Read Hmong Njua Daniyees 5 Bible Online

Daniyees 5 - Hmong Njua bible

Daniyees 5

¹Muaj ib mos Vaajntxwv Npesaxas txawm npaaj ib rooj noj haus luj. Nwg caw tsoom numtswv luj ib txheeb leej tuaj nrug nwg noj mov.

²Thaus kws puab taabtom haus cawv txiv maab, Vaajntxwv Npeesaxas txawm khaiv nwg cov tubqhe moog muab tej khob nyaj khob kub hab tej taig nyaj taig kub kws nwg txiv Nenpukajnexales moog fuab huv lub tuamtsev tim lub nroog Yeluxalees lug ntawd, nqaa lug rua vaajntxwv, nwg tsoom numtswv, nwg cov quaspuj hab nwg cov nam yau laub cawv txiv maab haus.

³Taamsim ntawd puab txawm moog nqaa tej khob nyaj khob kub lug laub cawv rua puab suavdlawg haus,

⁴hab qhuas tej mlom kws muab nyaj, muab kub, muab tooj lab, muab hlau, muab ntoo hab muab pobzeb ua ntawd.

⁵Taamsim ntawd txawm muaj ib txhais teg tuabneeg cev loo lug sau ntawv rua ntawm saab phaab ntsaa kws luam moov sib kws taws teeb ci pum kev laam lug. Vaajntxwv kuj pum thaus kws txhais teg ntawd tseem taabtom sau sau ntawv,

⁶mas ua rua vaajntxwv lub ntsejmuag thumxem taag, nwg poob sab hab ntshai kawg le, hab ua rua nwg ob lub hauvcaug tshee ndluas txag.

⁷Vaajntxwv txhaj hu tawg ntho kuas tso tuabneeg moog hu cov tuabneeg kws txawj ua yeegsiv, txawj saib xyaab hab txawj saib nubqub kuas tuaj cuag nwg. Thaus kws puab cov ntawd tuaj txug, nwg has rua puab tas, “Leejtwg nyeem tau cov ntawv nuav hab txhais tau cov ntsab lug rua kuv paub, ces kuv yuav muab kuv lub tsho ntaub tsaamxem hab txuj saw kub kws coj muaj fwvxyeej rua tug ntawd naav hab coj. Hab kuv yuav muab tug ntawd tsaa ua ib tug numtswv luj kws yog ua tug yau theem peb ntawm kuv nrug kuv kaav tebchaws.”

⁸Vaajntxwv cov tuavxaam tuaj taagnrho, tabsis tsi muaj leejtwg nyeem tau cov ntawv ntawd hab txhais tsi tau cov ntsab lug rua vaajntxwv le.

⁹Vim le nuav vaajntxwv Npeesaxas hajyam poob sab heev hab ua ntsejmuag ntshaus taag. Vaajntxwv cov tuavxaam los yeej tsi pum qaab yuav ua zaaj twg le.

¹⁰Thaus vaajntxwv nam nov vaajntxwv hab nwg tsoom numtswv has lug nrov ntsoog qeeg, nwg txawm moog rua huv chaav tsev kws puab noj mov ntawd, nwg has rua vaajntxwv has tas, “Thov kuas vaajntxwv muaj sa nyob moog ibtxhis. Vaajntxwv, koj tsi xob txhawj ua ntsejmuag thumxem taag le ko!

¹¹Nyob huv lub tebchaws kws koj kaav nuav muaj ib tug txivneej kws muaj tej vaajtswv kws dlawbhuv tug ntsujplig nrug nwg nyob. Lub sijhawm kws koj txiv tseem ua vaajntxwv, mas tug ntawd paab tau koj txiv. Nwg muaj tswvyim paab tau txhua yaam hab nwg txawj ntse ib yaam le tej timtswv. Vaajntxwv Nenpukajnexales kws yog koj txiv tau tsaa tug txivneej ntawd ua tug kws saib taagnrho cov tuabneeg kws txawj saib teg, txawj ua yeegsiv, txawj saib xyaab hab txawj saib nubqub.

¹²Nwg ntse heev hab txawj txhais tau tej npau suav, tej txhaj txhais kws tuabneeg has, hab nwg paub tej kws tsi muaj tuabneeg paub. Koj ca le khaiv tuabneeg moog hu Daniyees tug kws koj txiv muab tis dlua npe hu ua Npeetesaxas kuas tuaj cuag koj. Nwg yuav txhais tau tej lug nuav huv tuabsi rua koj.”

¹³Taamsim ntawd puab txawm moog coj Daniyees tuaj cuag vaajntxwv. Vaajntxwv has rua Daniyees has tas, “Koj yog Daniyees los tsi yog? Koj puas yog cov tuabneeg Yudais kws kuv txiv puab coj tim tebchaws Yudas lug?

¹⁴Kuv nov has tas, tej vaajtswv kws dlawbhuv tug ntsujplig nrug nraim koj, hab nov has tas koj txawj ntse kawg le, koj paub hab muaj tswvyim heev.

¹⁵Kuv tub hu kuv cov tuavxaam, cov tuabneeg kws txawj ua yeegsiv, tuaj txhais cov lug nuav rua kuv, tabsis puab txhais tsi tau le.

