Read Hmong Njua Daniyees 6 Bible Online

Daniyees 6 - Hmong Njua bible

Daniyees 6

¹Vaajntxwv Dali-us txawm pum zoo yuav tsaa ib puas neeg nkaum leej lug ua cov tswv xeev moog kaav txhua lub xeev huv lub tebchaws kws nwg kaav.

²Vaajntxwv tau tsaa Daniyees hab tsaa dlua ob tug ua cov kws tshuaj saib cov tswv xeev teg num kuas vaajntxwv txhaj le kaav hab tswj tau lub tebchaws zoo.

³Daniyees lug tuav lub luag num kws yog tshuaj saib cov tswv xeev ua num. Nwg ua tau zoo tshaaj le lwm tug kws tshuaj saib cov tswv xeev. Hab Daniyees tseem ua num zoo tshaaj cov tswv xeev txhua tug huv tuabsi. Vim le ntawd, vaajntxwv txhaj xaav muab Daniyees tsaa ua tug kws saib thoob plawg lub tebchaws.

⁴Lwm tug numtswv kws nrug Daniyees tshuaj saib cov tswv xeev teg num, txawm pheej nrhav lug kom Daniyees. Puab soj nraim Daniyees kev ua num kaav tebchaws, saib nwg puas ua yuam kev qhov twg, puab txhaj le tau lug kom nwg, tabsis puab nrhav tsi tau ib qhov kws Daniyees ua yuam kev kws puab yuav kom tau nwg le, rua qhov Daniyees yog ib tug tuabneeg kws muab sab rau ua num hab nwg tsi ua tej kws txhum kevcai hab tej kws tsi ncaaj hlo le.

⁵Puab txawm sis thaam has tas, “Peb yeej yuav nrhav tsi tau ib yaam dlaabtsi lug kom Daniyees le. Tsuas yog nrhav tau lug kom qhov kws nwg coj nwg tug Tswv txuj Kevcai nkaus xwb.”

⁶Yog le ntawd, puab txhaj le moog cuag Vaajntxwv Dali-us hab has rua vaajntxwv has tas, “Vaajntxwv, thov kuas koj muaj sa nyob moog ibtxhis.

⁷Peb txhua tug kws saib num thoob plawg koj lub tebchaws, tsi has cov kws tshuaj saib cov tswv xeev teg num lossis cov kws paab tug tswv xeev lossis cov numtswv saib num lwm yaam. Peb suavdlawg puavleej pum zoo has tas, tsimnyog koj yuavtsum ua ib txuj kevcai rua suavdlawg coj. Thov koj ca le txwv tu nrho has tas, ‘Peb caug nub sau nuav, tsi pub leejtwg thov ib tug vaajtswv lossis thov ib tug tuabneeg twg le, tsuas yog thov koj tuab leeg xwb. Yog leejtwg hlaa koj tej lug nuav, ces ca le muab tug ntawd pov rua huv lub qhov kws kaw tsuv ntxhuav.

⁸Vaajntxwv, thov koj ca le tsim txuj kevcai nuav hab sau koj lub npe rua, txhaj tseemceeb lawv le Medes hab Pawxias txuj kevcai kws yeej hloov tsi tau le.’ ”

⁹Yog le ntawd, Vaajntxwv Dali-us txhaj sau npe rua huv tsaab ntawv kevcai ntawd.

¹⁰Thaus Daniyees paub has tas, vaajntxwv sau npe rua huv tsaab ntawv ntawd lawm, nwg txawm rov moog tsev. Nwg lub tsev chaav kws nyob txheej sau, muaj ib lub qhovrais qheb lug tig ncaaj moog rua lub nroog Yeluxalees. Nwg moog txhus caug tig xubndlag rua ntawm lub qhovrais ntawd thov Vaajtswv ib nub twg peb zag lawv le nwg ibtxwm thov.

¹¹Thaus cov tuabneeg kws ntxub Daniyees, pum Daniyees thov Vaajtswv,

¹²puab txawm sau nthwv moog cuag vaajntxwv hab puab kom Daniyees rua vaajntxwv has tas, “Vaajntxwv, koj tub sau koj lub npe rua huv tsaab ntawv kws koj txwv has tas, peb caug nub sau nuav, tsuas pub suavdlawg thov koj tuab leeg xwb. Yog leejtwg thov ib tug vaajtswv twg lossis ib tug tuabneeg twg, ces ca le muab tug ntawd pov rua huv lub qhov kws kaw tsuv ntxhuav.” Vaajntxwv teb has tas, “Yeej muaj lawv le mej has ko lawm tag. Tej lug ntawd yog tej lug kws txwv tu nrho, lawv le Medes hab Pawxias txuj kevcai, mas yeej rhuav tsi tau hlo le.”

¹³Puab txawm has rua vaajntxwv has tas, “Tug Daniyees kws peb nteg tim tebchaws Yudas lug, nwg tsi fwm koj hab tsi noog tej lug kws koj has rua suavdlawg ntawd le. Nwg naj nub thov nwg tug Vaajtswv, ib nub twg nwg thov peb zag.”

