Read Hmong Njua Daniyees 3 Bible Online

Daniyees 3 - Hmong Njua bible

Daniyees 3

¹Vaajntxwv Nenpukajnexales nchuav tau ib tug mlom kub sab rau caum tshim hab dlaav rau tshim, hab nwg muab txawb rua ntawm lub taj Dulas huv lub xeev Npanpiloos.

²Vaajntxwv tso tuabneeg moog hu taagnrho nwg cov numtswv tuaj sis sau ua ke, tsi has cov numtswv kws nrug vaajntxwv kaav cov pejxeem, cov tswv xeev, cov paab tug tswv xeev, cov ceev nyaj txag, cov txav txim, cov ceevxwm hab taagnrho nwg cov tubkhai kws nyob huv nwg lub tebchaws, tuaj nrug koom ua kevcai pe tug mlom kub ntawd.

³Thaus kws vaajntxwv tsoom numtswv tuaj txhij hab moog sawv rua ntawm tug mlom kub ntawd xubndlag taabtom yuav ua kevcai pe tug mlom ntawd,

⁴txawm muaj ib tug lug tshaajtawm nrov nrov rua suavdlawg has tas, “Mej txhua tug ntawm txhua tsaav tuabneeg, hab txhua xeem, tsi has cov tuabneeg kws has yaam lug twg le!

⁵Thaus mej nov dlheev suab xyu, suab raaj ntsaws, suab raaj nplaim, hab suab nkauj nogncaas nrov, mej ca le txhus caug pe tug mlom kub kws Vaajntxwv Nenpukajnexales muab teeb tseg ntawd.

⁶Yog leejtwg tsi kaam pe, luas yuav nteg tug ntawd coj moog pov rua huv lub cubtawg kws nplaim cig sis ntswj pis yog.”

⁷Yog le ntawd, thaus suavdlawg nov suab raaj suab xyu nrov, txhua tug ntawm txhua tsaav tuabneeg hab txhua xeem, tsi has cov tuabneeg kws has yaam lug twg, txawm pe tug mlom kub kws Vaajntxwv Nenpukajnexales teeb tseg ntawd.

⁸Cov tuabneeg Npanpiloos qee leej tau kom cov Yudais rua vaajntxwv.

⁹Puab has rua Vaajntxwv Nenpukajnexales has tas, “Thov kuas koj muaj sa nyob moog ibtxhis.

¹⁰Koj has rua suavdlawg has tas, thaus chiv tshuab raaj tshuab xyu, ces kuas txhua tug ca le pe tug mlom kub,

¹¹yog leejtwg tsi pe, koj yuav muab tug ntawd pov rua huv cubtawg.

¹²Cov Yudais kws koj tau tsaa lug saib num nyob huv lub xeev Npanpiloos, muaj qee leej tuaj ntawm nuav. Puab tsi ua lawv le koj has. Puab cov ntawd yog: Sadalas, Mesakas hab Anpenekaus. Puab peb leeg nuav tsi fwm hab tsi kaam pe tug mlom kub kws koj teeb tseg ntawd.”

¹³Thaus vaajntxwv nov le ntawd, nwg chim heev, nwg txhaj tso tuabneeg moog nteg puab peb leeg ntawd lug cuag nwg.

¹⁴Vaajntxwv nug puab has tas, “Sadalas, Mesakas hab Anpenekaus, mej tsi fwm hab tsi kaam pe kuv tug mlom kub nuav puas yog?

¹⁵Ib plag mej nov dlheev suab xyu, suab raaj ntsaws, suab raaj nplaim hab suab nkauj nogncaas nrov, mej ca le pe tug mlom kub ntawd. Yog mej tsi kaam pe, ces kuv yuav muab mej pov rua huv cubtawg. Mej xaav has tas, tseem yuav muaj dlua ib tug vaajtswv nyob qhov twg lug paab tau mej hab nua los?”

¹⁶Sadalas, Mesakas hab Anpenekaus teb vaajntxwv has tas, “Vaajntxwv, tsi yog peb xaav has kuas peb yeej koj.

¹⁷Tabsis yog has tas, tug Vaajtswv kws peb fwm pum zoo paab peb, nwg yeej yuav paab kuas peb dlim ntawm cov nplaim tawg hab ntawm koj txhais teg.