¹⁶Kuv nov has tas, koj paub hab txawj txhais tej zaaj kws tsi muaj tuabneeg paub lub ntsab lug rua suavdlawg. Yog koj nyeem tau hab txhais tau cov npe ntawv ntawd lub ntsab lug rua kuv paub. Kuv yuav muab lub tsho ntaub tsaamxem hab txuj saw kub kws coj muaj fwvxyeej rua koj naav hab coj. Hab kuv tseem yuav muab koj tsaa ua ib tug numtswv luj kws yog tug yau theem peb ntawm kuv, nrug kuv kaav lub tebchaws nuav.”

¹⁷Daniyees teb has tas, “Vaajntxwv, thov koj ca le muab tej kws koj yuav muab ko khaws tseg lossis muab rua lwm tug. Txawm le caag los kuv yuav nyeem hab txhais cov ntsab lug ntawd rua koj, tabsis kuv tsi yuav nqe zug le.

¹⁸“Vaajtswv tug kws muaj fwjchim luj kawg nkaus tau tsaa koj txiv Nenpukajnexales ua tug vaajntxwv kws muaj fwjchim luj hab pub nwg muaj koob meej nyob nto moo lug,

¹⁹nwg txhaj muaj fwjchim heev. Txhua tug ntawm txhua tsaav tuabneeg, txhua xeem, hab tsi has cov tuabneeg kws has yaam lug twg los puavleej ntshai koj txiv ua ib ce tshee nyo. Yog nwg xaav tua leejtwg, nwg yeej tua tau. Yog nwg xaav tso leejtwg dlim nwg yeej tso tau. Hab nwg yuav txu leejtwg, nwg yeej txu tau lawv le nwg pum zoo.

²⁰Tabsis yog vim qhov kws nwg khaavtheeb, tawv ncauj hab ua nruj ua tsiv heev, nwg txhaj le poob fwjchim hab tsi tau ua vaajntxwv lawm.

²¹Luas muab nwg ntab tsiv tsi pub nwg nrug tuabneeg nyob hab nwg lub sab txawm zoo le tsaj lub lawm. Nwg moog nrug tej neeg luav qus nyob rua nruab nraag. Nwg noj zaub le nyuj noj hab nwg pw huv haav zoov haav tsuag tsau lwg tsawv tsi muaj dlaabtsi vuv. Thaus kawg nwg maam le leeg has tas, Vaajtswv tug kws muaj fwjchim luj, yog tug kaav tuabneeg nplajteb hab tej tebchaws kws sawv muaj vaajntxwv kaav. Hab nwg leeg has tas, Vaajtswv xaav tsaa leejtwg ua vaajntxwv kaav tebchaws los yeej tau.

²²“Tabsis Npesaxas, koj kws yog nwg tug tub, txawm yog koj tub paub tej nuav zoo lawm los koj tsi txu koj lub fwjchim le hab.

²³Koj tau ua txhum tawmtsaam tug TSWV kws kaav sau ntuj kws yog koj moog rhu tej khob hab tej taig kws nqaa huv Vaajtswv lub Tuamtsev lug, coj lug rua koj hab koj tsoom numtswv, koj cov quaspuj hab koj cov nam yau laub cawv txiv maab haus. Hab mej qhuas mej tej vaajtswv kws muab nyaj, muab kub, muab tooj lab, muab hlau, muab ntoo hab muab pobzeb ua. Tej vaajtswv ntawd tsi pum kev, tsi nov lug hab tsi paub ib yaam dlaabtsi le. Koj tsi fwm Vaajtswv tug kws tuav koj txujsa, hab kaav taagnrho ib puas tsaav yaam kws koj ua.

²⁴Tub yog vim le ntawd Vaajtswv txhaj ua ib txhais teg lug sau tej lug ntawd ntaag.

²⁵“Cov Npe ntawv ntawd sau has tas: ‘MENES, MENES, TEKELES, PALEXEES,’

²⁶MENES txhais has tas, Vaajtswv tub suav hab teem cov nub kws koj ua vaajntxwv kaav tebchaws tseg lawm, tsuas pub koj ua vaajntxwv txij le nuav xwb;

²⁷TEKELES, txhais has tas, Vaajtswv tub muab koj luj taag lawm, koj sib heev.

²⁸PALEXEES, txhais has tas, Vaajtswv yuav muab koj lub tebchaws faib ua ob lub. Mas muab ib nraab faib rua cov tuabneeg Medes, hab muab ib nraab faib rua cov tuabneeg Pawxias.”

²⁹Taamsim ntawd Vaajntxwv Npesaxas txawm has kuas puab muab nwg lub tsho luj coj lug rua Daniyees naav hab muab txuj saw kub kws coj muaj fwvxyeej lug rua Daniyees coj. Nwg tsaa Daniyees ua tug nom luj theem peb ntawm nwg, nrug nwg kaav tebchaws.

³⁰Ces mo ntawd, Npesaxas kws yog vaajntxwv kaav lub tebchaws Npanpiloos txawm raug luas muab tua povtseg lawm.

³¹Dali-us kws yog tuabneeg Medes txawm txeeb ua tug kws kaav lub tebchaws ntawd. Lub sijhawm ntawd, Dali-us muaj noobnyoog rau caum ob xyoos.