Read Hmong Njua Daniyees 7 Bible Online

Daniyees 7 - Hmong Njua bible

Daniyees 7

¹Daniyees has tas, Thawj xyoo kws Npesaxas ua vaajntxwv kaav lub tebchaws Npanpiloos, muaj ib mos thaus kws kuv tseem pw sau txaaj, kuv txawm ua ib zaaj npau suav.

²Kuv muab zaaj npau suav hab tej kws kuv pum mo ntawd sau tseg le nuav: Muaj ib cov cua tuaj plaub ceg kaum ntuj tuaj ntsawj cov nplaim dlej havtxwv.

³Taamsim ntawd txawm ca le muaj plaub tug tsaj luj tawm huv havtxwv tuaj. Cov tsaj ntawd zoo tsi sis thooj.

⁴Thawj tug muaj ntsiv zoo le tug tsuv ntxhuav, tabsis nwg muaj tis ib yaam le dlaav. Thaus kuv tseem saib ntsoov ntawd, luas txawm muab nwg tej plaub tis rhu povtseg, hab muab tug tsaj ntawd tsaa sawv ntsug le tug tuabneeg. Hab luas pub tug tsaj ntawd txawj xaav le tuabneeg.

⁵Kuv pum dlua tug tsaj ob, muaj ntsiv zoo le tug dlais kws taabtom sawv ntsug nreg nreeg, hab nwg npuav rawv peb tug pobtxhaa taav ntawm nwg qhovncauj, hab muaj ib lub suab has rua nwg tas, “Ca le noj nqaj kuas tsau.”

⁶Thaus kuv tseem saib ntsoov, kuv txawm pum dlua ib tug tsaj tawm tuaj. Tug tsaj peb ntawd muaj ntsiv zoo le tug tsuv pomtxwv, tabsis nwg muaj plaub saab tis nyob nrau nrausqaum ib yaam le tis noog. Hab nwg muaj plaub lub taubhau, saib mas zoo le nwg muaj fwjchim heev.

⁷Thaus kuv tseem saib, kuv txawm pum dlua ib tug tsaj kws yog tug plaub. Tug tsaj ntawd tsiv tsaim, phem hab muaj zug heev. Nwg muaj ib cov nav hlau luj luj, nwg noj zawg zog tej yaam kws nwg tum tau lug, hab muab tej seem kws nwg noj tsi taag tsuj pis ntag ua lwj ua lam povtseg. Tug tsaj nuav muaj kaum tug kub, hab nwg zoo tsi thooj le lwm tug tsaj.

⁸Thaus kuv saib cov kub ntawd, kuv pum ib tug kub miv miv tuaj xyaw cov kub ntawd. Thaus tug kub miv miv ntawd tawm tuaj, mas ua rua peb tug kub kws xub tuaj rhu hlo lug. Tug kub nuav muaj qhovmuag hab muaj qhovncauj ib yaam le tuabneeg. Nwg has lug khaav txiv ntxhas.

⁹Thaus kuv tseem saib ntsoov tug tsaj ntawd, muaj tuabneeg nqaa tej zwmtxwv lug txawb rua qhov ntawd. Ces tug kws muaj sa nyob ibtxhis txawm lug nyob sau cov zwmtxwv ntawd ib lub. Nwg cev rig tsho dlawb paug ib yaam le cov dlaus, hab nwg cov plaubhau dlawb ib yaam le cov plaub yaaj. Nwg lub zwmtxwv muaj nplaim tawg cig laim lag, hab nwg cov lug los muaj nplaim tawg cig laim lag thoob plawg.

¹⁰Tej nplaim tawg cig lab vog ntawm lub zwmtxwv ua ib kaab saab, ndlwg le dlej ndlwg. Muaj ntau txheeb leej ua cov tu nwg, hab muaj ntau plhom tuabneeg sawv ze ntawm nwg lub xubndlag. Cov txav txim txawm pib tshuaj tej plaub ntug hab puab muab tej ntaub ntawv nthuav lug nyeem.

¹¹Thaus kuv tseem saib ntsoov, kuv nov tug kub miv miv ntawd lub suab has khaav txiv ntxhas, kuv maam le saib dlheev, ua cav luas tub muab tug tsaj plaub tua tuag lawm, hab luas muab tug tsaj ntawd pov rua huv cubtawg kub nyab taag.

¹²Peb tug tsaj kws tseem caj, luas muab txu fwjchim taag, hab luas ca peb tug tsaj ntawd muaj sa nyob ib nyuas ntu xwb.

¹³Mo ntawd thaus kuv taabtom ua ywgtoog pum tej nuav, kuv pum muaj ib tug zoo le tug tuabneeg. Nwg txawm lug ze rua ntawm kuv, muaj ib cov fuab lug roog nwg hab muaj dlua ib tug lug coj nwg moog cuag tug kws muaj sa nyob ibtxhis.