¹⁸Txawm yog nwg tsi paab peb los peb has rua koj tas, peb yeej yuav tsi fwm hab tsi pe tug mlom kub kws koj teeb tseg ntawd le.”

¹⁹Vaajntxwv Nenpukajnexales chim heev rua Sadalas, Mesakas hab Anpenekaus. Nwg ua ntsejmuag dlub ncab rua puab. Nwg txhaj saamfwm kuas nwg cov tubkhai moog tsaav tawg ntxiv kuas lub cubtawg cig hlub dlua qub xyaa npaug ntxiv.

²⁰Nwg has kuas nwg cov tubrog kws muaj zug heev, moog muab Sadalas, Mesakas hab Anpenekaus puab khi hab coj moog pov rua huv cubtawg.

²¹Cov tubrog txawm muab puab peb leeg ntawd khi, ca puab naav puab tej rig tsho: tsho luj, tsho miv, ntoo mom huv tuabsi, hab muab puab pov rua huv lub cubtawg.

²²Vim vaajntxwv tau has kuas puab muab tawg tsaav ntxiv kuas cig hlub dlua qub, nplaim tawg txhaj le kub cov tubrog kws muab puab peb leeg ntawd pov rua huv lub cubtawg tuag lawm.

²³Thaus Sadalas, Mesakas hab Anpenekaus puab peb leeg poob moog rua huv cub suavtawg, hlua tseem khi nreeg puab.

²⁴Taamsim ntawd Vaajntxwv Nenpukajnexales txawm poob sab nthaav, hab nwg sawv tseeg moog nug cov tubkhai has tas, “Puas yog peb khi peb tug txivneej coj moog pov rua huv lub cubtawg xwb?” Puab teb has tas, “Vaajntxwv, yeej muaj tseeb le koj has.”

²⁵Vaajntxwv rov has tas, “Ua caag kuv pum muaj plaub tug txivneej moog moog lug lug huv lub cubtawg, tsi muaj hlua khi puab, hab puab tsi kub nyab le, tug plaub muaj ntsiv zoo le ib tug timtswv.”

²⁶Vaajntxwv Nenpukajnexales txawm moog rua ntawm lub rooj qho cubtawg, nwg xauj hab hu has tas, “Sadalas, Mesakas hab Anpenekaus, mej cov kws yog Vaajtswv tug kws muaj fwjchim luj kawg nkaus cov tubkhai, mej ca le tawm lug.” Taamsim ntawd puab txawm tawm lug.

²⁷Cov numtswv kws nrug vaajntxwv kaav cov pejxeem hab cov tswv xeev, vaajntxwv cov tuavxaam hab nwg cov tubkhai, suavdlawg lug saib puab peb tug txivneej ntawd, mas puab tsi kub nyab le: plaubhau tub tsi caws ib txuj, rig tsho los tsi kub nyab hab puab lub cev los tub tsi tsw nchauv le.

²⁸Vaajntxwv has tas, “Thov ua Sadalas, Mesakas hab Anpenekaus tug Vaajtswv tsaug! Nwg khaiv nwg tug timtswv lug cawm peb tug txivneej kws pehawm hab tso sab rua nwg. Puab tsi ua lawv le kuv tej lug. Puab yeem tso puab txujsa tseg zoo dlua le kws pe tej vaajtswv kws tsi yog tug Vaajtswv tag.

²⁹“Nwgnuav kuv has rua suavdlawg has tas, txhua tug ntawm txhua tsaav tuabneeg, hab txhua xeem, tsi has cov tuabneeg kws has yaam lug twg, yog leejtwg thuam Sadalas, Mesakas hab Anpenekaus puab tug Vaajtswv, ces ca le muab tug ntawd hlais ib dlaim quas zug, hab muab nwg tej vaaj tse rhuav povtseg huv tuabsi. Yeej tsi muaj dlua ib tug vaajtswv twg kws yuav paab tau tuabneeg dlim le tug Vaajtswv nuav le.”

³⁰Vaajntxwv Nenpukajnexales tsaa Sadalas, Mesakas hab Anpenekaus puab ua numtswv luj tshaaj qub kaav lub xeev Npanpiloos.