Read Hmong Njua Daniyees 4 Bible Online

Daniyees 4 - Hmong Njua bible

Daniyees 4

¹Vaajntxwv Nenpukajnexales sau tsaab ntawv kws has nraag qaab nuav xaa moog rua txhua tug ntawm txhua tsaav tuabneeg hab txhua xeem, tsi has cov tuabneeg kws has yaam lug twg, nyob thoob plawg nplajteb has tas, “Thov kuas mej suavdlawg noj qaab nyob zoo hab nyob kaaj sab lug.

²Kuv thov qha tej txujci tseemceeb kws yog Vaajtswv tug kws muaj fwjchim luj kawg nkaus ua rua kuv pum rua mej paub.

³“Yaam kws Vaajtswv ua rua peb pum tseemceeb heev le. Tej txujci kws Vaajtswv ua yog lub fwjchim kws luj kawg nkaus. Vaajtswv yog tug Vaajntxwv kws nyob moog ibtxhis. Nwg yuav kaav moog tsi muaj nub kawg.

⁴“Kuv ua neej nyob suv sab so huv kuv lub vaaj lub tsev, kuv muaj ib puas tsaav yaam siv tsi taag. Kuv tsi txob tsi txhawj ib yaam dlaabtsi le.

⁵Tabsis kuv ua ib zaaj npau suav txaus ntshai heev, thaus kuv tseem pw, zaaj ywgtoog kws kuv pum ntawd ua rua kuv ntshai kawg le.

⁶Kuv tso tuabneeg moog hu kuv cov tuavxaam kws ibtxwm nrug kuv tuav tswvyim huv lub nroog Npanpiloos, kuas tuaj cuag kuv hab qha kuv zaaj npau suav ntawd rua kuv saib yog le caag.

⁷Cov tuabneeg txawj saib teg, txawj ua yeegsiv, txawj saib xyaab hab txawj saib nubqub txhaj tuaj cuag kuv. Kuv pav kuv zaaj npau suav rua puab noog, tabsis tsi muaj leejtwg txhais tau rua kuv le.

⁸Tom qaab ntawd Daniyees txawm tuaj cuag kuv. Daniyees muaj dlua ib lub npe hu ua Npeetesaxas lawv le kuv tug vaajtswv lub npe. Nwg muaj tej vaajtswv kws dlawbhuv tug ntsujplig nrug nraim nwg. Kuv txhaj le pav kuv zaaj npau suav rua nwg noog.

⁹Kuv has rua nwg tas, Npeetesaxas, koj yog cov tuabneeg kws txawj saib teg tug thawj, kuv paub has tas Vaajtswv tug kws dlawbhuv tug Ntsujplig nrug nraim koj nyob. Hab paub has tas koj yeej totaub tej kws tsi muaj tuabneeg paub. Kuv zaaj npau suav yog le nuav. Koj ca le qha rua kuv saib lub ntsab txhais le caag.

¹⁰“Thaus kws kuv pw tsaug zug, kuv ua npau suav pum ib tsob ntoo sab sab sawv huv plawv nplajteb.

¹¹Tsob ntoo ntawd pheej sab zuj zug moog nto ntuj. Txhua tug kws nyob huv nplajteb nuav puavleej pum tsob ntoo ntawd.

¹²Tsob ntoo ntawd tej nplooj zoo nkauj heev, txi txiv ua nrw quas nab, txaus tuabneeg nplajteb tuaj noj. Tej tsaj nruab nraag puavleej lug nraim ntxoo huv qaab tsob ntoo ntawd, hab noog kuj lug ua zeg rua sau tej ceg. Tuabneeg hab txhua yaam kws muaj sa los tuaj noj tsob ntoo ntawd tej txiv.

¹³“Thaus kuv taabtom xaav txug zaaj npau suav nuav, kuv pum ib tug timtswv nqeg sau ntuj lug hab saib ncig pis leeg.

¹⁴Nwg has nrov nrov tas, ‘Ca le muab tug ntoo nuav ntuv, muab cov ceg hab cov nplooj lwg kuas taag hab muab tej txiv w rua txhua qhov. Lawv tej tsaj nruab nraag kws nyob huv qaab tsob ntoo kuas tsiv moog, hab lawv tej noog kws nyob sau tej ceg kuas yaa taag,

¹⁵hab muab saw tooj saw hlau lug khi lub hauvpaug ntoo ca rua nraag taj. “ ‘Ca kuas lwg ntsu lug ntub tug txivneej nuav, hab ca nwg nrug tej tsaj nruab nraag hab tej xyoob ntoos nyob ua ke.

