj, hab tom qaab ntawd lub tebchaws peb kws yog cov tooj lab yuav sawv lug hab yuav kaav taagnrho lub nplajteb nuav.

⁴⁰Tom qaab ntawd, lub tebchaws plaub yuav sawv, lub tebchaws ntawd tawv ib yaam le hlau, rua qhov hlau tsoo hab ntaus ib puas tsaav yaam tawg taug. Vim lub tebchaws ntawd tawv ib yaam le hlau kws tsoo ib puas tsaav yaam tawg taug, mas nwg yuav tsoo hab ntaus cov tebchaws kws xub sawv ua ntej ntawd kuas tawg taag huv tuabsi.

⁴¹Txhais kutaw hab cov ntivtaw kws koj pum aav hab hlau sis xyaw ntxawg txhais has tas yuav muaj ntau lub tebchaws lug sis koom ua ke. Nwg yuav muaj qee yaam tawv ib yaam le hlau, rua qhov muaj hlau hab aav nplaum sis xyaw ntxawg.

⁴²Cov ntivtaw kws yog aav xyaw hlau, txhais has tas lub tebchaws ntawd ibtxha muaj zug hab ibtxha tsi muaj zug.

⁴³Qhov kws koj pum muaj aav nplaum xyaw hlau, txhais has tas cov thawjcoj kws kaav lub tebchaws ntawd yuav tso puab tej tub tej ntxhais sis yuav kuas nyob tau ua ke, tabsis puab yuav koom tsi tau ua ke ib yaam le hlau hab aav nplaum yeej tsi sis lu le.

⁴⁴Lub sijhawm kws cov numtswv ntawd tseem kaav tebchaws, Vaajtswv tug kws nyob sau ntuj yuav tsaa ib lub tebchaws kws yuav nyob moog tsi paub kawg le. Lub tebchaws ntawd yuav tsi muaj leejtwg kovyeej nwg, nwg yuav rhuav tej tebchaws ntawd kuas puamtsuaj taag, tabsis nwg yuav kaav moog ibtxhis.

⁴⁵Qhov kws koj pum ib lub pobzeb kws tsi yog tuabneeg txhais teg ua ndlais rhe poob sau pobtsuas lug raug tug mlom tuabneeg kws ib qhov yog hlau, ib qhov yog tooj lab, ib qhov yog aav, ib qhov yog nyaj hab ib qhov yog kub ntawd; yog Vaajtswv tug muaj fwjchim luj kawg nkaus qha kuas koj paub tej kws yuav muaj lug yaav tom ntej nuav. Koj zaaj npau suav muaj lawv le kuv has taag lug nuav. Nwgnuav kuv tub pav hab txhais koj zaaj npau suav lub ntsab meej rua koj lawm.”

⁴⁶Vaajntxwv Nenpukajnexales txhus caug ndlua huv aav pe Daniyees, hab nwg has kuas luas ca le muab qoobloo hab tshuaj tsw qaab tuaj fij rua Daniyees.

⁴⁷Vaajntxwv has tas, “Koj tug Vaajtswv yog tug kws muaj fwjchim luj dlua tej vaajtswv, nwg yog tug Tswv kws kaav taagnrho tej vaajntxwv, hab yog tug kws qha tej kws tuabneeg tsi paub rua suavdlawg. Kuv paub le nuav, rua qhov nwg qha koj txhais tau tej kws tsi muaj leejtwg paub.”

⁴⁸Vaajntxwv tsaa Daniyees ua ib tug numtswv luj hab muab tej khoom muaj nqes ntau yaam rua Daniyees. Nwg tsaa Daniyees ua tug kaav lub xeev Npanpiloos hab ca Daniyees ua tug thawj saib vaajntxwv cov tuavxaam.

⁴⁹Daniyees thov vaajntxwv tsaa Sadalas, Mesakas, hab Anpenekaus, ua cov saib num huv lub xeev Npanpiloos, tabsis Daniyees ua tug luj nrug vaajntxwv nyob huv lub loog.