¹⁴Luas pub nwg muaj meejmom, muaj koob meej hab muaj fwjchim tswj teb kaav chaw kuas txhua tug ntawm txhua tsaav tuabneeg, hab txhua xeem, tsi has cov tuabneeg kws has yaam lug twg los txhaj yuav tau ua nwg qhev. Nwg yuav muaj fwjchim moog ibtxhis hab nwg yuav kaav moog tsi paub kawg.

¹⁵Tej kws kuv ua ywgtoog pum nuav, ua rua kuv poob sab hab ntxhuv sab kawg le.

¹⁶Kuv txhaj le moog cuag cov tuabneeg kws sawv ntawd ib tug, hab thov nwg qha tej ntawd rua kuv. Yog le ntawd nwg txhaj qha lub ntsab rua kuv.

¹⁷Nwg has tas, “Plaub tug tsaj ntawd yog pev txug plaub lub tebchaws kws yuav muaj vaajntxwv sawv lug kaav.

¹⁸Tabsis Vaajtswv tug kws muaj fwjchim luj kawg nkaus, nwg tsaav tuabneeg yuav tau nwg lub fwjchim hab yuav kaav lub tebchaws ntawd moog ibtxhis.”

¹⁹Kuv txhaj yimfuab xaav paub zaaj kws has txug tug tsaj plaub. Tug tsaj ntawd zoo tsi thooj le lwm tug tsaj. Nwg yog ib tug tsaj kws tsiv tsaim heev. Nwg tej nav yog hlau, hab tej rau yog tooj lab. Nwg noj zawg zog tej kws nwg tum tau lug, hab muab tej seem kws nwg noj tsi taag tsuj ua lwj ua lam povtseg.

²⁰Kuv xaav paub txug kaum tug kub hab tug kub miv miv kws tuaj ua rua peb tug kub kws xub tuaj ca le rhu hlo lawm. Tug kub miv miv ntawd muaj qhovmuag hab muaj qhovncauj, hab nwg has lug khaav txiv ntxhas, saib mas yaam le tug kub miv miv ntawd, nyaum dlua lwm tug kub huv tuabsi.

²¹Thaus kuv tseem saib ntsoov, tug kub ntawd txawm tawmtsaam yeej Vaajtswv tsaav tuabneeg.

²²Tom qaab ntawd, tug kws muaj sa nyob moog ibtxhis txawm lug txav txim. Thaus nwg txav txim, nwg tuaj Vaajtswv tug kws muaj fwjchim luj kawg nkaus tsaav tuabneeg tog. Tub txug lub sijhawm kws Vaajtswv tsaav tuabneeg tau txais lub fwjchim kaav tebchaws lawm.

²³Nwg txhais tej kws kuv ua ywgtoog pum rua kuv has tas, “Tug tsaj plaub yog lub tebchaws plaub nyob huv nplajteb nuav kws yuav sawv muaj vaajntxwv lug kaav. Lub tebchaws ntawd yuav zoo tsi thooj le lwm lub. Nwg yuav tsoo lub nplajteb nuav hab yuav muab tsuj kuas puamtsuaj taag huv tuabsi.

²⁴Kaum tug kub ntawd, yog kaum tug vaajntxwv kws yuav sawv lug kaav lub tebchaws ntawd. Tom qaab ntawd, yuav muaj dlua ib tug vaajntxwv sawv lug kaav. Tug vaajntxwv nuav yuav zoo tsi thooj le cov vaajntxwv kws tub xub kaav ua ntej lawm. Nwg yuav txu peb tug vaajntxwv ntawd kuas poob.

²⁵Nwg yuav has lug twm Vaajtswv tug kws muaj Fwjchim Luj kawg nkaus, hab nwg yuav tsimtxom Vaajtswv tsaav tuabneeg. Nwg yuav txhobtxwm sim hloov Vaajtswv Txujlug hab tej Kevcai saib puas hloov tau. Vaajtswv tsaav tuabneeg yuav poob rua huv nwg txhais teg peb xyoos hab rau lub hlis.

²⁶Tom qaab ntawd cov txav txim kws yog tuabneeg qaum ntuj yuav pib tshuaj plaub ntug. Puab yuav txav txim txu nwg lub fwjchim hab ua kuas nwg puamtsuaj moog.

²⁷Luas yuav muab lub nplajteb tej tebchaws kws muaj vaajntxwv kaav, tej fwjchim hab kev vaammeej cob rua tug Vaajtswv kws muaj Fwjchim Luj kawg nkaus tsaav tuabneeg tuav. Vaajtswv tsaav tuabneeg yuav muaj fwjchim kaav moog ibtxhis. Taagnrho tej numtswv kws nyob huv nplajteb nuav yuav ua puab qhev hab yuav noog puab lug.”

²⁸Tej kws kuv ua ywgtoog pum ces muaj npaum le nuav xwb. Thaus kuv pum tej ntawd ua rua kuv ntshai heev, kuv plhu thumxem taag, tabsis kuv ncu ntsoov tej ntawd ca rua nruab sab.