¹⁴Thaus vaajntxwv nov le ntawd, nwg ntxhuv sab heev, hab nwg nrhav saib puas muaj ib txujkev twg yuav paab tau Daniyees. Nwg txhaj nrhav kev paab Daniyees ib nub tsaus ntuj ndlais.

¹⁵Cov tuabneeg ntawd rov qaab tuaj cuag vaajntxwv dlua hab has tas, “Vaajntxwv, koj yeej paub lawm has tas lawv le Medes hab Pawxias txuj kevcai, mas tej lug kws vaajntxwv has rua suavdlawg lawm, yeej tsi muaj ib lus twg yuav hloov tau le.”

¹⁶Ces vaajntxwv txhaj kuas puab muab Daniyees coj moog pov rua huv lub qhov kws kaw tsuv ntxhuav, hab nwg has rua Daniyees has tas, “Thov koj tug Vaajtswv kws koj muab sab npuab paab cawm koj.”

¹⁷Puab muab dlaim laag zeb lug npug lub rooj qho hab vaajntxwv muab nwg lub homthawj hab cov numtswv lub homthawj nas rua sau dlaim laag zeb, tsi pub kuas leejtwg tuaj paab tau Daniyees dlim le.

¹⁸Vaajntxwv rov qaab moog rua huv nwg lub loog. Mo ntawd nwg tsi noj mov, tsi pub luas tuaj ua kev lomzem lawv le ibtxwm ua, hab nwg pw tsi tsaug zug ib mos kaaj ntug.

¹⁹Vaajntxwv sawv ntxuv tseeg dlha moog rua tom lub qhov kws kaw tsuv ntxhuav.

²⁰Thaus nwg moog yuav txug, nwg hu nrov nrov ua suab quaj tu sab nrho has tas, “Daniyees kws yog Vaajtswv tug kws muaj txujsa nyob tug tubkhai, koj tug Vaajtswv kws koj muab sab npuab, puas paab tau koj dlim ntawm cov tsuv ntxhuav los tsi tau?”

²¹Daniyees teb ndlais has tas, “Vaajntxwv, thov kuas koj muaj sa nyob ntev dlhawv moog ibtxhis tsi kawg.

²²Vaajtswv khaiv nwg tug timtswv lug kaw cov tsuv ntxhuav qhovncauj, tsi pub tsuv ua le caag rua kuv. Vaajntxwv, qhov kws Vaajtswv ua le nuav rua kuv, vim nwg paub has tas, kuv tsi muaj txim hab kuv tsi tau ua ib qhov yuam kev le.”

²³Vaajntxwv zoo sab kawg le. Nwg txhaj has kuas puab ca le muab Daniyees nqug tawm huv qhov tsuv lug. Puab txhaj sis paab nqug Daniyees teg tawm lug. Puab pum has tas, Daniyees yeej tsi raug mob ib qhov le, vim nwg tso sab rua Vaajtswv.

²⁴Vaajntxwv txhaj saamfwm kuas muab cov tuabneeg kws kom Daniyees ntawd hab puab tej quaspuj mivnyuas pov huv tuabsi rua huv lub qhov kws kaw tsuv ntxhuav ntawd. Thaus puab muab cov tuabneeg ntawd pov rua huv lub qhov kaw tsuv ntxhuav, cov tuabneeg ntawd poob tub tsi tau ti rua huv qaab qho, tsuv tub dlha tuaj muab puab dlua noj taag lawm.

²⁵Tom qaab ntawd, Vaajntxwv Dali-us sau ib tsaab ntawv xaa moog rua txhua tug ntawm txhua tsaav tuabneeg hab txhua xeem, tsi has cov tuabneeg kws has yaam lug twg kws nyob thoob lub tebchaws kws nwg kaav has le nuav: “Thov kuas mej suavdlawg ntsib kev noj qaab nyob zoo, muaj kev kaaj sab lug hab muaj kev vaammeej moog lawm yaav tom ntej.

²⁶Kuv has rua suavdlawg paub has tas, txhua tug pejxeem kws kuv kaav yuavtsum fwm hab saib taug Daniyees tug Vaajtswv. Nwg yog tug Vaajtswv kws muaj sa nyob, hab nwg yuav kaav moog ibtxhis. Nwg lub tebchaws yuav tsi raug kev puamtsuaj, hab nwg yuav muaj fwjchim nyob moog ibtxhis le.

²⁷Nwg cawm hab paab tau tuabneeg dlim. Nwg ua tej txujci tseemceeb kws peb xaav tsi thoob rua sau nruab ntug hab huv nplajteb nuav. Nwg tau paab Daniyees dlim tsi pub tsuv ntxhuav tum.”

²⁸Lub sijhawm kws Dali-us kaav lub tebchaws Npanpiloos hab Xailas kaav lub tebchaws Pawxias, mas Daniyees lub neej zoo hab vaammeej heev.