¹⁶Nwg lub sab yuav tsi zoo le tuabneeg lub moog txug xyaa xyoo, tabsis yuav zoo le tsaj lub.

¹⁷Cov timtswv ceebtsheej kws saib suavdlawg has tas: cov tuabneeg kws nyob rua txhua qhov yuavtsum paub has tas, Vaajtswv yog tug kws muaj fwjchim luj kawg nkaus, nwg muaj fwjchim luj dlua tej tuabneeg kws ua vaajntxwv kaav, hab nwg xaav tsaa leejtwg ua vaajntxwv kaav tej tebchaws ntawd los tau, txawm yog tug ntse hab tug ruag los nwg yeej tsaa tau.’

¹⁸“Vaajntxwv Nenpukajnexales has tas, ‘Kuv zaaj npau suav yog muaj lawv le kuv tau pav taag lug nuav. Koj ca le txhais zaaj npau suav ntawd rua kuv. Kuv cov tuavxaam kws paab kuv tuav tswvyim yeej tsi muaj ib tug txhais tau le, tabsis koj yeej yuav txhais tau, rua qhov tej vaajtswv kws dlawbhuv tug ntsujplig nrug nraim koj nyob.’ ”

¹⁹Daniyees tug kws muaj dlua ib lub npe hu ua Npeetesaxas poob sab nthaav hab tsi paub yuav has le caag. Vaajntxwv txhaj le has rua nwg tas, “Npeetesaxas, koj tsi xob poob sab txug tej xwm kws yuav muaj lug lawv le zaaj npau suav nuav.” Npeetesaxas teb has tas, “Vaajntxwv, thov kuas koj zaaj npau suav hab tej xwm huv zaaj npau suav ntawd lug raug rua koj cov yeebncuab xwb, tsi xob raug rua koj.

²⁰Koj pum ib tsob ntoo luj hab sab heev, lub ntsis sab nto ntuj plawg. Txhua tug tuabneeg kws nyob huv nplajteb nuav puavleej pum tsob ntoo ntawd.

²¹Tsob ntoo ntawd tej nplooj zoo nkauj heev hab txi txiv nrw quas nab, txaus tuabneeg thoob nplajteb noj. Tej tsaj nruab nraag los kuj lug nraim ntxoo huv qaab tsob ntoo ntawd, hab tej noog kuj lug ua zeg rua sau tej ceg.

²²“Vaajntxwv, koj yog tsob ntoo ntawd ntaag. Koj muaj zug moog nto ntuj, vaammeej, muaj fwjchim hab koj lub fwjchim kaav moog thoob plawg nplajteb.

²³Vaajntxwv, thaus koj tseem saib tsob ntoo ntawd, muaj ib tug timtswv nqeg sau ntuj lug has tas, ‘Ca le ntuv tsob ntoo nuav, muab txav kuas tu, tsoo kuas ntsoog taag, tsuas tseg lub hauvpaug ntoo nyob xwb. Hab muab saw tooj saw hlau lug khi lub hauvpaug ntoo ca rua nraag taj. Ca kuas lwg ntsu lug ntub tug txivneej ntawd, hab ca nwg nrug tej tsaj nruab nraag nyob nraag taj xyaa xyoo.’

²⁴“Vaajntxwv, tej xwm nuav yog tej kws Vaajtswv tug kws muaj fwjchim luj kawg nkaus qha rua koj paub txug tej kws yuav muaj lug raug koj.

²⁵Luas yuav ntab koj tsiv, tsi pub koj nrug tuabneeg nyob ua ke, koj yuav moog nrug tej tsaj nruab nraag nyob. Koj yuav noj zaub ib yaam le tej nyuj, hab koj yuav pw huv haav zoov haav tsuag ntub lwg ntsuav moog txug xyaa xyoo. Tom qaab ntawd koj yuav leeg has tas, Vaajtswv tug kws muaj fwjchim luj kawg nkaus, yog tug kaav tej tebchaws kws sawv vaajntxwv kaav hab nwg tsaa tuabneeg ua vaajntxwv lawv le nwg pum zoo.

²⁶Qhov kws tug timtswv has kuas tseg lub hauvpaug ntoo ca, yog txhais has tas, thaus koj leeg has tas, Vaajtswv yog tug kws kaav taagnrho lub nplajteb. Ces koj yuav rov qaab tau ua vaajntxwv dlua ib zag ntxiv.

²⁷Vaajntxwv, koj ca le ua lawv le kws kuv has nuav: koj tseg tsi xob ua txhum! Koj ca le ua zoo hab hlub cov tuabneeg txomnyem. Yog has tas koj ua le nuav, koj yuav vaammeej moog le.”

²⁸Txhua yaam kws tau has ntawd txawm muaj tshwm lug raug Vaajntxwv Nenpukajnexales tag.

²⁹Tom qaab ntawd kaum ob lub hlis, muaj ib nub vaajntxwv ncig moog ncig lug sau nwg lub tsev kws nyob huv lub nroog Npanpiloos.

³⁰Vaajntxwv has tas, “Lub nroog Npanpiloos nuav yog lub nroog kws luj kawg le. Kuv tsim lub nroog nuav ua kuv lub tuamceeb nroog. Kuas suavdlawg txhaj le pum kuv lub fwjchim, kuv lub meejmom hab kuv lub koob lub npe.”

³¹Thaus vaajntxwv tseem has lug tsi tau xaus, txawm muaj ib lub suab has nrov ntxhe ntxhas sau ntuj tuaj has tas, “Vaajntxwv Nenpukajnexales, koj ca le noog kuv has. Kuv tub txu koj lub fwjchim, koj yuav tsi tau ua vaajntxwv kaav tebchaws lawm.

³²Luas yuav muab koj ntab tawm, tsi pub koj nrug tuabneeg nyob. Koj yuav moog nrug tej tsaj nruab nraag nyob ua ke. Koj yuav noj zaub ib yaam le tej nyuj moog txug xyaa xyoo. Tom qaab ntawd koj yuav leeg has tas, Vaajtswv tug kws muaj fwjchim luj kawg nkaus, yog tug kaav tej tebchaws kws sawv vaajntxwv kaav, hab Vaajtswv tsaa tuabneeg ua vaajntxwv lawv le nwg pum zoo.”

³³Taamsim ntawd txawm muaj lawv le tej lug nuav: Luas ca le muab Vaajntxwv Nenpukajnexales ntab tsiv, tsi pub nwg nrug tuabneeg nyob hab nwg moog noj zaub le nyuj noj, nwg lub cev ntub lwg ntsuav. Nwg cov plaubhau ntev ib yaam le tis dlaav, hab nwg cov rau teg ntev ib yaam le tej rau noog.

³⁴Vaajntxwv has tas, “Thaus dlhau xyaa lub xyoo lawm, kuv tsaa qhovmuag saib sau ntuj. Kuv rov feeb meej, kuv txhaj ua tug Vaajtswv kws muaj fwjchim luj kawg nkaus tsaug. Kuv qhuas hab ua rua tug Vaajtswv kws muaj sa nyob moog ibtxhis tau koob meej. ‘Vaajtswv yuav kaav moog ibtxhis, nwg lub tebchaws yuav nyob ruaj nreeg moog tsi paub kawg.

³⁵Nwg suav has tas tuabneeg nplajteb tsi tseemceeb dlaabtsi; cov timtswv sau ntuj hab tuabneeg nplajteb puavleej nyob huv nwg lub xibteg. Tsi muaj leejtwg muaj cuabkaav cheem tau tsi pub nwg ua lawv le nwg lub sab nyam lossis nug has tas nwg ua dlaabtsi.

³⁶“ ‘Thaus kuv feeb meej lawm, kuv rov tau koob meej, tau meejmom hab rov tau kaav lub tebchaws dlua. Kuv cov numtswv hab kuv cov tubkhai puavleej zoo sab rov qaab yuav kuv. Kuv rov tau ntsejmuag hab muaj fwjchim heev dlua yaav taag lug.

³⁷“ ‘Nwgnuav kuv kws yog Nenpukajnexales, kuv thov qhuas, thov hawm hab ua rua tug Vaajntxwv kws nyob sau ntuj tau koob meej. Ib puas tsaav yaam kws Vaajtswv ua puavleej yog, hab ncaaj nceeg, hab nwg ua tau rua cov tuabneeg khaavtheeb poob ntsejmuag.’ ”